全實景系列《香檳大厦 1:55 am 行人止步》重製版 (已完結): 第十七章：【被埋藏的怨恨】
1:55 - 香檳大廈1/F 戴東尼酒店
「我……係咪好重呀？」Fiona見到黃經理好似好吃力咁孭住自己，好唔好意思咁問。
「當然唔係啦。」黃經理用力再托起喺佢背脊上面孭住嘅Fiona：「我估你應該無100磅添，係咪？」
事實上，由於頭先太用力撞開後門，黃經理右邊手臂已經撞到瘀晒，要用力孭住Fiona著實係有啲勉強，不過作為一個有風度嘅男人，佢唔想令Fiona感到尷尬，只好繼續强忍住手臂嘅痛，用力孭起Fiona。
「八卦！唔話你知！」Fiona細細聲喺黃經理耳邊講，發揮不自覺嘅魅力，如蘭嘅呵氣竄入黃經理耳中，令佢全身毛管舒張。
黃經理極力控制自己混亂嘅思緒：「畀我孭住咗，一定係要貼到咁近講嘢㗎啦，無特別嘢嘅！」。雖然Fiona唔重，但身體仍然隨住黃經理嘅步伐慢慢滑落。黃經理又再輕輕逗起Fiona：「前面右轉係酒店嘅櫃檯，嗰度有排梳化位，我哋喺嗰度休息一下先。」
Fiona見到黃經理强忍住尷尬嘅神情，而且一臉正經，就不自覺由心入面笑出嚟：「眼前呢個男人好單純呢。」
「咦……你又知前面有張梳化嘅？」貪玩嘅Fiona又再哄到好埋，喺黃經理耳邊細細聲問：「你……成日同人嚟呢度㗎？」
黃經理聽到呢個問題，嚇到三魂唔見七魄，立即回應說：「無……無…無無無呀，Fiona你唔好誤會呀……」黃經理吞一下口水再說：「呢間戴東尼酒店係我哋平時合作派安全套嘅地方，我或者啲Parttime佢哋間唔中會上嚟畀啲禮物仔畀老闆派畀佢啲客，又或者幫佢哋佈置一下啲裝飾咁啦……」
「哦，原來係咁…」Fiona若有所思，然後又問：「咁你自己嚟過未呀？」
「吓，嚟過邊度呀……」黃經理結結巴巴反問。
「時鐘酒店啊，爆房會去嗰啲呢？」Fiona又再試探，黃經理已經被佢問到面紅耳赤。
「無嚟過喎…」黃經理輕輕帶過：「到喇，你坐吓先啦。」佢走近雙人梳化，慢慢將Fiona放喺梳化嘅一邊。
戴東尼酒店櫃檯嘅範圍呈四方形，好闊落，牆上掛住幾幅充滿歐陸風情嘅圖畫，同酒店其他擺設相比，顯得格格不入。整間酒係一個環形設計，櫃檯左右兩邊有一條相連嘅迴廊貫穿，即係話如果你從左邊走廊開始一直向前行，最終會抵達櫃檯右邊嘅走廊入口，重返同一地方。
整個環形走廊嘅左右兩邊一共有42間客房，整間時鐘酒店足足佔用成層香檳大廈B座一樓嘅空間，如果以市價$120蚊雙鐘計算而全部租出嘅話，每兩個鐘最少賺五千蚊。雖然聽上去利潤非常高，但競爭對手亦十分多，而且只係同一條街內，時鐘酒店嘅數目已經超過十間，所以要同時全部租出應該係一件無可能嘅事。
所以，呢啲時鐘酒店都會樂於同唔同嘅團體合作，搞下啲噱頭嘢，增加自己嘅受歡迎程度。
「咦，棵聖誕樹上面有你哋啲套喎。」Fiona坐喺梳化，撥弄旁邊嘅假聖誕樹。
黃經理走埋去睇棵聖誕樹，記得呢棵樹係三年前同阿琛搬上嚟，送畀戴東尼酒店做裝飾之餘，又可以定期掛啲安全套同補給小冊子，上嚟酒店嘅情侶可以隨便睇下，亦可以攞嚟自用。
「原來仲喺度，以為已經清咗添。」黃經理笑住咁講。
「你哋都幾花心思做呢啲性教育吖，我一向好buy你哋㗎！」Fiona一邊捽住住自己嘅小腿一邊講。
「其實酒店都歡迎呢啲免費裝飾，佢哋多個賣點，客人又有免費安全套用，對我哋嘅預防愛滋病工作真係有好大嘅推動嘅。」黃經理喺樹頂攞咗個安全套嚟睇：「咦…仲係機構嘅舊Logo？」
黃經理所屬嘅機構因應25週年紀念，特別重新設計過一組新Logo，自此以後，所有派發嘅安全套上面都應該貼有新Logo貼紙。
黃經理細心地檢查聖誕樹上面所有安全套包裝，發現全部都仲係用緊舊Logo。
「2014年11月……」黃經理暗暗默唸，然後沉思咗一陣。呢個月份係黃經理第一次上嚟戴東尼酒店擺低棵聖誕樹嘅時間。
