個小丑企喺我面前,只要佢揮一下手上面把刀,下一秒可能我已經會步Shawn既後塵,身首異處。
 
喺呢一秒,我諗左好多野,不過都係D on9野,而最on9既係,明明知道眼前既人,已經唔係Carmen,我都唔敢去承認呢個事實,係Carmen已經被阿霞鬼上身既事實。
 
頭先既片段,好明顯係講緊倪君子同阿霞幾十年前嗌交嗰一幕,不過有幾樣野我諗唔明。倪君子話阿霞殺左三個仔之後自殺,但上次Edison段片好似想同我地講,佢地係比個小丑殺,唔通倪君子都唔知佢老婆老豆同D仔點死?點解個小丑會同阿霞個大仔阿淘咁熟?乜佢唔係殺佢地既人黎?阿淘話搵人殺佢老豆,搵邊個?小丑?阿霞叫佢唔好黐埋嗰班人度,嗰班咩人?點解阿淘話諗下野阿霞都咁驚?
 
諗得野多真係會諗壞腦,不過有時就係逃避現實最好既辦法。喺我做乜諗野呢一刻,恐懼離開左我,反而我可以睇清楚眼前既形勢。
 
小丑一直以黎都係想將一D野話比我知,可能因為佢唔識廣東話,又見我同達叔玩過做動作猜字遊戲,所以照辨煮碗。咁點解阿霞唔直接同我講?不過又難怪,佢一時又阿霞,一時又Carmen,精神分裂咁,都唔知信佢邊句好。但係如果只係想講一D野,咁點解又要殺咁多人?
 


小丑用手指指Carmen,再用刀喺自己條頸劃左一下,陰陰濕濕咁笑,唔知佢做乜撚野。跟住佢指指我,張開5隻手指,伸埋條利出黎,屌呢句我明,佢應該係想話,我得返5日命!
 
佢推開度門,又撞撚到我,呢下我真係慶慶地幾乎想還拖,但係比面佢揸住把10寸老牛所以就放佢走。到我回頭再望返Carmen嗰陣,我發覺,原來我地兩個已經企左UG5條走廊度,仲見到好多屍體瞓左喺地下,有D個口仲塞住一渣薯條,成面茄汁,情境都幾恐怖。
 
冇耐就聽到皮蛋王喺隔離房慘叫既聲音,佢褲都未著好就吊吊fing咁喺房衝左出黎,身上面嗰D都唔知係血定茄汁,面青口唇白咁話:「屌你條女原來係死屍黎呀仆街!」我一早同你講撚左啦!
 
點知佢都未講完,見到達叔又係褲都未幽好就喺隔離房一支箭咁衝出黎,一路喊一路叫:「肥婆呀仆街!」肥媽就跟住達叔之後喺房行出黎,佢嗰兩個水殻咁大既胸圍未扣返好,仲春風滿臉⋯⋯呢均真係要搵碌柚葉洗眼!
 
睇黎唔淨止我一個,每個黎到UG5既人,都會做出一D反常既行為。
 


醫院將殮房屍變同食薯條既消息隱瞞,我地亦冇再提皮蛋王姦屍呢件咁令人髮指既事。不過達叔食左肥媽係事實,大家都好為佢婉惜,身為當事人既佢日日以淚洗面⋯⋯。
 
至於麥記死左十幾個外賣仔呢件事,終於都爆發出黎。
 
第二日,各大報章頭條已經瘋狂去報導麥記外賣仔集體死亡呢件事,佢地喺高登討論區搵到件事既來龍去脈,知道事件係出自馬頭圍分店,所以一大班人成日就捕左喺度。
 
禿鷹坐埋我地度:「屌你老母,今次死咁撚多人,點解釋?」
 
點知無記電視個記者妹鬼咁好耳,走埋黎問:「亞Sir,你可唔可以講清楚d,你屌緊既係邊個既老母?而佢老母又同今次麥記外賣仔集體死亡事件呢件事有咩直接或者間接既關係呢?」個記者妹講完就隊左支咪埋去比禿鷹,之後仲成班傳媒圍左埋黎,場面都幾虛冚。
 


