死亡名單:
 
1. 達叔
2. 皮蛋王
3. 雞汁
4. 偉哥
5. Carmen
6. Jeana
7. Sauna
8. 靚妹


9. 肥媽
 
 
去到差館,雞汁被帶到囚犯室,我地成班就坐晒係差館大堂。差館入面既人個個都好似好忙,見到馬頭角麥記常客禿鷹,佢係一名老差骨。達叔一喵倒佢就大大聲咁嗌:「禿鷹!禿鷹!」
 
禿鷹見係我地,走埋黎同我地講:「喂,我好撚忙,唔得閒同你班契弟吹水!同埋唔好大庭廣眾叫我禿鷹得唔得?我戴左仿真假髮架大佬。」
 
達叔:「你都on9,你估我地特登黎探你班呀?我地成班被你D伙記拉晒返黎,告我地非法集會呀!」
 
禿鷹:「吓!唔撚係呀?係麥記食野都算非法集會?咁大個人真係未撚聽過!等我過去了解下先,你地等等。」禿鷹當然唔知我地係十三街發生既事。不過原來佢處理緊既案件,同我地有好大關係。


 
佢問完D伙記之後,面青青咁走過黎,都唔敢正眼望住Carmen,就話:「冇事架啦,誤會黎啫,你地走得架啦!不過雞汁真係露械,公眾地方行為不檢,睇黎都有撚排攪。」
 
皮蛋:「喂,唔係喎,我覺得你D眼神有D閃縮喎!係咪有野瞞撚住我地?」
 
禿鷹滴汗:「邊有D咁既事,冇事啦走啦走啦,咪撚係度攪攪震就真!」
 
達叔:「唔係喎,我都覺得你有D野,你望住我,望住我先!」
 
禿鷹更加唔想望住達叔:「望住你做乜撚野呀?你估你周秀娜呀?」


 
Carmen好似都感覺倒D野,問道:「鷹叔,係咪同我細佬有關?」
 
禿鷹:「冇⋯⋯唔係⋯⋯唉,你唔好問啦,依家唔講得你知你住呀。」
 
Jeana:「遲早都會知架啦,你快D講啦。」
 
Sauna:「係啦係啦,快D講啦!」
 
群眾壓力之下,禿鷹帶左我地到另外一個房,似係審犯既地方,仲有攝錄機,個度靜好多方便講野,佢鬼聲鬼氣咁話:「尋晚,我地搵倒Bobby。」
 
我望望Carmen,見佢成個人呆晒:「跟住呢?」
 
禿鷹:「佢⋯⋯係你地上去個座舊樓個天井,表面上應該係失足從高處墮下,頸骨折斷導至死亡。佢比天井D垃圾遮住,所以冇人見倒,係臭到有人頂唔順報警先至發現,屍蟲都生晒出黎,應該死左成個禮拜。」
 


Carmen D眼淚已經起勢咁湧出黎。
 
禿鷹:「不過,尋晚驗屍同我講,佢唔係跌死。」
 
我問道:「咁即係點?」
 
禿鷹:「佢係SADS。」
 
達叔:「禿鷹你個冚家產,講講下廣東話你up乜春英文呀?家陣你英文好叻呀?你講返廣東話啦。」
 
禿鷹:「即係突發性心律失常死亡綜合症,驗屍官話,呢類病症既死者,尤其是後生個D,如果冇遺傳病或者隱性心臟病,好多都搵唔倒原因,Bobby就係其中一個。」
 
皮蛋王:「吊你,咁你講完咪即係冇講一撚樣?咁你搵唔搵得返家電單車呀?」
 
成班人怒睥皮蛋王,佢先至唔敢再問。


 
禿鷹:「不過我有一樣野可以肯定,Bobby死之前一定係見到D令佢好驚既野。」
 
我好似講左Sauna平時D對白:「真係架?點解既?」
 
禿鷹:「因為搵倒佢個陣,佢對眼仲係掙得好大,成身D雞皮都未退⋯⋯,驗屍話佢個陣應該係好驚,只有極度驚慌之下,雞皮先至會維持咁耐,而且⋯⋯」
 
達叔:「而且乜野,你快撚D講啦!」
 
禿鷹:「而且,佢隻手仲揸住D野⋯⋯」
 
達叔:「揸住D乜野呀?」
 
禿鷹:「陰司紙!」Bobby都算係幾負責任既員工,臨死都收埋錢先,只不過陰司紙兌唔返港紙⋯⋯。係呢刻我地真係冇野好講,但到底Bobby係點死?佢究竟見倒乜野?睇黎只有佢自己先至知。
 


