「點解會咁架?」呢句野當然唔單止我想問,相信係在場每一個人都想知道既事,只不過佢地嗰陣講唔出聲。
 
當佢地個個都淨係望住吊住喺廁所天花既Cecilia同豬西嗰陣,我留意到佢兩個隻手都揸住一張剪出黎既優惠券,而優惠券上面既銀色封條,已經被人擦走左,而佢地封條上面顯示既數字,係 -1 。
 
我:「你地睇下佢地隻手揸住D乜野⋯⋯」佢地呢個時候先留意到佢地手上面既優惠券。
 
阿粒:「係 -1,即係咩意思?」
 
超儀:「會唔會係講緊,佢地⋯⋯尋日已經死左?」佢呢個諗法實在太不可思議,令我地個個都由個心入面驚出黎⋯⋯。
 


皮蛋王:「冇理由丫,條靚妹咁醒目,一早將D優惠券派晒比我地,佢又點會自己搵番張黎擦咁on9?」
 
超儀:「話唔定佢根本就唔信呢樣野⋯⋯佢一直都當係遊戲⋯⋯」
 
阿粒:「但係佢都知道會死人個喎⋯⋯」
 
肥媽:「佢頭先話有解決辦法,會唔會比人⋯⋯滅口?」
 
達叔:「仲可能係尋日已經比人滅左口⋯⋯」
 


大家姐:「你地唔好講咁多住,報警先!」
 
我趁佢地唔為意,偷偷咁將Cecilia擦左封條既優惠券收埋,我唔知張優惠券仲會唔會繼續有效,累9死埋我,但係我好想知道,優惠券上面既數字,係咪真係會隨時間而改變。不過之後驗屍都證實左,佢地兩個係尋日已經死左,而今日一直同我地一齊既,係兩個已經死左既人,可能大家當時都冇為意,佢地條頸既瘀痕⋯⋯。
 
差佬黎之前,我仲收埋左Cecilia部iphone,諗住除左可以拎去先達放之外,仲可以喺佢電話入面搵到D蛛絲螞跡,幫我地去解決呢件事。
 
唔知點解,次次出事都係禿鷹過黎,香港D差佬係咪死撚晒?冇理由,明明喺電視見過七個打一個⋯⋯。
 
大家姐望住皮蛋王:「我今晚仲要同美國嗰邊交待⋯⋯」
 


皮蛋王成個小貴子咁:「咁大家姐既意思係⋯⋯」
 
大家姐:「你今晚留低陪我⋯⋯得唔得?」
 
皮蛋王發晒毒誓咁話:「緊係冇問題,大家姐叫我行就行,叫我坐就坐,叫我除我都唔夠膽除淨一條⋯⋯」
 
大家姐面都紅晒:「得得得⋯⋯我幾時有叫你除⋯⋯。」
 
估唔到皮蛋王條撚樣姦完屍一樣有運行!
 
大家姐吩咐肥媽睇住馬頭圍分店,皮蛋王就留喺度陪佢視像同美國佬開會,親自同美國佬解釋,屌原來皮蛋王一句英文都唔撚識,見工個陣重填自己大學畢業,話自己讀調理農務系,所以英文差D,淨係識耕田,後尾至知原來佢張大學畢業證書,都係早排被人事部check到冇交先至後補,仲係喺淘寶淘返黎。不過大家姐比機會佢,叫佢去工聯會惡補英文,點知條撚樣又攪9工聯會D Miss,最後被迫加入民建聯逢星期六幫手派米比D阿婆先將件事擺平,不過呢D又係後話。
 
落到馬頭圍分店,已經係清晨,比禿鷹班差佬攪9左成晚,班記者仲喺度等緊,睇黎佢地都冇諗住走,因為呢單野已經係震驚全港既頭條,相信會一直報導落去,直至件事完結為止。而且,岩岩又多一單猛料,死多兩個,係尋日已經死左⋯⋯。
 
我地成班就喺麥記到休息,個個都唔想返屋企,大家都好似有一種感覺,如果離開左呢度之後,唔會再有機會見返呢種末日心態。而喺埋一齊既時候,心理上踏實好多,有種互相依靠既感覺喺度。


 
大家姐叫肥媽落黎睇住馬頭圍分店,佢由洗屎坑變左acting,點到阿成屌晒老母,話洗屎坑都可以做acting,世界真係唔撚公平。但係達叔就發達,肥媽揸旗之後,佢真係坐喺度有面,食野又唔洗比錢,只係久不久要比肥媽揸兩下春袋填數。
 
Carmen坐左喺我隔離,我趁佢瞓左之後,就拎Cecilia部手機出黎,諗住睇下佢有冇野留低。
 
佢部機set左指紋開關,心諗呢次仆街,唔通要去搵禿鷹偷佢隻手出黎?雖然都可以,但唔唔想攪到咁大。諗住上高登搵班巴打幫手解決,點知佢班撚樣屌晒老母咁話明知自己會死就唔好再黎呢度,費事我累9埋佢地,仲話依家睇新聞都有最新消息,唔使我報料咁話。
 
我放左部手機喺枱面,諗住放棄既時候,Carmen無意中摸到部手機,佢隻食指揩到個掣,竟然比佢就咁解左個鎖!