今晚係我地收到優惠券既第一晚,大家商量過都一致同意,唔好浪費每一個去十三街講數既機會,因為7日之後唔知會發生乜野事,而且大師有百幾張優惠券未派出,第7日肯定瓜老襯,所以我地決定今晚就去十三街。
 
出發去十三街既人包括我、達叔、皮蛋王、肥媽、大師、阿粒、超儀、華Dee、Cecilia同豬西,都成10個人。大師幫佢地全部免費『開眼』,等佢地都可以見到D那渣野。
 
我地又係截返林雪架小巴,不過得兩個位唔夠位坐,達叔就上車同佢地講:「你地邊幾個肯落車喺麥記食住薯條等下一轉既,每人一千萬!即磅!」結果差不多全部落晒車,達叔排住隊咁派陰司紙比佢地,可憐阿成要一個人招呼成十隻鬼,有幾隻仲係度攪薯條個炸爐,炸到皮開肉爛,變左油炸鬼,嚇到阿成差D死。
 
超儀同亞粒第一次見鬼,睇黎都驚驚地,痴住大師唔肯放。相反兩個拔萃妹Cecilia同豬西就好似好開心咁話今次真係增廣見聞。而華Dee就見親鬼都問候人老母,睇黎佢對火爆既死仲耿耿於懷,其實火爆死可能真係關人鬼事,因為大家都睇見係佢自己勾跌自己。
 
上到車,達叔自動坐喺隻女鬼隔離,見到女鬼又想張開個口講野,達叔就話:「阿邊個你悶唔悶架?我幾廿歲都冇你咁長氣,次次上車都講嗰句咩同你一齊,你清醒D啦,你仲年輕,我唔岩你架,搵過第二個啦!」
 


女鬼:「唔係講呢D⋯⋯你上次話畀我揸兩下春袋,真定假?」我地聽完之後,有賓周既都襟實個春袋唔敢放手。
 
已經係夜晚12點,十三街又開始『人』來『人』往,依家先留意到,佢地好似旺角西洋菜街D街頭表演者,喺度表演自己係點死,有D啪丸死,有D比人斬死,有D跳樓死,有D吊頸死,有D仆街死,最多鬼圍住睇既,係做愛做死嗰個攤位⋯⋯總之幾咁離奇既死法都有,不過佢地都有一個共通點,表演還表演,都係唔敢接近嗰座有13樓既大廈。
 
我地今次係黎講數,但都要搵到對口至有得傾,所以無可避免要同佢地溝通下,睇下佢地幫唔幫到手。
 
大師帶頭走埋去個吊緊頸既女人度,問佢:「唔好意思,阻你一陣⋯⋯」
 
隔離睇緊D人即刻陰聲細氣咁話:「喂,皇氣,小心D!」原來佢地叫大師呢類人做皇氣,等於我地既差佬。
 


睇見吊緊頸個女人成塊面冇晒血色,對眼重流緊血水出黎,都幾撚恐怖,佢聲沙沙咁,明顯係吊頸吊到喉嚨唔多舒服:「咩事?」
 
大師:「冇,我地想問下關於嗰座大廈D野!」大師指住十三樓座大廈。
 
點知個女人一聽到係嗰座大廈,即刻解開條繩落返黎:「嘩,屌丫,你唔好問我,我乜都唔知!」雞咁腳就走左去,乜鬼都仲怕死?
 
皮蛋王:「屌,等我黎!」
 
皮蛋王走埋去做愛做死個攤位,推開左上面個男鬼,自己騎左上個成身光脫脫既女鬼度:「喂,有D野問你,你好老老實實咁答我,唔係聽含撚都得嘞!」
 


隻女鬼望一望大師喺度:「你咪問囉,駛乜咁惡?差佬大晒呀?我都係喺度表演下娛樂下大家啫,唔係你估晚晚喺度比人砌好過引呀!」
 
皮蛋王:「你知唔知嗰座大廈發生過乜野事?點解個撚個講親都耍手擰頭唔想提?」
 
女鬼:「緊係啦,你地唔係唔知呀?十三街嗰座野不嬲都最猛架啦!以前都好D,入面班友好少出黎,早排唔知邊個連續幾晚嘈親佢地,攪到佢地唔夠瞓出晒黎,累埋我地呀!我依家晚晚要比佢地班人砌幾獲先有得瞓呀仆街!」
 
大師:「咁佢地到底係咩人?點死?幾時死?」
 
女鬼:「好耐啦,冧樓丫嘛!聽講係全部瞓瞓下嗰陣死既,成座樓D人死晒,死好多人,最慘係仲有D到依家都仲以為自己未死⋯⋯。」
 
達叔:「呀姐姐,咁佢地死左都唔關我地事架,點解佢地要出黎攪我地呀?」
 
女鬼:「佢地同亞霞好熟架,話亞霞一家死得好慘,要幫佢報仇咁話!」
 
肥嗎:「死得好慘?乜佢老爺同D仔唔係阿霞殺既咩?佢最後自己上吊架嘛!」


 
女鬼:「阿霞自己同你講架?」
 
肥媽:「咁又唔係⋯⋯」
 
女鬼:「咁咪係囉,真相真係搵鬼知!我地都唔知架,都係聽返黎,佢地一家人唔同我地傾計架,而樓下個幾層⋯⋯好猛,我地都唔敢走埋去,更加係冇計傾啦。喂,我都係唔同你地講咁多,費事一陣以為我係二五仔,到時就麻撚煩。我勸你地冇乜野都最好唔好埋去聊佢地,一陣佢地發起惡上黎,成個土瓜灣都唔撚掂呀!」講完佢衫都唔著就光脫脫咁走左去。
 
肥媽大叫:「喂,咁搵邊位傾你都應該知掛⋯⋯」但係隻女鬼都冇理到佢。
 
望返上座大廈,隱約睇到二至六樓成排窗邊都有人企左喺度,佢地望住我地,郁都唔郁下,就好似睇我地夠唔夠膽上去咁。
 
達叔:「嘩,好叠馬喎,重上唔上去呀?」
 
華Dee:「駛撚驚!上啦!」
 


阿粒:「我同意。」
 
超儀:「有大師喺度,唔驚掛?」
 
Cecilia:「我都覺得應該上去,唔係永遠都唔會知道真相。」
 
豬西:「Yo!贊成!」
 
肥媽:「既然個個都話去,咪去囉!」
 
皮蛋王:「為左麥記,呢舖仆街就仆街啦!」
 
我:「你幾時變得咁為公司著想?」
 
大師:「既然意見一致,咁仲等乜野,下集見!」