上到二樓,同上次一樣,好多度門都係半掩,喺間屋入面裝裝下,大師就解釋:「人怕鬼三分,鬼怕人七分,唔好以為淨係得我地驚,其實佢地仲驚,加埋我喺度,嘿嘿!」佢緊係唔記得自己攞左成叠優惠券件事,仲喺度扮有型。
 
豬西:「唔係喎大師,我覺得自己怕佢超過七分⋯⋯」
 
大師:「D豬西例外!」
 
我地行左入二樓條走廊,諗住逐家逐戶去搵個對口出黎講數。入左第一間,即係2A,點知入面一隻鬼都冇,一路去到六樓都係咁,頭先明明喺街外面見到D單位窗邊有野,忽然間好似唔知去晒邊。
 
超儀:「大師,咁即係點呀?」
 


大師流晒汗:「即係話⋯⋯佢地連傾都唔想傾!」
 
我:「上13A睇下!」
 
達叔:「吓,又上去?唔好掛?」佢緊係又諗返起阿霞對腳。
 
我冇理佢地咁多,自己一個跑左上去,我聽到佢地喺後面D腳步聲,應該係跟住上緊黎。
 
去到13A,過左冇耐達叔就到,其他人都唔知去左邊,唔怪之得Bobby點名叫我地兩個上黎,可能得我地兩個咁黑仔先上到黎呢個單位。
 


同上次一樣,個灶頭已經比我打爆左。
 
灶頭前面,有個孖辮女踎喺度,將D優惠券放入灶頭入面燒。佢知我地上左黎,擰個頭過黎望住我,我睇見佢個樣,加埋條孖辮,其實都係一個幾可愛、個樣幾甜既女仔黎,如果佢隻眼唔係跌左落地既話⋯⋯。
 
達叔:「阿妹,你跌左野⋯⋯。」
 
佢執返隻眼放返入眼框入面,好似冇事發生咁:「唔該叔叔。」
 
達叔:「唔駛客氣,妹妹你叫乜野名?」
 


妹妹:「我叫周秀娜。」
 
我同達叔你眼望我眼,簡直唔敢相信自己對耳,一望佢個對未發育既胸脯,就知佢講大話。
 
達叔:「其實你叫乜野名都好,唔緊要,叔叔可唔可以問你D野?」
 
秀娜:「你問啦!」
 
達叔:「我想問⋯⋯你手上D優惠券邊度黎架?」
 
秀娜笑左笑:「咁你咪即係問,D外賣電話邊度打黎一樣?」
 
連外賣電話佢都知,睇黎今次冇搵錯人,不過最估唔到搵到既係一個未發育既周秀娜!
 
達叔:「咁不如問下D外賣電話先,到底邊個打黎?」


 
秀娜:「霞姨個大仔打既。」
 
達叔:「佢個大仔⋯⋯」我地兩個即刻諗起,係個頭跌左落地,隻手仲揸住個電話嗰個後生仔,睇見達叔隻手震到好似柏金遜就知佢有幾驚。
 
我:「咁點解要打呢D電話?」
 
秀娜:「佢大仔話好掛住爸爸,想聽下爸爸把聲,佢記得佢爸爸成日自己聽外賣電話,所以咪趁霞姨唔係度嗰陣打,碰下運氣。」佢老豆咪即係倪君子?倪君子嗰檔好似係快趣送,條靚仔會唔會打錯電話?
 
我:「但係⋯⋯接電話既人會死架,佢知唔知架?」
 
秀娜:「佢話死左仲好,可能可以見到佢爸爸。」
 
達叔:「佢知唔知自己打錯電話呀?佢老豆唔係依個電話呀!」佢仲打左皮蛋王手機,攪到我地成班人一齊接左呢個死亡電話,最後連雞汁、靚妹、Jeana同Sauna都死埋,Carmen都差D出事。
 


見到秀娜倔住我地,D指甲伸晒出黎,頭髮都飛起晒,對眼重流埋血出黎,好似嬲我地怪佢咁:「我點知啫,個電話又唔係我比佢。」
 
達叔滴住汗咁話:「緊係唔關你事啦,唔好勞氣先。係呢,咁D優惠券呢?」
 
秀娜見我地聲氣好返D,縮返D指甲入去,抹左D血講:「霞姨自己搵廠印既。」
 
吓!下面仲有印刷廠?但係都冇理由搵到麥玲玲影相架?
 
我:「咁⋯⋯霞姨點解要搵人印呢D優惠券呢?」
 
秀娜:「佢話想了左件心事,等幾個仔可以投胎做人。」
 
達叔:「乜野心事呀?阿霞有心事可以同我講丫?我實幫佢架!」人地淨係用隻腳撩過你條頸一下咋,達叔你係咪有咩誤會?有時D老毒物諗野真係幾難理解。
 
秀娜:「佢話要搵殺佢既人報仇!」


 
我:「咁同麥記有乜關係?」
 
秀娜:「咁我又唔知啦。」
 
達叔:「係呢阿妹,咁阿霞印左幾多張優惠券呀?」
 
秀娜:「都成千張架,佢話平D喎,攪到我地呢幾層樓D人晚晚出去幫佢派,派到朝早先返。」
 
我:「咁⋯⋯你地派左幾多呀?」
 
秀娜:「差不多派晒啦!仲有個傻佬前後來回十幾次,每次同我攞一張,以為我唔認得佢!乜依家D人咁貪心?」佢講緊既係大師⋯⋯。
 
秀娜:「聽麥玲玲師傅講,呢個係佢師兄黎。」師兄?原來紫雲大師有個咁出名既師。
 


達叔:「咁我又唔明,佢點知攞你優惠券嗰個人係大師先?都未見過佢!」
 
秀娜:「麥師傅話香港冇幾多個呢D人喎。」咁又係⋯⋯。
 
我:「咁點解你喺度燒D優惠券既?」
 
秀娜:「我後尾先至知原來接到既人會死,我唔想害人,咪燒左佢囉!不過派左出去既,冇一千都八百架啦!」
 
達叔:「講返轉頭先,乜阿霞唔係自殺既咩?」
 
秀娜:「我點知喎,你咪自己問霞姨囉。」
 
達叔:「咁一係你叫阿霞出黎,等我地三口六面問清楚佢!」
 
秀娜指住我:「霞姨嗰晚咪比佢孭走左囉!」今次真係仆街,原來我唔單止孭走Carmen,仲孭走埋阿霞!唔怪得達叔嗰晚嗌到劏豬咁自己走左去,原來我真係瀨左野!達叔聽完秀娜講,仲用埋D好撚惡毒既眼神黎望住我,好似我攪佢條女咁。
 
達叔:「咁佢幾個仔同佢老爺呢?」
 
秀娜捽捽隻眼:「後尾有個笑得好淫既阿伯黎,幫佢地打左場齋,帶走左佢地囉,話返屋企喎。喂叔叔哥哥,天光啦,我唔同你地講,我要瞓覺啦!你地快D帶番D朋友走啦,佢地來回行嗰七層樓行左九百幾次,就黎又死人架啦!費事一陣你又怪我整死佢地。仲有,一陣我地D鄉里派完傳單返黎,你想走都走唔到架啦!」
 
睇黎,要知道成件事究竟係點,一定要搵阿霞傾,阿霞,即係Carmen!