電話入面,開始既時候只有空空洞洞既回音,完全無人聲。達叔示意靚妹好似平時接order咁聽電話。靚妹見有咁多人壯膽,於是鼓起勇起,不過就有D緊張:「麥麥麥麥麥麥麥送,請問想要乜?」
 
電話筒傳出兩下空洞既「嗚⋯⋯嗚⋯⋯」聲音,實在非常詭異。隔左冇耐,終於傳黎一D有意義既說話。係一把男人聲:「我想叫外賣。」
 
靚妹不停係咁點頭,意思話上個星期肯定就係呢個男人。靚妹回應道:「係,你想叫乜野食丫?」
 
男聲:「我想要可樂,巨無霸,仲有薯條。」
 
達叔用咀形同靚妹講:「問佢要唔要餐?」似乎要餐或者唔要餐,係達叔既情意結。
 


靚妹:「你要唔要餐呀?叫餐平D喎。」
 
男聲:「乜野餐?」
 
靚妹:「我地有麥樂雞、巨無霸、魚柳飽、脆辣雞腿飽、板燒雞腿飽、至尊漢寶、雙層芝士孖寶、足三兩、豬柳蛋漢寶,全部都可以配大薯條同中汽水,抵過你散叫架。」
 
男聲:「唔好,我都係要可樂,巨無霸,薯條。」
 
靚妹:「咁咪即係巨無霸餐囉,叫餐平D架,我幫你落餐啦!」
 


男聲:「做乜係都要我叫餐?」
 
靚妹:「咁真係平D嘛!你叫D野又同個餐一樣,做乜唔叫餐?」
 
男聲:「平又點?我又唔係冇錢,做人同做鬼一樣,唔係平兩蚊就一定要揀平個D野黎食,個個睇住個錢黎做人,做人重有乜意義?不如死左佢?我最後同你講一次,我要巨無霸、薯條同可樂,你唔好再迫我要餐,信唔信我殺左你先?」
 
靚妹驚到爆響口:「唔係呀,係達叔叫我問架⋯⋯」
 
男聲:「邊個達叔?」
 


達叔叫道:「喂,靚妹你講還講,做乜要開名呀!」我地個個都掩住個咀,都唔知笑好定唔笑好,鬼叫你係都要人叫餐,報應黎既。
 
「Sorry囉,咁⋯⋯請問送去邊呀?」靚妹一邊流住汗一邊問。
 
男聲:「上次個度。」
 
靚妹:「吓⋯⋯上次個度?咁⋯⋯即係邊度呀?」
 
男聲:「XX街6號13樓A座。」個地址就係上個禮拜Bobby一送冇回頭、連差佬搵上門都話錯既地址。究竟個地址點錯法?差佬話,個度最高七層,根本無十三樓。
 
皮蛋王見咁多人一齊聽個電話,膽大左,叫道:「喂,你個乜撚野地址呀?個度邊有十三樓呀!嗱細佬你咪玩野呀!玩電話好撚危險架!隨時死人架!」達叔、雞汁佢地都不禁樹起手指叫好。
 
男聲:「你⋯⋯好臭!你個身係咪有屎?」
 
皮蛋王叫道:「吊你咁都知?唔撚係呀?係呀,我個身就係有屎呀仆街!你再玩電話我就屎都送撚埋比你個仆街食!你估我地麥麥送做唔出呀!」


 
男聲深呼吸了一口氣:「我唔同你講,總之個餐就送返去上次個度,記得叫D醒目D既人送黎,唔好好似上次個個咁。」
 
佢講完呢句說話之後,我地成班都呆晒。佢咁講就證明左Bobby真係有送餐去到佢度。
 
Carmen到左呢個時候,終於都忍唔住叫左出黎:「先生,你係咪知道Bobby去左邊?求下你話比我知佢係邊,阿爸阿媽都好掛住佢呀!」Carmen講完之後,企都企唔穩,攬住我係咁喊,成個胸壓住我右手手臂,雖然呢D係我夢寐以求既事,但係咁既情況之下抽水,我又於心何忍。
 
男聲:「咦?原來你地成班人一齊接呢個order,以前真係未試過,今次真係好好玩。」
 
肥媽上前黎,仍然唔敢太接近成身屎既皮蛋王,離遠對住部電話叫道:「你放左個小朋友返出黎先,你要玩我地同你玩,你要乜我地都比你。」
 
男聲:「佢走左啦。」走左可以有兩個意思,一係真係走左,二係死左,兩個答案都只係證明,Bobby唔係佢度。
 
肥媽:「你咁樣冇意思架,你拉埋佢去陪你,呢個世界咪多個怨魂囉。」肥媽以前係大陸做問米,落黎香港之後,發覺自己廣東話唔掂,係香港請唔倒鬼上身,於是就轉左行去洗屎坑,原來靈界都有分語言國界。
 


男聲:「咁都好過我一個人孤伶伶。」
 
肥媽:「你有乜要求即管開聲,至多我叫皮蛋王晚晚送個巨無霸餐黎超渡你,咁得未先?」
 
男聲:「我要食個陣自己會打電話黎。」
 
肥媽:「咁你即係要一路玩落去啦?」
 
男聲:「係呀,咁多人陪我玩,我真係超開心。」
 
肥媽:「我怕你玩唔起呀,細佬!」
 
男聲:「好呀,睇下點!嗱,總之依家我落左order,你地邊個接都好,今晚一定要有人黎,又或者一齊黎都得,記得要黎呀,一陣見,嘻嘻⋯⋯」講完之後佢就收左線,電話筒只傳出「嗚⋯⋯」既聲音,臨尾個幾下笑聲,真係嚇撚死人。肥媽話,肯定佢係個細路,最多得十幾歲。
 
Jeana:「咁依家點好呀?我仲係處女,唔想死住呀!」乜唔係處女就可以死先?都唔知佢呢D係乜野邏輯,成班麻甩佬都用唔相信佢仍然係處女既眼神黎望住佢。


 
肥媽:「依家我地個個都聽左個電話,想飛個電話比人都黎唔切,而且一定要有人去。你地唔好諗住心存僥倖,到事情發生係自己身上既時候,得返你一支公個陣,就叫天不應叫地不聞啦!話你知,我同人問米咁耐,都係第一次同鬼埋枱講數,諗起依家都有D驚。」
 
皮蛋王:「吊,去咪去,洗死呀?我地咁大棚人,溶撚左佢都得啦!」佢一邊好激動咁講野,D屎仲係咁彈出黎,真係鬼都怕撚左佢。
 
就係咁,經過公投後我地一致決定,全部人一齊去,睇下究竟十三街攪乜鬼!臨行前遇上岩岩送完外賣返黎既七輝。七輝個人雖然柒柒地,係毒撚之中既毒撚,但個人冇心眼,算係一個好人。所以佢冇聽過個電話,都比我地拉埋一齊去送死,正所謂:多個人壯膽,多條女比你揀!
 
我地浩浩蕩蕩十個人送一個餐,應該係麥記係香港開阜以黎既記錄!而做做下生意落閘走左去,亦只有皮蛋王呢D仆街經理先做得出。