死亡名單:
 
1.達叔
2.皮蛋王
3.偉哥
4.Carmen
5.肥媽
 
先後已經有三條人命因為一個外賣電話而冇左,如果我地唔做D野,我地呢度呢六個人可能都會繼續出事。
 


唔駛估咁多,係差館幫靚妹落案個陣,我已經見倒黃紙上面,少左Jeana個名。
 
佢地全部都冇留意到,因為靚妹唔係度,佢地已經好傷心,重要諗點同靚妹屋企人講個下最難。
 
我決定左,一陣自己去十三街。
 
紫雲大師好似估到咁,臨走前埋黎比左三個錦囊我:「你有事,就逐個打開佢,可能幫到你。冇野個陣就唔好睇。」
 
出左差館,我叫佢地返去先,我就上左架岩岩經過既小巴,揸車既又係上次好似林雪嗰個小巴佬。點知達叔幾廿歲人都跟得咁貼,上到黎仲喘晒氣:「你⋯⋯行咁撚快做乜呀?」成架小巴咁夜都坐滿晒,好在咁岩有兩個位。
 


我都費事掩飾:「Jeana個名唔見左!」
 
達叔:「我知。點呀,咁緊張,想上人呀?」
 
我:「尋晚上左啦。」
 
達叔:「哈,屌你丫,叻仔!」
 
通常男人講親性經驗呢樣野,都會一邊講一邊笑,仲會誇大話自己一晚做7次,次次成個鐘。但係我地兩個呢個時候根本都笑唔出,所以我照直話比佢知我得兩分半鐘,達叔話呢十幾年佢都只係打飛機,有時心理質素唔夠好個日重打唔出,其實我真係唔係咁想聽佢打唔打得出既野,不過為左表示我對佢既理解,唯有不斷係咁點頭。
 


同達叔講講下我地先發覺,架小巴都幾凍,好似頭先係麥記咁凍。而且成車人都冇人出聲。最奇既係,連平日乜撚都講一餐死既小巴佬林雪都係咁,佢唔出聲理論上係唔可能既事,所以成架車氣氛都怪怪地。
 
達叔都覺得有D唔對路,就同小巴佬講:「哈,咁夜都咁多人搭車,發達啦你!」
 
小巴佬仍然繼續揸車,粒聲都冇出。
 
我地兩個覺得好唔對路,唔敢再出聲,驚住好似紅VAN咁變到呢個世界得返我地兩個就真係扑街,淨係敢望住條馬路。
 
架小巴差不多去到十三街,達叔就一早叫定有落。點知坐係達叔側邊個女人同達叔講:「成十二點幾咁夜你仲去十三街?個到夜晚好猛⋯⋯。」
 
達叔同我都偷偷咁望左佢一眼,見到個女人塊面好白,又係白到青個種,仲見到佢條頸有條好深既瘀痕,就算講笑話佢係吊頸死都會有人信。再睇睇其他人,先發覺除左達叔側邊呢個女人,佢地個個都係成身濕晒,衫角仲滴緊水,連個司機都係咁。
 
個女人跟住又講:「唔信你睇下塊倒後鏡⋯⋯」
 
我同達叔視線都不自覺咁落左去司機頭頂塊倒後鏡到。


 
倒後鏡入面,淨係睇到我同達叔兩個,根本乜野人都冇。
 
女人:「不過你唔駛驚,你同我一齊,佢地就唔敢攪你架啦!」
 
我同達叔不顧一切咁衝左去車頭,挾硬打開車門,諗都唔諗就跳左落去,頭都跌穿埋。回頭見到成車人都望住我地,仲聽到有人大嘆:「咁都比佢地走甩⋯⋯」
 
後尾睇翻新聞先至知,個晚林雪架車唔知避乜野失事摌左落個海,連埋14個乘客無一生還,全部浸死晒,路面上仲有一條因為突然扭太而留低既車胎痕跡。警方驗車後證實小巴無任何機件故障可導致失控情況,司機亦無酒精超標⋯⋯。
 
達叔:「嘩,好撚在走得快!一車都係呀亞偉!」
 
我:「達叔,不如等我自己去,你搭返小巴返去先。」
 
達叔:「唔係掛?你仲叫我一個人搭小巴?我寧願同你一齊上去。亞大師比左幾個錦囊你嘛,同你一齊安全D。喂,整個錦囊黎扎下袋先!」
 


我比左一個錦囊佢,佢竟然依家就想開,我:「達叔,大師話有野先至開架!」
 
達叔:「依家都重唔叫有野呀?未到十三街已經一車都係個D野呀!」佢冇理我就照開。
 
錦囊入面得一張紙仔,寫住:「唔好將另外兩個錦囊比佢!」
 
達叔:「丫,屌你個大師丫,好撚野呀!」
 
講下講下,原來我地已經去到十三街。
 
平時呢個時候,十三街應該鬼影都冇隻,唔知點解今晚咁多人喺條街行黎行去,但係佢地好似都冇乜面部表情,唔知係咪日抖做野辛苦,要夜晚出黎抖涼。
 
達叔烘埋黎細細聲咁話:「喂,唔係呀,你睇佢地對腳⋯⋯無影架!」
 
雖然依家好夜,但都仲有街燈。街燈影照之下,見倒佢地真係全部都冇影,呢獲真係仆街,原來成街都係個D那渣野!


 
一下唔記得原來自己比大師開左眼,所以睇到D平時睇唔到既野。達叔都好D,淨係得一隻眼睇見,只要佢合埋個隻眼就冇事,不過我話佢撞到個D野我唔會話比佢知,佢先至將對眼打番開。
 
聽人講D那渣野鐘意附住側邊行,所以我地揀街中間行,除左有兩次幾乎比真車車死之外,又好似冇點比野攪過。
 
就係咁,我地順利去到Bobby跌落黎嗰座大廈樓下。