《毒L和初戀相識的日子》: 第一百九十八章 放一日假

第一百九十八章 放一日假

阿輝send咗段信息比我，話佢終於脫單喇。睇嚟，佢琴晚同戈個女仔進展得好快。

我出客廳開電視睇，突然有人叫我。

「陳旭祖！」我老母突然叫我。

「咩事呀？」我回應。





「今晚我又去打通宵牌呀！咁晚飯你自己搞掂喇。」

「係嘅。」

「仲有，你知唔知... 算啦！都係冇嘢喇。」

「有嘢就講啦！」

「好快你就會知㗎喇！」





其實，我都唔知佢講緊啲乜。

今日係中秋節翌日。難得有一日假期，我當然係打吓機啦。之前Winnie寄咗幾張相比我，我放咗喺電腦枱旁，咁就可以經常都見倒佢喇。

到差唔多四點，Leo搵我落樓下食啲嘢，佢咁啱搭車入咗嚟去我屋企附近交收。

我換件衫就落樓下同佢會合喇，我哋去咗附近嘅一間茶餐廳。

入到去坐低，叫咗兩份下午茶餐。





「你最近點呀？」我問。

「都幾好吖，同埋我今年year 3喇。」Leo回應。

「戈日仲諗住去Poly搵你出去行吓添。依家重色輕友啦？」

「冇計啦，對我嚟講女朋友都好重要㗎嘛~」

「我講笑姐。係呢，你琴日係咪去咗二人世界？」

「唔係呀，我哋一大班人去咗唱K，當然佢都喺度啦~ 咁你琴日有咩節目？」

「幾個人去咗我I大個friend屋企打邊爐囉。」

「咁都好吖。喂，你long d long成點？順唔順利？」





「都順利呀。大家都有keep住聯絡囉。咁你同你女朋友呢？」

「我同佢都係咁啦，成日都黐埋一齊囉~」

我睇得出Leo好重視佢女朋友。我哋傾咗陣，食埋嘢之後就走喇。

我番上屋企繼續打機，打到攰之後就睇吓部電話。我打開ig，見倒Christy po咗張相，相入面除咗佢之外仲有幾個女仔，背景係佢喺紐西蘭讀書嘅學校。睇嚟佢已經慢慢適應戈邊嘅生活喇。

突然，晴晴用Whatsapp send咗個信息比我。









佢搵我做咩呢？