全實景系列《香檳大厦 1:55 am 行人止步》重製版 (已完結): 第十六章：【血紅色異變】
1:55am – 3/F 1971年代診所門外
黃經理帶住Fiona同埋護士媚姨，躡手躡腳走出三樓嗰間1971年嘅診所，向香檳大廈地下進發。
離開診所，轉左係一條長走廊，經過中梯，通向A室、前梯及𨋢口位置；但轉右就可以即刻去到後梯，直落地下。
黃經理呆立幾秒，就做咗個決定。
「搭𨋢落大堂，搵到人求救嘅機會大啲。走去後樓梯……我唔確定後樓梯底層有無鎖到，而且我無試過由呢度行落去，萬一鎖咗同時又遇上啲怪人嘅話，就實走唔甩……」黃經理考量得十分仔細。
「我哋小心啲行過𨋢口嗰邊。」黃經理轉過頭，輕聲地同兩位女士講。
「嗯！」媚姨緊張地回應，同時緊緊地捉住Fiona手臂，左右張望。
三樓走廊環境同以往唔一樣，格外平靜，沒有一樓一嘅螢光招牌及霓虹燈泡串，沒有趟開嘅鐵閘，沒有「請按鐘」字牌，沒有人聲，沒有人氣，就好似死城一樣。
「點解會無哂人嘅？」Fiona好奇怪，佢記得三樓係「七日鮮」駐紮嘅地方，無幾耐前經過都仲係燈火通紅，男人絡繹不絕，點解宜家想搵半個人都無？
黃經理行喺最前面，每行一步都細心留意附近有無任何特別嘅聲音。Fiona緊緊跟隨黃經理，望住佢嘅背影，回想起佢剛剛拖住自己逃避豬肉佬同埋班怪物嘅追擊，心頭泛起一陣感覺。
「雖然同眼前呢個男人一啲都唔熟，但呢一刻嘅感覺同之前有好大對比……」過去嘅經歷湧上Fiona心頭。以前為咗一個對自己唔好嘅男人，Fiona甘心落火坑賣身幫佢填數，但換嚟只得到一句：「賤人。」作為分手時嘅最後一句說話。
當大家以為風塵女子閱歷深，見得多男人，就乜都睇化晒嘅時候，其實佢哋同其他女人並無分別，無論外表幾堅強都好，都總想被人保護。正如男人都總想搵人抱抱一樣。
任何人都渴望被愛，姐姐仔都係一樣。
三人行到去走廊中段時，黃經理輕輕推開連接住走廊嘅中梯防煙門，探頭入去睇下有無動靜。
不遠處嘅樓梯旁牆上嘅油漆剝落了一大塊，顯得灰灰白白，地下同樓梯都有啲已經乾咗嘅暗紅色液體，散佈範圍廣泛。「血……？」
黃經理掩住口鼻，難以想像如果一個人失去咁多血嘅時候，到底會有乜嘢感覺。
佢再望一望門後嘅空間，平時塞滿垃圾嘅紅色大膠筒消失咗，但旁邊嘅牆上就多咗一個 A3 紙大細嘅開口，外面有一個生銹鐵活門，門上有一個手柄。黃經理一陣疑惑，然後大膽推開防煙門走入中梯，想睇清楚嗰個鐵活門。
鐵活門一角夾住咗一大塊白白紅紅，看似係布嘅東西。
黃經理摸一摸塊布，感覺似比較厚實嘅棉布質料，而近睇上面嘅紅色就似係血，唔知係咪同樓梯上面嘅血一樣，屬於同一個人。
黃經理集中精神，揸住門上嘅手柄，向後一拉，活門後出現咗一條向下嘅通道，而嗰塊白布，隨即向通道裡面滑落。
說時遲那時快，黃經理快手捉住塊白布，向上抽出嚟一睇，原來係一件佈滿血跡嘅白袍。
與此同時，喺出面頂住道門嘅Fiona同媚姨都見到黃經理嘅舉動。「哎呀，係陳醫生件袍呀。」護士姨姨驚呼，並走入去搶走黃經理手上嘅醫生袍：「真係陳醫生件衫。」媚姨哭了起來。