禿鷹:「仲有,垃圾堆入面,搵倒張黃紙,寫左你地九個人個名係度⋯⋯。」
 
達叔:「皮蛋王,你咪成日話佢偷你架車既,依家你攞D錢返去啦,張張都過千萬,幾多部車都買倒啦,拎撚晒返去啦。」
 
皮蛋王打晒冷震,雙手合什:「Bobby仔,有怪莫怪,我講笑你咪當真呀!」
 
只見肥媽坐係側邊,一直粒聲都有出過,直到依家先至發言,好認真咁話:「講笑?呢舖真係唔講得笑,直頭係想笑都笑唔出。」
 
Sauna又黎王祖藍上身,係D咁嚴肅既氣氛底下,佢用撚埋用呢D語氣,真係想車巴佢嘆:「真係架?點解既?」
 
肥媽:「條靚仔睇黎好猛下,生前應該瀨左大獲野,死唔眼閉個隻,怨念好重先會變厲鬼。」講下講下,忽然覺得間房入面變得好凍下,D燈仲閃下閃下咁,個氣氛當堂good fit晒,完全符合我地依家賴晒野既環境。
 
忽然,有個兩粒花衝左入黎,喝道:「喂,細路,唔好係枱面玩燈!」
 
我地9個人9對眼望住個兩粒花,枱面上面跟本冇人,乜野細路?而係佢開門之後,盞燈就冇再閃。


 
禿鷹:「亞頭,咩細路呀?呢度最細係靚妹,冇細路喎。」
 
兩粒花卒下隻眼:「唔通我眼花?你地跟我出黎睇下。」
 
成班人跟住個兩粒花入左Control房,入面既閉路電視就係影住頭先間房,兩粒花將頭先既錄影播番比我地睇。呢獲真係仆街,電視機上面影住,我地9個人圍住張枱坐係度傾緊計,枱面上面有個身形大概十二三歲既細路,扒左係枱上面,一邊食緊薯條,一邊係度玩緊盞審犯燈,所以盞燈就閃下閃下,隻腳仲伸左皮蛋王幾腳,睇返皮蛋王個身,重有幾個細路仔腳印係度,臨尾佢重望左望個閉路電視一眼,好似望住我地係度笑⋯⋯。
 
加埋個兩粒花,我地10個人個個面都青撚埋。靚妹仲嚇到咸,因為個細路攪過佢部iphone 6plus,delete左佢幾個apps,同調亂晒D位置。我地全部企晒係度,都唔知郁好定唔郁好,又或者係嚇到殭硬郁唔倒。
 
我問禿鷹:「喂,你地呢度唔係拜關二哥既咩?」
 
禿鷹話:「吊,兵又拜佢,賊又拜佢,佢保祐得邊個?」
 
皮蛋王:「肥媽你又話識問米既?問下佢到底想點撚樣啦!」
 
肥媽:「呀經理,你問人人地唔一定答你架,何況佢係鬼!」
 
Jeana:「咁我地依家點算好?」
 
我:「唔通依家唯一可以做既,係睇住我地9個人,一個一個咁死⋯⋯」我真係好唔甘心,如果唔計屋企個Mary,我仲係處男黎。
 
又忽然,有個軍裝衝入黎Control房大叫:「禿鷹Sir,唔撚掂呀!」
 
禿鷹:「你就唔撚掂!我講左幾撚多次叫你地唔好叫我禿鷹!叫我King Sir!」
 
個軍裝好慌張咁:「唔係呀,禿鷹Sir,岩岩『塔』返黎個露體狂係囚犯室死左呀!」
 
岩岩個露體狂?咪即係雞汁?
 
死亡倒數開始!