[惡搞無極限] 就係咁，我同幾個豬朋上左大陸獵金: ３２３　燕子尋物

「妳叫做還珠格格？」呢個名字好熟識，並唔係因為趙薇果套劇集，而係因為大寶叫我地搵果五個女人當中，其中一個係還珠格格。

聽到佢叫還珠格格後，我好激動，因為命運好似不停咁將我帶上搵阿爸Ｄ野既路上面。

我激動得，喊左出黎。

而阿欣係旁邊見到我咁，就嚇左一跳問我：「阿賢你發生左Ｄ咩野事啊！？」

「無……無野。」我擦去我既眼淚，然後望住已經一早望住我既還珠格格，「我想問，妳係未識一個人叫大寶？」





還珠格格佢打量左我一下後，反問我：「你點會知道大寶呢個人？」

「係佢叫我黎搵妳架，佢係未比左一張相妳，話以後只要有一個女仔好似相入面既女人，就係要黎搵妳拎野既人？」我問，然後佢直接答：「係，你唔好話我知你就係果個女仔。」

「緊係唔係啦。」我答佢，然後佢就打量阿欣後話：「如果你唔係，姐係呢個女仔？但係佢同張相唔似ＷＯ。」

「唔係佢，張相入面既人，係我阿妹既媽媽。」我答完後，還珠格格用左一個疑惑既表情望住我話：「咁你叫你阿妹黎左，我先比佢。」

「但係，我……」「我點知你係未假扮架，無啦啦有個人衝出黎話拎野，如果比錯，我會對唔住大寶。」我未講完，還珠格格就話。





而我聽到佢咁講，佢都有佢既道理，所以我就同佢講：「咁不如妳跟我返去啦，而且英紅吧出左事，妳都想返去睇睇掛。」

佢聽到我咁講，再三確認我係識勞斯萊斯後，就話：「我跟你地返去無問題，但係我要係度搵樣野先。」

「搵Ｄ咩？」我同阿欣問。