「唔好咁傷心啦，我知你都好想救到佢㗎……」Fiona輕拍媚姨膊頭，連聲安慰。
黃經理望住條通道，感覺到有少少風由裡面吹出嚟，佢將頭靠近通道口，發現除咗滲出微風之外，仲有一種既規律而又低沉嘅聲音傳上嚟。
黃經理將個頭越伸越入，整個頭幾乎伸晒入去活門之內，佢好想聽清楚到底係乜嘢聲音。
「你做乜嘢呀？」就連本身喊緊嘅媚姨都畀黄經理加怪嘅舉動嚇親，不禁出聲：「望住條垃圾糟做咩呀？」
「呢條係垃圾糟？」黃經理抽返個頭出嚟，反問媚姨。
佢從來無喺日常生活入面接觸過垃圾糟。每家每戶只需要將垃圾倒入垃圾糟，就可以直接送到去地面嘅垃圾房，清潔工人亦唔需要逐層收集。
黃經理再次探頭入去，繼續睇下呢一條垃圾槽奇怪之處。垃圾糟內一啲垃圾味都無，除咗有聲之外，佢仲隱約聞到淡淡嘅食物香味。
「茄蛋撈丁嘅味道？」黃經理覺得奇怪。
佢雖然只係食過一次茄蛋撈丁，但嗰股香氣令人難以忘懷，無諗過喺香檳呢個品流複雜嘅地方，會有一間隱世餐廳。
「你聽到啲乜嘢呀？」Fiona挨住樓梯中間嘅扶手問黃經理，卻突然感覺震動了一下。
Fiona心中打了個突，震動係嚟自佢挨住嘅樓梯扶手。
黃經理將食指放喺嘴唇前面，示意佢哋唔好出聲。
喺單一而又低沉嘅聲響之中，佢隱約聽到有兩個人正在交談，聲音雖然微細但感覺熟識，而且聽得出係一男一女嘅聲音，不過對話嘅內容佢就毫無頭緒。
「黃經理……」Fiona再一次叫黄經理。
「再等一陣！」黃經理極力回想，彷彿已經記起呢兩把熟識嘅聲音。
樓梯扶手喺短短一分鐘嘅等候時間經已傳嚟第三次震動，Fiona喺樓梯中間嘅空位向下望，一隻蒼白手連前臂，正順住一樓嘅扶手正在向上緩慢滑動。
Fiona瞪大眼睛，用手掩口，離開樓梯扶手，走過去不斷拍打黃經理膊頭，然後指住樓梯下面做口形：「有嘢上緊嚟呀……」
「死火！」黃經理細細力將垃圾糟活門閂埋，先讓媚姨離開中梯出返去三樓走廊，再拖住Fiona離開，然後輕輕關上防煙門，當木門閂淨一條罅隙時，佢已經見到一嗰黑色人形嘅物體出現係三樓嘅樓梯上，一隻蒼白嘅手搭喺扶手上面。
個黑色人形物體幾乎係滑動上樓梯，行得十分怪異。
黃經理睇唔清佢頭部喺邊，彷彿就好似一堆黑色嘅物體匍匐而行。黃經理記起阿Ken形容閉路電視中嘅情況：「係嗰隻嘢……」
防煙門已經關上，黃經理佢地同嗰隻黑色嘢只係一牆之隔。佢吞一吞口水，指住前梯方向，再用兩隻手指做出走路嘅動作，媚姨同Fiona隨即向前梯方向行。
安靜但急速嘅腳步。
Fiona同媚姨先行，黃經理殿後，不時回頭張望，確定無任何異樣。媚姨第一個到達𨋢口，佢按一下𨋢掣，部𨋢由八樓徐徐下降。
當Fiona去到𨋢口嘅時候，感覺一切都十分陌生，平時搭開嘅𨋢係用不銹鋼造，𨋢掣就係閃亮嘅銀色電鍍版面，但宜家所有元素都突然變得十分懷舊 – 部𨋢嘅顯示版以一個個小黃色燈泡做指示，外面嘅數字已經無晒，𨋢門亦顯得殘舊不堪。
