要揭人私隱,當然必定要睇Whatsapp。入面見到佢同唔少男仔chat過,個個都話like佢,又約佢去街,但佢好似都唔多彩佢地。我分析過呢班人既用語,九成都係想氹佢上床個種,呢D說話我以前打唔少⋯⋯打撚左幾年都未成功過!
 
入面有段Whatsapp係咁既:
                                                           
文:你唔好再理件事,仲黎得切。
Cecilia:我都唔想,不過依家我唔理唔得。
文:咁你會冇命。
Cecilia:睇下邊個贏至講。
文:你會累埋你身邊既人。
Cecilia:都話睇下邊個贏。


文:唔好話我唔通知你。
Cecilia:冇所謂,橫掂都冇人鍾意我。
 
文到底係邊個?我嘗試用Whatsapp打電話過去,但係好似冇呢個號碼登記。
 
手機入面,有唔少Cecilia既自拍照,其實佢都幾靚,如果唔係咁臭串,同埋擺出一副高高在上既智慧型生物咁款,只需要加番少少溫柔同笑容,絕對係女神級數。我好快咁將D相過晒上雲端留返日後要黎懷緬,再慢慢睇佢其它私隱。
 
有個file頂住左過唔到上雲端,我打開黎睇,原來係一條片。一睇片,我個心又突左一突,因為呢排睇既片,冇條係正經,全部著住衫,但又鬼咁恐怖,同以往睇片既經驗完全唔同。
 
一開場,就見到Cecilia坐左喺間房入面,呢間應該係佢自己間房,成間都粉紅色,都幾女仔下,周圍仲貼滿男神黃宗堯D相,咁樣令我又諗起倪君子後生個陣既片段。


 
見到個畫面郁黎郁去,睇黎係有人set緊部手機拍片既位置,仲聽到有個女仔既喊聲,過左冇耐佢就入埋鏡頭人面,原來係豬西。
 
豬西:「嗚⋯⋯我地⋯⋯真係要擦張卡呀?」
 
Cecilia:「嗯,我同你都喺媽咪度攞左呢張優惠券,七日之前我地已經注定要擦呢張卡。」
 
豬西:「咁⋯⋯咁做乜我地唔將呢張券轉贈被其他人呀?」
 
Cecilia:「我發覺我地呢兩張有D唔同⋯⋯佢寫明只能轉贈一次,好似⋯⋯針對我地咁。」


 
豬西:「嗚⋯⋯我唔想死呀⋯⋯。」
 
Cecilia:「我都唔想,但如果我地唔攞左佢地張優惠券,死既咪媽咪佢地,你明唔明呀?Judy!」
 
豬西:「嗚⋯⋯好耐冇人叫過我做Judy啦⋯⋯。」
 
Cecilia:「咩名都唔緊要,最緊要既係,我地可以用自己條命,去救番喺自己最重視既人。一命換一命,fair丫。」
 
豬西點頭話明,佢地兩個就各自攞左張優惠券出黎,放喺枱上面,用個1蚊大銀將上面既銀色封條擦走⋯⋯。
 
喺呢一刻,我越睇越驚,我覺得好似睇緊伊斯蘭國斬首既片段一樣⋯⋯。
 
擦完之後,我見到豬西個樣好似好驚,差不多係絕望嗰種。相反Cecilia就好似頭先咁,冇乜特別太大既反應。
 


豬西:「係⋯⋯係零呀!嗚⋯⋯Cecilia,我係零呀⋯⋯你呢?」
 
Cecilia笑左笑,仲伸埋條利出黎,拎起左張券比豬西睇:「又會咁橋?我都係零!」
 
豬西喊得仲大聲:「嗚⋯⋯你仲笑?零呀!零即係我地過唔到今日呀!」
 
Cecilia:「人始終都要死嘛,豬西。」
 
豬西:「你又叫我豬西啦⋯⋯嗚⋯⋯。」
 
Cecilia:「驚只係一種情緒,你唔去諗,就唔會驚架啦!」
 
豬西:「但係我越唔想諗,就越係咁諗呀⋯⋯嗚⋯⋯。」
 
Cecilia:「所以我咪叫番你做豬西囉,攪到自己咁驚做乜。」


 
忽然,我聽到佢地個邊度門有被人打開既聲音,由於個手機係set緊左,我冇辦法可以見到鏡頭以外既野,但係我睇見Cecilia佢地望住既方向同表情,應該係有人入左黎⋯⋯