［愛情甜故前傳--無糖純愛］曾經嘅我地，都係兩條平行線⋯: 76. 想了解

翌日朝早，我同平日一起早咗十分鐘出門口番學，唔知呀…早十分鐘出門口好似已經成為咗我習慣嘅事，我都已經習慣咗早十分鐘起身，早十分鐘出門口番學

不過今日番學嘅路上，我冇見到方芷諾，咁唯有番到學校見到佢先比番佢啦

我番到學校之後喺小食部嘅一邊企咗一陣，反正好快就打鐘，咁我企一陣啦，而且我企喺小食部嘅入口位置，可以見到方芷諾幾時番嚟

我靠住牆企，純粹企喺度，我冇拎住任何筆記溫書，企咗一陣之後，我見到方芷諾踏入校門

方芷諾手上拎住一本簿，好似係佢平時用嚟做堂課嘅堂課簿，方芷諾自然地抬起頭，望到企喺小食部入口嘅我，我同佢嘅視線對上，佢踏着正常嘅步、帶着正常嘅步速走向我，但係我嘅心跳冇辦法維持喺正常嘅水平





「早晨。」方芷諾行到我面前，朝我微微一笑，一大清早就可以見到佢嘅笑容真係好

「早晨。」我回應咗一句，然後拉開書包拉鍊，喺書包中拎咗一個File出嚟，我喺File中抽咗方芷諾嘅嗰份筆記出嚟然後遞比佢

「唔該～」方芷諾嘅笑容，好似代表住佢已經唔記得咗我拒絕佢嘅嗰件事咁，又或者佢只係喺度努力咁假裝，努力地掩飾住佢對住我嘅時候嘅尷尬

佢拎咗筆筆記之後之從我面前行開，喺我身邊走過，行咗去小食部，喺佢從我嘅身邊行過咗之後我轉身偷偷地望向佢，雖然只可以望到佢嘅背影，但佢剛才嘅笑容，我仍然記得

溫柔又不失尷尬嘅微笑，見到仍嘅微笑，我心裏總會不禁懷疑，到底佢係唔唔係真係已經放低咗，真係已經唔再介意我對佢講過嘅嗰啲說話？





我想知道佢點諗，我想了解佢多啲，想知道多啲關於佢嘅事，不過會唔會有呢個機會就真係唔知啦…

…

我地坐喺課室，等待着8點半嘅來臨，枱上已經放住試卷，等待嘅就係開考

「叮噹叮噹…叮噹叮噹～」當8點半嘅鐘聲一響起，大家都拎起筆，翻開試卷

我掀開試卷，啱啱Check卷嘅時候，我都有稍稍望過啲題目，雖然唔係特別仔細咁睇，但至少我見到我識做嘅題目同大概會識做嘅題目





我拎起原子筆同cal機開始做卷，我做咗咁多練習，出嚟嘅成績應該都唔會太差掛…我喺第一題嘅題目下好快就寫低咗答案，然後落第二題

我耷低頭一直寫一直寫，完全都冇留意時間仲有幾多，我盡自己嘅全力，喺腦海入面尋找着我呢段時間溫數學嘅回憶，每一條公式，每一種題型我都有好好咁做一次

㩒cal機嘅聲音喺課室裏迴盪着，但我冇分神去理會，因為我眼前嘅事更加重要，我無暇分心到其他嘅事情上

我偶爾抬起頭望向掛喺課室前方嘅時鐘，數學嘅考試時間嘅一個半鐘，我眼見仲有半個鐘，我啱啱好做到試卷最後嘅一頁，仲有兩題要做，半個鐘做兩題應該夠

我默默咁望住尾二嘅題目，腦海中所有同Coordinates Geometry（直角幾何座標）有關嘅公式同方法都浮現晒出嚟，通常考試卷入面嘅第二部份中，最後兩題會比較難，雖然我做晒書入面嘅所有題目，但係我自知我對於呢課都係唔太熟，特別係對難嘅題目，始終我冇一開始就努力讀書，上堂又唔專心

如果今次出嚟嘅成績係合格，我都會覺得滿意，至少對得住自己嘅努力先…如果係以前嘅我遇到呢啲難嘅題目，我大概會直接放棄；但宜家我會選擇試一試先，我唔想自己嘅努力白費，既然我講咗要努力讀書我就要努力做好

「15 minutes left. 」監考老師講咗一句，我啱啱好計完呢一題，我用如雷不及貫耳嘅速度掀去下一頁，最後一條大題有三部分，我諗我一定趕唔切做C part，但係我一定要做咗A part 同B part

我好快咁scan咗條題目一次，然後就拎起筆同cal機，A part通常都係最簡單，因為A part係幫你做下一題，冇A part嘅答案，就唔會計到下面兩part





我寫字嘅速度都突然間變得好快, 因為要同時間競賽，所以我都冇時間留意剩番幾耐

「Time’s up, put your pens down. 」監考老師講道，喺佢講嘅同時，我啱啱好做完B part，好彩做得切，做唔切嘅話得我都唔知可以講咩…

陣間小息之後就係考數學嘅MC題，希望陣間計得切就好，我將試卷疊喺面向前傳，喺等待監考老師叫大家執嘢嘅時候，我偷偷地瞄向方芷諾

佢縮起咗雙肩，然後一下子墜落，睇嚟方芷諾都覺得鬆咗一口氣，唔知道佢識唔識做呢？不過佢咁叻，又點會唔識做…係得我先會唔識做㗎啫…




IG Link: https://www.instagra.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link