黃經理最後一個到達𨋢口，目光同樣被眼前呢部𨋢吸引住。三個人當中，就只有媚姨最鎮定。
對於習以為常嘅嘢無人會覺得稀奇。媚姨望住正在發呆嘅黃經理同Fiona，完全摸不著頭腦，與此同時，部𨋢已到達，𨋢門緩緩地打開。
𨋢裡面一啲燈光都無，不過單憑外面嘅光線，仍然可以見到裡面一片血紅色，狀甚恐怖，彷彿變成另一個空間。
「弊！」黃經理心頭一寒，一手將Fiona拉停。隨住𨋢門打開，四周圍都慢慢被血紅色吞噬，仲傳出一陣濃烈嘅血腥味。
一隻粗大嘅手由𨋢入面伸出。媚姨背向𨋢門，只見到黃經理同Fiona嘅表情變得十分詫異，卻沒有警覺到背後發生嘅事情。
「呀…呀呀……」媚姨突然痛苦地叫了出聲，卻講唔到半隻字。
一隻粗大嘅手一下子就從後扼住媚姨條頸，單手就將媚姨成個人抽起。一把刀係𨋢內揮過一下，然後一攤血飛濺出來，染紅咗𨋢口嗰個「3/F」指示牌，媚姨嘅右臂齊整地跌喺地上，佢亦無再發出任何叫聲。
嗰隻粗大嘅手輕而易舉地將媚姨嘅頸椎揑碎，手勢純熟得好似扭揑汽水鐵罐一樣。
Fiona同黃經理被眼前呢一幕血腥嘅畫面震懾。佢哋都知道，頭先好唔容易先逃離八樓，宜家又再次面對嗰個攞住切肉刀頭帶鐵面罩嘅「豬肉佬」嘅威脅 - 黃經理就係咁樣稱呼眼前呢個怪人。
黃經理最先回過神來，再將Fiona拉埋自己身邊，叫道：「走啊！」
豬肉佬一手就將媚姨嘅屍體拋喺地上，然後步出，向黃經理佢哋嘅方向趕上去。
黃經理同Fiona手拖手拔腿狂奔。
佢哋意識到四周環境會隨住豬肉佬嘅出現，產生咗强烈異變，大量嘅血由牆裡面一下子滲出，整條走廊嘅地下都有血水溢出，附近嘅門同鐵閘亦突然銹化。香檳大廈三樓彷彿變成血池地獄，令人充滿恐懼。
雖然驚恐嘅感覺仍然非常強烈，但黃經理同Fiona就已經開始跋足狂奔，打算直撲去後樓梯落地下逃生。「Fiona唔好望後面呀，跟住我跑呀！」黃經理大聲叫道。
「我好驚呀……」Fiona著住高踭鞋，落樓梯嘅速度比平時仲要再慢幾步，後面嘅豬肉佬亦一步一步追住佢哋。不安感籠罩四周，突如其來嘅異變令人感到一切都在褪色、衰老、落後，最後只剩低血紅色嘅殘舊。
三樓……二樓……一樓……地下……黃經理先行一步衝落去地下，發現有兩邊出口，一邊通向香檳大廈嘅大堂，另一邊則可以由後巷逃出大廈。
不過，正如黃經理之前嘅預計一樣，兩個出口都被鎖上。通向後巷嘅鐵門被一條粗如嬰兒手臂嘅鎖鍊纏實，而通往大堂嘅防煙門則被幾塊木板從裡面釘住。
後樓梯嘅地下係一個死胡同。
緊隨其後嘅Fiona剛好到達地下，氣都未抖定，黃經理已經一手拉住Fiona立即沿樓梯衝返上去一樓，無浪費半秒時間。
黃經理向二樓望上去，樓梯轉角隨住豬肉佬慢慢接近而產生血紅色異變，原本已經殘舊嘅牆身油漆不斷剝落，暗紅色鋼筋亦慢慢暴露於空氣之中。
「宜家只有一條路走……」黃經理暗忖。
香檳大廈B座一樓全層都屬於同一間時鐘酒店，而酒店後門則連接住黃經理宜家身處嘅呢一條後樓梯。
