由O Camp組爸組媽變左做真正既夫妻: Chapter 51
「又多一家人食飯啦！」爹地同大家講。
「姨婆！姨丈！堂家姐！」沙皮狗講。
「快啲過黎食飯啦！」爺爺話。
我地就行過去飯廳到食飯，今日真係好似過年一樣，一屋都係人。而爹地佢地都好識做，叫我陪Claudia坐，我呢個男朋友都好識做基本上會夾野比佢先，而琪琪就當然同妹妹孖公仔一齊坐啦。
「B啊有冇試過咁多人一齊食飯呢？」我問Claudia。
「當然有啦！下一次應該係見雙方家長！爹地話搵日叫你一齊食飯喎！」
「幾時先？」
「搵日啦！我返去同佢講。」
「好啊！BB食野啦！」
「你都係啦！」
呢一餐飯，大家都食得好開心。講真自從搬左屋之後都好耐冇試過咁齊人。基本上老人家有老人家講，後生仔有我地後生仔講，而我同Claudia當然係談情說愛啦！而爺爺嫲嫲好開心，不斷夾菜比Claudia食。而Claudia就萬千寵愛在一身，變左第二個妹妹。
食完飯，我就同Claudia負責洗碗，廚房裡面得我地兩個。
「B啊？」
「咩啊？」
「頭先⋯⋯你同世伯去左邊到黎？」Claudia突然間管家婆上身。
「去睇車啊！買左架Lexus！」
「吓？？？」Claudia嚇咗一下，不過佢呢個表情都唔意外。
「你冷靜啲！頭先我又唔係出去滾！」
「咁好嘅，不過下次要車我喎！」
「車埋你爹哋媽咪都得啦！」
「係咪先？返到去同佢講啊！」
我哋洗完碗之後，就帶Claudia返去我間房到，由於我有時過年過節都會返嚟舊屋，所以啲床同無關重要嘅物品我都冇搬走。至於個面積其實同新屋差唔多，都係120尺左右。
「嘩你間房咁得意嘅？好似廿幾年前電視劇嗰啲嘅佈景。」Claudia問。
「係呀，真係好似90年代嗰啲布景架！」
「哈哈真係好得意呀！？呢盒係咩嚟㗎！」Claudia指住我同Winnie個盒問，搞到我即刻變得好驚。
「可唔可以唔好睇啊.......我驚B你會唔開心啊！」講真我好驚Claudia見到嗰盒野之後，可能會覺得我仲未放得低我前女友，所以我好驚佢見到之後會唔開心。
「咁我就更加要睇啦！快啲講係咩黎？」Claudia含情脈脈咁望住我講。
「係我.......同死左前女友嘅回憶，我B驚你睇咗之後會好唔開心！」
「乜你女朋友我係啲咁小氣嘅人咩？」Claudia鼓起泡腮咁問我。
「我知我女朋友唔好咁小氣嘅人嚟嘅！同埋我鍾意你唔係因為要做佢嘅代替品，而係你對我真係好重要，我只係鍾意你一個人！」
「應該話係兩個都要愛！不如.....我哋一齊睇啦！人呢如果要接受將來，首先要學識面對過去同現在！」
有事我覺得我女朋友究竟係咩構造架，通常現任嘅女朋友如果見到另一半仲收埋佢同前度嘅嘢一定會發晒脾氣。不過Claudia好清楚咁知道我唔係因為要搵個女仔代替Winnie既位置而追佢，同埋佢真係好大方，陪我一齊面對返呢個過去嘅回憶。
於是我哋一齊打開咗個盒.........裏面全部都係以前Winnie送俾我嘅物品，寫比我嘅書信、字條、同埋一齊訂做既情侶手繩，同埋好多屬於我哋兩個人嘅合照。不過Claudia一見到我地既合照，佢嘅表情係一個令我意想不到嘅表情。
「做咩啊B？」我問Claudia。
「你前女友咁熟口面嘅？」
「咪又係女仔一個！」
「唔係呀佢真係好熟口面㗎！我好記得我以前見過佢！」
「人有相似姐！」
「B，你前女友叫咩名啊？」
「關嘉穎，Winnie。」
