已經係晚上十一點幾,馬頭角道麥記由於係通宵營業,仍然有十個八個食客逗留,佢地都係經常光顧既熟客,同呢度工作既員工非常熟落。
 
「計我話,一定係有鬼,冇錯架啦,條靚仔實係撞鬼,十三街最猛鬼!」佢叫達叔,經常係度食人地食剩既二手餐,不過佢份人都好揀擇,淨係食巨無霸餐同可樂走冰。佢話自己後生個陣身家過億,但點解家下咁折墮就冇人知。
 
「達叔,你咪妖言惑眾呀,你咁講我第時仲點撚樣坤D靚仔黎送外賣?撞乜撚野鬼丫,我話佢係偷車就真,揸撚埋我地架車走。」佢係呢度經理Peter Wong,人稱皮蛋王,份人刻薄成性,粗口爛舌,又成日性騷擾女同事,試過比女工告上法庭,但仍然死性不改。
 
「咩野妖言惑眾呀?唔係點解個靚仔送完外賣去十三街就唔見左人呀?偷車都唔偷你地D車啦,你估你個D係大包圍呀?」達叔仍然一口咬定係同鬼怪有關。
 
「挑,前後都唔夠一個禮拜,話唔定條契弟忽然雀仔痕上左深圳happy唔捨得落黎唔得呀?」呢個係最愛流連中港各大小架步,上論壇寫報告寫到街知巷聞,人稱土瓜灣雞汁。
 


「唔係個個都鐘意叫雞既。」我叫高偉傑,佢地通常叫我做偉哥,我係一個較為文靜既IT人,主力做System Security。高登仔叫我呢類人做毒撚,同佢地係論壇筆戰之後,仲比佢地hack埋入我部電腦,控制左個鏡頭,將我打飛機既情況都舖埋上網⋯⋯吊!
 
「咪係,咪咁衰啦,Bobby仔份人好正經,連望我都唔敢,點會去滾?」身穿緊身白色背心加超迷你短裙的,是喜愛夜蒲的Jeana。
 
「係呀係呀,佢好Cute呀,究竟發生乜野事呀?」呢個乜撚都唔知就走黎搭訕、毫不吝嗇事業線既靚女,係Jeana既好姊妹Sauna。
 
「Bobby佢去十三街送外賣之後,就無再返過黎,屋企都冇返。」呢個眼淚就快滴出黎、楚楚可憐既,係我既女神Carmen,失蹤既Bobby係佢細佬。
 
我地呢班人,各自有自己既生活圈子,但係唔知點解,都會因為唔同既原因,半夜三更落黎呢度食個飽,飲杯咖啡,無緣無故就識左,可能呢D就係緣份。
 


達叔:「嗱,皮蛋王,今晚差不多人齊,淨係爭禿鷹條死差佬同十三街長毛冇落黎,你就詳詳細細,一五一十咁將件事再講多次比大家聽下。」
 
皮蛋王:「吊你,講完又講,講到口都臭撚埋。」
 
達叔:「咁你講唔講先,唔講我以後唔幫襯你!」
 
皮蛋王:「吊你有幫襯過咩?」
 
達叔:「我企係你門口,叫人唔幫襯你,得唔得先?」
 


皮蛋王:「好好好,講就講,橫掂得你幾個仆街係度,都冇生意做。件事係咁既,上個禮拜五十二點鐘倒,有人打電話黎落order,你都知我地麥麥送幾咁受歡迎至得架,經常半夜三更都會有人打黎買野食架。原本總機接既,咁岩個邊唔得閒,彈返條線比我地自己聽,靚妹聽完個order,咪叫Bobby仔跟住個地址去送餐囉,地址係十三街個邊。點知Bobby仔出左去成個鐘都未撚返。喂大佬呀,行路都到啦,佢仲係揸電單車去,出埋火再沖埋涼都返黎啦,咪諗住打電話去吊柒佢囉,點知電話又唔通,再打去比個客,吊你,個客個電話一樣唔撚通,九成係玩野單啦。一直到第二日都唔見Bobby仔蒲頭,連架電單車都冇撚埋,喂咁我唔撚掂架,咪打去佢屋企,又話冇返過黎,最後咪報警話條靚仔偷車囉,駛撚同佢客氣呀。」
 
Carmen哭得更厲害,道:「我細佬唔會偷車架!冇證冇據你咪冤枉佢!嗚⋯⋯」
 
皮蛋王:「駛撚證據呀?依家我唔見左部車咪證據囉!」
 
我當然要保護我既女神:「依家人都唔見左,你仲掛住部車?」
 
皮蛋王:「吊,人唔見左關我撚事呀?攪左我幾個鐘頭去差館落案,算係咁啦!」
 
達叔:「靚妹,你聽電話落order個陣係點架?」
 
靚妹係一個好怕事既小妹妹,岩岩黎做冇耐,道:「都冇乜特別,佢咪講自己想食乜,講埋地址電話咪收線囉。」
 
達叔:「咁佢叫左乜野食丫?」


 
靚妹:「咪散叫漢寶飽、薯條同可樂囉,好似唔知我地依家賣緊乜野餐咁。」
 
達叔:「問題就出係呢度,有乜理由有餐唔叫,要散叫?」
 
雞汁:「喂,我周不時去按摩都唔叫套餐架啦,有乜撚野問題先?」
 
達叔依依哦哦,似乎搵唔倒下台階,道:「靚妹,你繼續講落去。」
 
靚妹:「我咪講完囉,佢留左電話地址,就叫Bobby去送餐。」靚妹諗左一陣:「呀,收線之前佢問我攞左我地個電話。」
 
Jeana:「個客係咪留左電話地址?」
 
皮蛋王:「冇撚用架,電話我打過,地址差佬去過,統統都係流既。」
 


忽然,外賣專線個電話有電話打入,發出「叮叮叮叮」既鈴聲,係十二點鐘聽倒電話鈴聲,實在有D令人毛骨悚然既感覺。
 
點知跟住落黎靚妹發出個下叫聲,重嚇撚死人:「係個個電話,我記得個號碼,係佢打黎!」