［愛情甜故前傳--無糖純愛］曾經嘅我地，都係兩條平行線⋯: 77. 不認識的女生

我望一望時鐘，仲有15分鐘就考完數學MC，而我已經做完成份卷，亦小心咁check咗一次卷，所以我宜家就係處於一個「唔知可以做咩，但係唔可以伏低瞓」嘅狀態

我嘅視線偷偷地落喺坐喺中間嗰行第二個位嘅方芷諾身上，冇錯，方芷諾就坐喺我隔離嗰一行，就係我斜前方

好彩我同佢個位之間有一段距離，我就算望佢都唔算係啲咩事，況且大家都專心咁做緊試卷，唔會有人留意到我望佢

方芷諾正耷低頭做緊考試卷，不過佢好快就放低咗筆，然後抬頭望一望時鐘，我嘅視線隨住佢望向時鐘而改變，我都望向時鐘，時間仲有5分鐘左右

我嘅視線再一次移回方芷諾身上，佢再一次耷低頭望試卷，不過今次佢係將試卷掀番去第一頁，睇嚟佢諗住用剩低嘅5分鐘嚟check卷，但得番5分鐘咋喎，夠用咩？不過我諗就算係唔夠都好，佢都會照check，check得幾多得幾多



「Time’s up, put your pens down. 」監考老師一講完，課室裏頓時傳嚟好多掀卷嘅聲音同放低筆喺枱面嘅聲音

我坐番好個人，然後等後面傳份卷上嚟，直到監考老師叫大家傳卷，我後面嗰個同學將份卷傳上嚟比我，我將我份卷疊喺面傳上去

今日要考嘅嘢已經考完，我地落到樓下G樓次後，我就直接行出校門，去食個飯然後就番屋企休息一下再溫書

「喂葉子朗！」突然間有人喺後面叫住我，然後一下子伸手搭住我博頭

我朝住聲音嘅方向望向去，原來係徐思迪



「一齊去食飯呀～」徐思迪一邊對住我講，一邊指去後方

我望去後面，見到除咗見到Wilson同余嘉偉之外，仲見到五個女仔，又係方芷諾佢地五個，睇嚟方芷諾都會一齊去食飯

「Okay～行得啦！」正當我想答Okay嘅時候，徐思迪已經搭住我博頭一齊行

自從嗰次喺圖書館搭枱溫書之後，呢個組合好似出現多咗，不過都未嘗唔係一件好事，至少呢個組合可以令我多咗同方芷諾一齊嘅機會，應該話，可以令我可以見方芷諾耐啲

如果冇方芷諾嘅諾，我一定唔會同佢地去食飯，不過好彩每一次方芷諾都會一齊去，所以我都會跟埋一齊去



「你地想食咩呀？」徐思迪轉身望向後面班女仔，盡顯佢風度翩翩嘅一面

「冇所謂啦，食咩都得。」李靜愉係女仔入面第一個開口回答

「我都冇所謂。」隨住李靜愉答咗一句冇所謂之後，另外四個女仔都答咗一樣嘅答案，簡單啲嚟講就係叫我地決定，佢地唔想諗

「跟你地，你地想食咩就食咩。」游悠講道

「你地有冇咩想食？」徐思迪問我地幾個男仔，「去附近嗰間茶餐廳好唔好？定係你地有其他嘢想食？」

「茶餐廳囉～食咩都一樣啫。」Wilson講道

最後因為連我地都冇咩所謂，所以我地最後就係去咗食茶餐廳，嗰個阿姨比咗張喺茶餐廳中心嘅大圓枱我地坐，因為我地9個人

我冇坐喺方芷諾隔離，如果我坐喺方芷諾隔離，佢應該會覺得唔太自在，或者佢應該唔會想我坐喺佢隔離；所以宜家我左邊係Wilson，右邊係徐思迪，我對面係游悠，游悠嘅左邊係方芷諾



不過如果我地食飯嘅時候，我嘅目光停留喺方芷諾身上嘅話，方芷諾或者其他人就會察覺到異樣，所以我就算要望佢，都要盡量顯得自然

阿姨行過嚟幫我地落咗單，寫低咗我地要咩，然後就行開咗，淨係放低咗一張單喺我地枱面

我耷低頭睇手機，見到方芷諾Po咗IG Story，我即刻就想㩒咗入去睇，正當我嘅指尖要掂到方芷諾個Icon之際，突然有人撞咗我背脊一下

我擰轉頭望，徐思迪同Wilson都同我同步望去後面

「唔好意思呀…」一個女仔一臉抱歉咁望住我，喺我印象中佢好似係我地級，好似係隔離班嘅女仔

我冇多理，但佢一句唔好意思搞到大家都抬頭望過嚟，方芷諾見到佢之後冇好似其他人一樣耷低頭睇手機或者傾計，反而望一望我，然後視線就跟住嗰個女仔郁

唔通方芷諾識得嗰個女仔？但識嘅話點解唔打招呼？方芷諾望咗一陣之後就喺李靜愉耳邊細聲講咗兩句



我用眼尾嘅餘光瞄向嗰個女仔，見到佢嘅背影，佢同另外兩個女仔一齊，我淨係知道佢係我地級，隔離班，不過我對於佢係邊個，就冇咩太大嘅興趣

「嗰個女仔咪隔離班嘅洛天恩？」Wilson朝住我講道，雖然我唔知點解佢要對住我講，但我對呢個女仔係邊個冇咩興趣




IG Link: https://www.instagra.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link