背後傳黎Carmen把聲,但係佢依家究竟係Carmen定係阿霞?呢個時候我已經緊緊握住串佛珠,如果佢係阿霞,我會毫不猶疑一個車身之後狠狠地鞭9佢!
 
Carmen:「阿偉,你地咁夜既?咩事呀?」
 
我擰轉頭望一望佢,好在,佢係Carmen:「冇⋯⋯黎睇你囉。」我發覺自己原來講大話真係唔斬眼。
 
Carmen:「都唔駛咁夜架,你都要瞓覺!唔瞓聽日咪冇精神返工囉。」So sweet ……其實我呢幾日有撚返工,日日唔係麥記就十三街,睇怕以後都唔駛返。
 
我:「咁你呢?你又咁夜走出黎?你唔驚⋯⋯」我係想話,你唔驚嗰邊班友仔咩?
 


點知Carmen指住佢地:「佢地?佢地話肚餓,我咪叫野比佢地食囉。」
 
我地個個都聽到目瞪口呆,叫野比佢地食?即係話Carmen同佢地好熟?佢到底知唔知呢班人原本係瞓喺殮房入面既⋯⋯。
 
我:「咁⋯⋯咁你叫乜野比佢地食?」
 
Carmen:「早幾日出面有個女仔派優惠券,我攞左D,佢地又咁多人,咪叫左十幾個餐比佢地食囉。」
 
我地見班友仔圍埋一圈一圈咁食緊野,我喺佢地腳與腳之間,見到好似有個人瞓左喺地下到,再望真D,屌丫,原來係早幾日喺馬頭圍麥記聽故,後來話去佐敦應徵既學生哥黎!佢送黎個餐就掉左喺地下度,而嗰班帶住紅色bar-code手帶⋯⋯佢地食緊既⋯⋯係瞓喺地下既學生哥!
 


而出面一圈一圈圍住既⋯⋯係唔同既麥麥送外賣仔黎。
 
皮蛋王震晒咁話:「喂⋯⋯唔撚掂呀⋯⋯成十幾個瞓左喺度比佢地食緊⋯⋯」
 
達叔:「你估⋯⋯你估佢地死左未?」
 
皮蛋王:「屌你⋯⋯你鍾意咪過去問下囉⋯⋯」
 
阿粒:「全部死晒架啦⋯⋯你睇,D腸都抽晒出黎⋯⋯」
 


超儀:「阿粒你唔好講啦,好驚呀!」
 
肥媽:「喂,咁⋯⋯點算呀⋯⋯仲搵唔搵阿霞呀?定係走呀?搵人揸下主意啦!」
 
見到嗰班野食人呢一刻,我幾乎嘔出黎:「Carmen,你叫左乜野?點解會咁多個麥麥送外賣仔黎?」
 
Carmen:「我分別喺唔同分店叫既,油尖旺佐敦太子,都有十幾間,唔係點夠佢地食呀?」
 
今次真係大撚獲!聽日頭條都似。
 
我:「咁⋯⋯你用佐D優惠券⋯⋯冇事咩?」
 
Carmen:「咪傻啦⋯⋯我點會有事呀⋯⋯嘿嘿⋯⋯。」聽見Carmen冷笑左兩聲,出邊班人食食下都停晒手望返過黎,好似發現呢邊有D未經防腐處理過既新鮮肉類咁,企起身慢慢行埋黎我地度⋯⋯。
 
皮蛋王:「走啦,屌你,班撚樣食人架!」佢一講完,我地就慌不擇路係咁跑,我一邊拖住Carmen跑,一邊回頭睇,一陣間已經唔見晒佢地,皮蛋王就死跟住我。


 
其實我都唔係好熟路,不過唔知點解次次唔識路個陣我都會走去呢度──搭嗰架電梯!電梯岩岩開門,我地三個都唔理咁多,衝入電梯猛襟刪門制,好在班鬼最後都入唔到黎。
 
皮蛋王:「嘩,屌你丫,嚇撚死人!喂阿妹你又唔係啦,做乜撚要分開咁多間叫,累死晒我D兄弟?」
 
Carmen:「唔知呀,張張優惠券後面印住個電話都唔同,我以為每一間只可以叫一個餐,咪打左去咁多間囉,點知唔係總機接喎⋯⋯但係我都唔知,佢地會食左送外賣黎D人架!」
 
我:「咁⋯⋯你到底知唔知佢地係鬼?」
 
Carmen:「我⋯⋯」佢都未講,電梯門就喺UG5打開左。
 
我地對住既,係一條好長既走廊,好長好長,長到⋯⋯我地都睇唔見盡頭。
 
走廊兩邊都有好多度門,有好多間房,而每間房上面都寫住個名同編號,睇黎呢度應該係醫生用既地方。
 


行左幾步,就有一間房門打開左,門口個牌寫住Lemon,走出黎既係,係一個三十上下年紀,樣貌身材俱屬上品既女醫生,即係我上次見到有紅色bar-code手帶,最後我比撚埋皮蛋個電話佢嗰個,我諗Lemon就係佢。
 
佢一見我就好開心咁同我講:「你黎搵我嗱?我頭先打電話比你,你好似話想要偉哥,我幫你留起左啦,一陣間我地可以用⋯⋯聽你把聲仲有D『盟盟』地,係咪感冒呀?」睇佢怕怕羞羞咁既表情,加埋佢個靚樣,如果唔知佢係嗰D野,都真係會中招。
 
但係當佢一留意到Carmen喺度嗰陣,佢就好似好驚咁,le埋左喺皮蛋王後邊唔敢出聲。
 
點知皮蛋王同人地三九唔識七,竟然伸手搭住人地個膊頭,唔知做乜撚仲成個則卷千平咁縮起個肚腩話:「頭先聽電嗰個係我!」我猛用咀形同皮蛋王講佢係鬼黎,點知佢彩都唔9彩我,睇佢個撚樣緊係鬼迷心竅,撞邪嗰種。
 
Lemon好似仲驚過見到Carmen,成個彈開左:「吓,乜頭先⋯⋯係你?」講完就向皮蛋王上下打量一番。
 
皮蛋王:「緊係我,D花靚仔把聲邊有我咁磁性!唔駛怕,我好溫柔,出面D人傳我揸到D小姐瘀晒,謠言黎既,唔好信佢,我最出名就係化骨綿掌,柔軟到你唔撚信,試過你唔會轉用第二隻。」出動埋化骨綿掌,條撚樣今次真係骨毒上腦。
 
Lemon望左皮蛋王兩望,嘆氣咁話:「唉,肥就肥D,不過好又一餐,唔好又一餐⋯⋯,姐姐你就好啦,執倒件荀野!算啦,肥佬你跟我黎。」講完佢就扯住皮蛋王條呔入左房,皮蛋王臨入去仲舉起左勝利既手勢⋯⋯佢真係唔撚知個死字點寫!
 
我唔知呢個Lemon叫邊個做姐姐,呢度得個點睇都只可以做佢妹妹既Carmen同我。


 
不過,過左一陣我就知點解。