禿鷹chok chok個喉嚨就話:「咳咳⋯⋯嗯,我地警方係高度關注今次既事件,首先唔好講邊個既老母先,未有充份證據既時候,D老母係無罪既,我地唔會妄自猜測,咁對被懷疑既老母好唔公平。即係咁講,唔通我地呢度有人喺QE姦屍,我又話比你地知,等你地去搔擾佢咩?」D記者嘩然,係咁追問邊個姦屍,我地冇出聲,不過就一齊望住皮蛋王,結果成班記者就圍左埋佢到。
 
禿應見班記者走開左,細細聲同我地講:「呢次真係好撚大獲,尋晚除左呢十幾個外賣仔,仲有四十幾人香左,消息暫時未供開,不過好肯定佢地既死全部都係同優惠券有關。」四十幾人唔係小數目,睇黎今次會係香港開阜以黎死人最多既靈異事件。
 
Cecilia:「其實公開件事未嘗唔係一件好事。」
 
禿鷹:「點解呀?」
 
Cecilia:「起碼佢地唔會即刻用張優惠券,仲可以生存多幾日。再唔係,好似網友咁建議,一路傳落去,每人有7日,唔好比佢停,咁就冇人會死。」
 
肥媽:「明知會死人,有邊個願意接丫。」
 
阿粒:「我同意Cecilia咁講,公開佢,等大家都停止使用,降低死亡率先再諗辦法。」
 
超儀:「我贊成。」


 
Cecilia:「好在既係,估計派出左一千張,每張十二格,如果每次叫外賣都同時死兩個人,即係話最多會死二萬四千人。如果唔用唔送比人,而又有好多好似大師咁貪心一個人攞左十幾張既話,咁死既人又會少好多。就算會造成恐慌,點計條數都係叫D人唔用著數D。」
 
達叔:「既然係咁,就叫皮蛋王吹大D啦!」
 
達叔走埋去皮蛋王度,吱吱唚咁同佢講左一輪,見皮蛋王點點頭,好似明白咁,整好條麥記呔就同D記者講:「各位傳媒朋友,嗱關於姦屍既事,稍後我再同大家分享,依家有單勁料要爆,想各位朋友幫手傳開去既!」
 
蘋果記者:「仲有野勁得過姦屍?肥佬你咪點9我呀!」
 
皮蛋王:「係咁既,早幾日我地麥記出左張優惠券,係用麥玲玲師傅做大頭既,淨係夜晚先有得派,收到既幸運兒有福嘞。只要保留完整有十二格既優惠券,黎到我地馬頭圍分店登記,一個禮拜後如果你唔撚死,只要你出示呢張優惠券同核對身份,就可以終身免費任食,冚家黎食都得。如果只係手持其中一格優惠券既,都唔緊要,可以免費任食一年,最後仲會有壓軸大抽獎,名貴獎品包括洋樓番狗、金銀珠寶、現金帛金、男人女人,差不多乜撚都有,老幼咸宜。所以呢,有優惠券既朋友,唔好用住呀,亦唔好送比人,快D黎登記先啦!」
 
經濟記者:「咁著數?你D生意點做呀?」
 
皮蛋王:「唔到你唔信,就係咁著數,我地麥記咁大個集團,有乜撚野送唔出呀,總之你唔撚死就得!呢D叫回饋返D比你地,隨口up左咁多都係好撚小野啫,個Jackpot都未度好,仲撚金呀!」
 


信報記者:「嘩,如果係咁,我都去括張返黎囉!」
 
D記者你一言,我一語,睇黎呢個Campaign都會幾受歡迎,緊係啦,任食喎⋯⋯唔死既話。
 
皮蛋王岩岩講完冇耐,佢部手機就響起黎,佢用免提黎聽,原來係麥記香港區負責人,人稱大家姐:「皮蛋王,我想地幾時出過呢D優惠券?又幾時出過呢D送車送樓既Campaign?我都好想知個Jackpot係乜野。最重要既係,點解我地麥麥送會死咁多人?麻煩你上一上黎寫字樓解釋比我知!」