「關....嘉穎！我記得啦我哋以前係同班同學嚟㗎！佢以前係咪讀DGS架？」Claudia諗咗一諗，就俾咗一個我會意想不到嘅答案。
「係呀係呀，原來你地兩個識㗎？」我問Claudia。
「我哋以前同過班㗎，不過後來升到中四之後我哋分咗班變咗大家冇咁熟，但我哋都有keep住聯絡。真係估唔到原來佢係你以前嘅女朋友。我記得佢以前比較文靜內向，但係佢讀書好叻，年年都有獎學金，有一次我睇佢FB見到佢男朋友張相，原來就係你！」
聽完Claudia咁講，我就知呢個世界其實真係好細，原來Claudia同Winnie以前係中學同學嚟！更加估唔到佢哋兩個都係我嘅女朋友。Winnie，你要我做嘅嘢我終於做到啦！多謝你啊！
我就即刻攬住Claudia，然後佢就問：「做咩啊B？」
「我宜家先知道原來身邊有一個好關心我嘅人真係好重要㗎！」
「哼！你而家先知咩？」
「一早知啦！估唔到呢個世界係咁細！」
「嘻嘻。喂呢個究竟係咩嚟㗎？」Claudia指着另一本相簿。
「我細個D相呀你睇唔睇呀！」
「要！當然要睇啦！」Claudia好開心咁講。
我就攞住以前啲相簿，同Claudia一齊分享我童年嘅樂趣。我哋一邊睇就一邊笑。我平時就係有個習慣，無論參加啲咩活動都好，我都會用手機或者相機拍低所有嘅合照，然後仲走去影相鋪晒番啲相出嚟。
「B原來我以前同你影過相啊！」Claudia話。
「係咩？」
我望真啲原來係F.5嗰年既D1學界田徑賽，當年嘅攝影師仲邀請我哋男拔同女拔嘅田徑隊一齊影相。不過唔知點解我當時影相好怕怕醜醜，而Claudia嘅樣完全冇變到，依然都係咁Pure，原來Claudia係田徑隊黎，難怪佢身材咁Fit，跑步咁快啦！
有時喺到諗，如果當年追嗰個女仔係Claudia，可能而家我哋已經一早結咗婚。但係有時世界就係咁奇怪，個天始終要你經歷一啲野，然後先會比你適合嘅另一半。
「仲有呢張啊！呢張係我以前同你嘅單人照！」
「我有同你單獨影過相啊？」
「係呀！嗰陣我同Kary咪睇你賽全港學界籃球精英賽，你嗰時係隊長黎，嗰場決賽你哋仲贏咗添！下面嗰個咪係Kary囉！不過做咩......入咗港大之後唔打籃球嘅！」
聽完Claudia咁講，緣份呢家野其實一早已經注定左，估唔到以前中學嗰陣已經見過，仲做埋我嘅小fans。不過當時有好多人都搵我影相，而我呢個人就基本上來者不拒嘅，同埋每一張同我合照嘅人我都會好認真去保存，亦都因為呢一份永久保存，將我同Claudia安排在一起。
「你知啦讀法律咁忙，兼顧唔到呀嘛！不過我都仍然Keep住同啲同學打衛生波。」
「咁都啱嘅，B啊不如我哋搵日.......着校服去拍拖啊！」
聽完Claudia講「著校服去約會」呢幾個字，搞到我成個人好撚high，因為終於可以見到Claudia着住女拔校服既樣，唔好話真係見到啊，淨係幻想下都已經搞到我扯扯地。
突然間，Claudia就一野打落我到，將我由FF拉回現實。然後我就問：「你做咩打我呀？」
「又諗埋晒啲衰嘢囉！」Claudia扮嬲咁講。
「唔好嬲啦B！錫晒你！」我Kiss返佢。
「哼！苦既！」Claudia繼續扮嬲，睇嚟佢今次真係唔收貨。
「你覺得苦啊？咁要繼續Kiss啦！」於是我繼續Kiss左佢差唔多成一分鐘。
「好啦好啦！好甜啦，就嚟有糖尿病啦！不如你帶我出去行吓啦！」
「好啊！不如帶你去睇星星呀！」我向Claudia提議。
「你鍾意啦！我已經將成個人交咗俾你㗎啦！」
我哋兩個執返好啲相簿之後就同媽咪講話出咗去，佢仲叫我哋要玩幾夜都得。