喺段片入面,我只係聽到Cecilia同豬西既聲音,而入黎既人所講既說話,我係一句都聽唔到。
 
雖然頭先Cecilia對將會死亡好似毫無感覺,但當佢見到入黎既人之後,塊面都即刻由紅轉白,個身仲有D震,明顯係受驚所導至,不過佢唔想加重豬西既壓力,所以先至將自己既恐懼壓抑,而豬西就驚到淨係識喊,但唔敢喊出聲⋯⋯。
 
Cecilia:「你⋯⋯係黎殺我地?」
 
Cecilia:「我想死之前問你D野⋯⋯可唔可以?」
 
Cecilia:「阿霞佢地一家⋯⋯係你殺既?」
 


Cecilia:「咁其它人呢⋯⋯?」
 
Cecilia:「點解要咁做⋯⋯」
 
Cecilia:「有冇辦法停止呢個遊戲⋯⋯?」
 
Cecilia:「如果最終都搵唔到呢⋯⋯?」
 
Cecilia:「嗯,時候到啦⋯⋯係咪?」
 


呢個時候,手機拍到有兩條繩圈喺佢地頭頂吊左落黎,位置剛剛好套住佢地兩個條頸,一秒都唔夠,佢地就比呢條繩圈扯起,吊左上去,我淨係可以見到佢地兩個對腳,由不斷掙扎,去到靜止唔郁,都只係唔夠一分鐘既事⋯⋯我一直望住佢地對腳,直至部機用盡記憶體為止,段片先至停。
 
估唔到,Cecilia喺死之前,竟然會佈局錄影,仲用左Carmen黎做指紋解鎖,唔怪得佢尋晚喺麥記總部個陣,話有辦法知道阿霞係點死,同埋事實既全部。不過佢點都估唔到,就算我今次用晒快鏡抑或慢鏡,都只係可以聽到佢把聲,至於入黎既人所講既說話,仲係一句都聽唔到。最關鍵既說話聽唔到,拍左等於冇拍。
 
已經係朝早六點幾,皮蛋王攞住幾份報紙返黎,我地立即圍埋去睇下港聞版今日又死幾多人。尋日皮蛋王吹完個送車送樓優惠之後,今日死既人數大幅下滑,加埋Cecilia同豬西都只係得4個。不過Cecilia同豬西單野就入左秘聞版入面。
 
雖然死既人少左,但係黎排隊登記一個禮拜之後攞優惠既人就好撚多,條人龍由馬頭角道經牛棚十三街煤氣去到九龍城碼頭,行路都會要半粒鐘先到,登記到阿成冇得返屋企連踩兩更,直到半夜將近12點,要宣佈明天請早佢地先肯走。
 
我拎左Cecilia段片出黎比佢地睇,佢地睇完個個都問我點處置部手機,我話關你地9事,諗下點樣過埋呢4日先講!依家已經係夜晚12點,照計⋯⋯又有事會發生。
 


阿粒:「既然Cecilia提出左呢幾條咁關鍵既問題,不如我地試下玩role play,睇下可唔可以撞到個答案出黎?我喺醫院成日同D病人玩呢個遊戲,有時都可以brainstorm到D野出黎架!」同精神科D病人brainstorm到野出黎,我地都好懷疑嗰D會係乜野⋯⋯。
 
皮蛋王:「好呀好呀,我最鍾意玩呢D,咁Carmen做Cecilia,我扮入黎嗰個人!開始未?」
 
Carmen:「ok,黎啦⋯⋯你⋯⋯係黎殺我地?」
皮蛋王:「屌你啦,唔係黎做乜撚野呀?」
Carmen流住汗:「我⋯⋯想死之前問你D野⋯⋯可唔可以?」
皮蛋王:「乜你咁撚多野問架!死就趁早嘛⋯⋯問啦!」
Carmen:「阿霞佢地一家⋯⋯係你殺既?」
皮蛋王:「關你撚事呀!」
Carmen:「咁其它人呢⋯⋯?」
皮蛋王:「咪答撚左你囉,仲問!」
Carmen:「點解要咁做⋯⋯」
皮蛋王:「我知就好啦!屌你!」
Carmen:「咁⋯⋯有冇方法停止呢個遊戲⋯⋯?」


皮蛋王:「屌你問黎都多9餘,要停我就唔開始玩啦⋯⋯喂喂喂,點呀,我表現成點?幾多分?」
 
我地都冇撚理佢,下一個係達叔。
 
Carmen:「你⋯⋯係黎殺我地?」
達叔:「係呀,你話好唔好?」
Carmen流住汗:「我⋯⋯想死之前問你D野⋯⋯可唔可以?」
達叔:「問D淺D既唔該。」
Carmen:「阿霞佢地一家⋯⋯係你殺既?」
達叔:「其實我都未攪清楚⋯⋯」
Carmen:「咁其它人呢⋯⋯?」
達叔:「係掛⋯⋯」
Carmen:「點解要咁做⋯⋯」
達叔:「D人衰貪心,抵死架!」
Carmen:「咁⋯⋯有冇方法停止呢個遊戲⋯⋯?」


達叔:「咁⋯⋯喂,唔掂呀,根本冇答案,點作呀?你估個個都皮蛋王咩!」
 
「不如試下比我問,Carmen你答!」入黎既係唔見幾日既紫雲大師。我地見佢手入面拎住張十二格既優惠券,有幾格銀色封條已經擦甩左,上面都寫住零字,佢話:「呢次真係仆街,唔覺意揩撚甩左幾格封條,都唔知過唔過到今晚!」