時鐘酒店範圍同後樓梯只係一門之隔，呢一道門就成為咗黃經理同Fiona生死存亡嘅關鍵。如果開得到門，起碼仲有路逃命；但如果開唔到門，就要硬住頭皮同豬肉佬死過。
不過，運氣似乎唔多好嘅佢哋發現，門嘅外面並無門柄，即係話呢道門只能夠從裡面打開。
「無辦法喇，希望撞得開啦……」黃經理將Fiona拉埋一邊，自己退後兩步，然後猛力向門衝撞。佢強忍住肩膀撞擊之痛，只求可以撞得出一條逃生嘅路。
「呯﹗」、「呯﹗」、「呯﹗」堅實嘅門被黃經理撞到前後搖動，但仍然未能被撞開。佢一心只顧住撞開呢道逃生門，無留意附近嘅地方已經開始被蠶蝕。
豬肉佬雖然移動得比佢哋慢，但已經從二樓行緊落一樓，手上攞住閃著精光嘅切肉刀，就如死神攞住催命符一樣。
「啊﹗佢落到嚟喇﹗」Fiona一邊望住豬肉佬紅色嘅鐵面罩，一邊尖叫。
火燒眼眉，Fiona加入黃經理嘅撞門行動。
異變嘅世界令所有事物變得殘破，卻同時亦令得呢對後門嘅螺絲變得生鏽及脆弱。黃經理眼見豬肉佬已經越迫越近，已經到達樓梯轉彎處，就只差半層就落到一樓，佢就越發用力撞門。
突然間，後門嘅門「呯」的一聲被撞開，撞擊嘅衝力一時未能停止，黃經理同Fiona兩個人同時跌倒喺地下。
後門之內係一條長長嘅走廊，兩邊都有出租嘅客房，牆上面每隔兩米就有一對泛黃嘅裝飾燈對稱地亮著，一直伸延到走廊末端，燈泡發出嘅黃色燈光局部地反映喺米白色牆紙上，格外陰沉。
黃經理用手撐起自己，一仆一跌爬起身，然後幫忙扶起Fiona，沿走廊向酒店中央逃走。佢不時回頭望，只見豬肉佬企喺後門逗留，並無追入時鐘酒店範圍，然後就慢慢地轉身朝地下方向離開。
呢一點，黃經理真係始料不及。
不過，佢深知道自己一定要走出呢度：「唔理呢度係乜嘢鬼地方，我一定會返得出去！」
黃經理捉緊Fiona條腰，企定喺度望實後門，生怕豬肉佬會再次重返。佢哋同後樓梯距離約十幾米，如果豬肉佬真係回頭，都起碼有一段緩衝區域逃走。
而隨住豬肉佬嘅離開，異變嘅空間恢復正常，睇唔出半點異樣。
「哎……好痛呀……你……你…放一放鬆手先……」Fiona忍唔住發出了一下嬌嗲嘅聲音。
「Sorry，我太緊張喇，係咪整到你好痛呀？」黃經理面都紅哂，剛剛扶住Fiona走時情況危急，不自覺攬得佢太緊。
「咁又唔係嘅，少少啦……」Fiona越講越細聲：「對腳痛啲……」黃經理望一望Fiona對腳，雪白嘅小腿上呈現一撻撻瘀傷同血痕，估計應該係啱啱撞門時受傷。
「你仲行唔行到？」黃經理懇切地問。
「我OK 呀……哎呀……」Fiona正想踏步向前行，但話口未完就差啲再次跌低，幸好黃經理眼明手快捉實Fiona，令佢不至於跌倒。
「睇嚟你唔止撞瘀，似乎仲扭親隻腳……」黃經理踎低身，幫Fiona解開高踭鞋嘅扣，然後擰轉身同Fiona講：「上嚟丫，我孭住你走。」
Fiona心頭湧起奇怪嘅感覺，佢猶豫咗一陣，便將身體依靠喺黃經理背上。
就係咁樣，黃經理孭住Fiona，沿時鐘酒店嘅走廊緩緩向前行。而Fiona對高踭鞋就仍然留喺走廊上。
(待續)