《毒L和初戀相識的日子》: 第一百九十九章 假期之後

第一百九十九章 假期之後

晴晴搵我係想約我下個月食飯，約埋其他I大嘅朋友，暫定係其中一個星期日。

咁我就答應咗佢會去啦。佢咁早就約人都係想到時可以齊人。

假期之後又到番工嘅日子。一番到去，見倒好多人都冇乜精神，可能係因為啱啱放完假。反而，我見倒阿輝滿面笑容。

「早晨呀~」我對阿輝講。





「早晨~」阿輝回應。

「估唔到你進展咁快喎！」我向佢講。

「咁相處落嚟覺得大家夾倒囉，咪一齊囉~」阿輝笑笑口咁回應。

「你表白㗎？」

「緊係啦，呢啲嘢唔通要女仔講出口咩？」





「估唔到你咁勇喎~」

到中午放飯，阿輝要同佢啱啱喺埋一齊嘅女朋友食飯，而我就自己行出去食。

我去到一間茶記，繁忙時間必定要搭枱。我坐咗一張卡位嘅一邊，對面竟然係家怡同埋一個好熟口面嘅女仔。

「乜咁啱嘅？」家怡向我講。

「係囉。」我回應。





「你記唔記得佢呀？」家怡指向坐佢旁邊嘅戈個女仔。

「嗯，一時之間諗唔起。」我回應。

「佢係Nicole呀。」家怡回應。

原來佢係之前I大識嘅Nicole，同阿文同班，都係讀幼教嘅。我見過佢都好多次，不過冇乜同佢講過嘢。自從家怡同阿文分咗手之後，Nicole同埋家怡到依家都係咁friend。今日係Nicole專登嚟搵家怡食lunch。

食完飯之後，Nicole去咗搭車走。我同家怡就番公司繼續工作。

番到公司，阿輝繼續滿面笑容。

「你啱啱餐飯好『甜』啦？」我問。

「少少咁啦~」阿輝笑笑口咁回應。





放工戈陣，落到公司樓下，我見倒阿輝同埋戈個女仔一齊行。

過咗幾日之後，晴晴通知我約出嚟食飯嘅日期係下個月十九號，星期日。時間、地點就要再傾。




唔知晴晴約食飯，到最後齊唔齊人呢？