我立即著返衫,衝左落樓下搵車搭,唔知做乜全部人都跟住我一齊黎。
 
我:「喂,你地唔好跟住黎,我要去13A。」
 
皮蛋王:「屌你啦,我地麥麥送Team work黎架嘛!點會比你一個人去送死?」其實條撚樣見我同達叔上左去冇死落返黎,覺得都係同我地一齊安全D先跟埋黎。話時話我幾時變左佢條Team?
 
達叔:「阿偉,仲去嗰度?我仲未驚完呀!」
 
我點點頭:「唔好講咁多,截車先!」
 


禿鷹:「我當差咁撚耐,除左差館D鬼話,呢獲都算幾撚甘!」
 
長毛:「去收數咁耐都未撚試過咁多人!」
 
倪君子:「我都想返去睇下阿霞佢地。」
 
肥媽:「咁多年又唔返下去?你條老野都攞黎講!」
 
皮蛋王:「係啦,老野你咪撚跟住黎呀,費事一陣要孭你上七樓呀!你上去打飛機啦!」倪君子二仔底死跟我地都冇計。
 


等左冇耐就有架小巴駛埋黎,點知比個黑鬼上左車先,塞左係個門口度,猛咁同個司機講:「I give you ten dollars before…」
 
我地塞晒喺後面上唔到車,時間就一分一秒咁過去。雖然我唔肯定可以搵番Carmen,但係12點前去到13A,已經係我依家唯一可以做既事。
 
皮蛋王:「喂,司機,佢話比撚左十蚊你呀,你咪撚見人黑蚊蚊就呃9人得架!」
 
司機叫堅叔,個個都叫佢矇眼堅,出左名睇野唔清楚同記性唔好:「我邊有收過佢十蚊?no!no dollar!」
 
個黑鬼仲猛話:「I give you ten dollars before…」
 


長毛:「屌你老母,阿黑人你上車先啦,乜撚野ten dolloars before! You收唔撚返一陣me幫你收!我做collect money既!」
 
長毛講D咁既英文,條黑鬼又好似聽得明咁,安安靜靜搵左個位坐。上剩我同達叔兩個,堅叔竟然開車走左。
 
喂,我地未上車。
 
我急到咩咁,好彩又有第二加小巴。不過驟眼一睇,得番兩個位,屌,原來又係上次嗰架小巴。
 
達叔『蚊』住我猛叫:「阿偉,林雪呀!」
 
我:「我知,但係都要上,趕時間呀!」
 
林雪停正架Van仔喺我地面前,開埋車門等我地上車,入面嗰D⋯⋯個個都望住我地,好似第一次見咁。我睇見佢地D衫,同上次一樣,都重係滴緊水⋯⋯仆街,咁撚耐都唔乾?
 
一上車我就攞左張陰司紙塞比林雪:「唔駛找,十三街唔該!」


 
林雪睇一睇張陰司紙,有成千萬,竟然開口講野:「到左嗌有落得架啦,唔好跳車呀,會死人架。」屌丫,鬼咁撚好記性?
 
我拿拿聲坐返上次個位,留返上次個位比達叔坐,即係隻女鬼側邊個位。
 
隻女鬼望住達叔想開口講野,達叔就同佢講:「得嘞,我知你想講乜,你想話我同你一齊就唔駛驚佢地丫嘛!係咪呀?」
 
女鬼好撚愕然咁:「係呀⋯⋯你點知架?」
 
達叔大大聲靠嚇咁講:「你自己冇記性啫!亞叔有乜撚未見過?你安安份份同我坐係度,我心情靚嗰陣都仲可以畀你揸兩下春袋,如果唔係我要你灰飛煙滅呀八婆!」真係估唔到,人豁出去之後,可以去到咁盡。唔單止隻女鬼之後粒爹都唔敢出,其他十幾隻成程車都靜撚過鬼,淨係敢望住個窗扮睇風景,呢D可能就係傳中既『嚇鬼』!
 
到左十三街,達叔嗌有落,林雪真係乖乖咁停車比我地落,落車之後仲成車鬼同我地揮手再見,之後就成班圍住林雪話要分錢,其中一隻仲比另外幾隻成隻撕開,頭手腳都甩撚晒,場面都幾恐怖,睇黎鬼同人一樣,都係貪錢。
 
去到十三街嗰座大廈樓下,一個人都冇,鬼影都冇隻,皮蛋王佢地明明早過我地上車,點會遲過我地到?會唔會發生左乜野意外?
 


我望一望隻錶,已經係11:55,仲有5分鐘就12點。我唔理咁多,係咁衝上去。好快就去到七樓,依家喺我前面既,就係7A。不過睇返週圍既環境,的確同尋晚13A係一模一樣。
 
度門仲係虛掩,睇黎間屋比倪君子掉空之後被人爆開左,我好輕易就可以將佢推開。屋入面既佈局,同尋晚一樣,不過四週圍就多左厚厚既灰塵,同地下有好多用過既針筒喺度,相信經常有道友喺呢度叉電。
 
我入左睡房,睇見睡房上面仍然懸掛住嗰條亞霞用黎吊頸用既繩。
 
再睇前面張書枱,仍然放住佢大仔聽過既電話。
 
我再入廚房,終於都見到嗰個被石屎封左既灶頭。
 
我喺個灶頭前面猶疑左一陣,會唔會好似尋晚咁,打爆個灶頭之後,隻女鬼會爬出黎?
 
我下意識咁拎起左仍然放喺地上面既搥仔,就好似尋晚咁,一搥一搥打落個灶頭個度。我明明好撚驚,但點解要咁做?因為我尋晚見到,石屎表面有人伸左D手出黎,我覺得入面有人未死!嗰D,係Carmen伸出黎求救既手指,入面嗰個,就係Carmen!
 
達叔上到黎,見我好似癲左咁係咁打個灶頭,苦口婆心咁同我講:「亞偉你清醒D啦!點解你份人成日都咁唔清醒?你身為一條毒撚,幾日之內食左兩條女,已經羡慕死好多同類架啦!雖然佢地都香左,但係Carmen都唔會喺入面架?家陣我地撞鬼,唔係撞異能特工呀偉哥!」


 
我:「你收聲!打開佢,冇咪冇囉!」
 
達叔:「喂,唔係冇就算架!你唔記得尋晚你打開佢之後,走左隻野出黎呀?」
 
我:「咁仲好,等我親口問佢Carmen喺邊!」
 
達叔:「丫,屌你丫,依家D後生仔真係唔聽人講野⋯⋯。Carmen喺入面我切條賓周比你都仲得!就算真係喺入面,都得返條屍啦!正常人可以困喺入面幾撚耐呀?總之一陣隻野走出黎,你攪撚掂佢,咪指意亞叔呀!頭先上嗰㗎小巴已經差不多嚇撚死我啦!」
 
終於,我將個灶頭打爛左,喺破開既缺口入面,好黑乜都睇唔清,於是我開著部手機既電筒照入去。灶頭入面,我隱約見到有個人,係一個女仔,佢比一大堆人骨埋住⋯⋯佢面色好蒼白⋯⋯不過佢未死⋯⋯我好肯定佢未死⋯⋯因為佢用對好無助既眼望住我⋯⋯相信佢精神受左好大既刺激⋯⋯
 
我喺地下執左把刀片比達叔切賓周,因為,灶入面既人,就係我要搵既Carmen!