突然，櫃檯嗰邊傳嚟電話響聲，喺呢個寂靜嘅環境簡直係將黃經理同Fiona嚇個半死。Fiona立即縮起雙腳到梳化上，用手緊緊抱住膝頭，定睛地望實酒店櫃檯。
黃經理亦一直望住櫃檯嗰邊。電話響咗好耐，佢有幻想過會有人會走出嚟聽電話，但究竟係乜嘢人，佢並無頭緒。
電話一直在響，佢幻想中嘅情節終歸沒有出現在。
黃經理大膽地行過去櫃檯，想睇吓應該點處理。
「喂，小心啲啊。」Fiona向黃經理拋了一句。
黃經理向Fiona點了點頭，表示知道，然後望住檯頭呢部好普通嘅按掣式電話，按鈕上方嘅細小屏幕顯示住「R43 incoming call」。黃經理吸一口氣，慢慢將聽筒攞起，然後貼緊耳邊。
黃經理忍住呼吸，用手遮掩聽筒下半部通話嘅部份，對方一邊並無任何聲響。佢都唔肯定自己等咗幾耐，然後決定先出聲：「喂……」
「刮……刮……刮……刮……刮……」緊接住嘅係一下一下類似用手指刮牆壁嘅聲音，令人毛骨悚然。響咗十幾下後，電話嘅另一邊傳嚟一把女聲。
「畀……返……個……心……我……」女人嘅聲音幽怨，而且講得好慢，黃經理全身毛管都戙起晒。
「咔咤」一聲，通話突然停止。
黃經理嚇到呆咗，寒意打從心底裡冒出來。佢慢慢放低電話，不過佢並無將聽筒放返入機座，只係隨意放喺枱面。
佢唔想個電話再響。
「個電話……講乜嘢呀……」Fiona試探黃經理。
「無嘢……無嘢……無聲……」黃經理嘅心不斷狂跳。佢按住自己心口，心跳嘅感覺好實在地傳到手掌心，佢諗返起頭先把女人聲講嘅嘢，就好驚自己個心會被人攞走。
櫃檯除咗電話之外，仲有個筆筒，裡面有幾枝筆同埋一把鉸剪，旁邊亦有一疊已經被搣咗一大半嘅白紙。對於一個酒店櫃枱嚟講，呢個擺設未免顯得十分簡陋。
黃經理打開下面個櫃桶，見到一枝黑色長柄手電筒。佢將手電筒攞上手量一量，發覺都幾重，可以當武器用，再推開電源開關，一道白色强光由電筒一端發出。
「睇嚟我哋搵到件好嘢。」黃經理向Fiona揚一揚手上嘅電筒。
Fiona豎起手指公，嘴角露出一絲甜甜嘅微笑，黃經理又開始有點面紅。
櫃檯嘅旁邊係酒店正門嘅出入口，一對木門上面有兩扇磨沙小玻璃窗，木門上面掛咗個小木牌寫住「歡迎光臨」。黃經理嘗試轉動門柄，但門顯然被鎖住。
黃經理轉個身，擺出一副無辦法嘅樣子。
但最令人吃驚嘅事情就喺呢個時候出現 - 有人喺外面搖晃道木門，發出「窿窿」嘅聲音，嚇得黃經理即刻擰返轉頭，仲後退咗兩步。
木門被搖晃幾秒後便靜止，黃經理驚魂都未完全安定，一副朦朧嘅臉孔就突然緊貼磨沙玻璃，將佢嚇到跌喺地上，連爬帶走奔向Fiona嗰邊：「走！」
黃經理橫抱起Fiona，急忙轉入左邊走廊逃走，直至盡頭嘅彎角先停低落嚟向後望。「好似無追嚟呀。」Fiona攬住黃經理條頸。
佢哋聽唔到破門聲，聽唔到吼叫聲，聽唔到腳步聲，似乎真係無入到嚟。
一輪驚嚇嘅逃走，令黃經理忘記呢一刻佢同Fiona係貼得幾咁近。Fiona抖氣時嘅身體起伏黃經理完完全全感受到，佢醒覺咁樣攬住好似太親密：「Fiona，我想攞少少嘢，放低你先，可以嗎？」
Fiona亦有同樣感覺，雖然自己唔介意，甚至幾享受，但既然黃經理出到聲，佢都唔好意思要人哋繼續抱，佢扶住牆企埋一邊：「嗯，我可以企到。」並接過黃經理手上枝電筒。
黃經理喺褲袋攞部電話出嚟，走到不遠處嘅一道牆前面，用相機影低嗰幅類似地圖嘅東西。
「呢度係後梯……呢度係門口……咁中梯嘅門口呢……等等先……13……26……39……計埋呢三間……得42間……」黃經理喃喃自語，研究戴東尼酒店平面圖。
雖然喺平面圖上見到酒店所有房間嘅位置，但似乎解釋唔到黃經理心入面嘅疑惑。剛剛喺櫃檯聽嘅電話，來電顯示係R43，估計應該係指第43號房間，而呢張圖則只顯示有42間房。
「R43喺邊？」黃經理疑惑。
「咦，後門道門頭先明明推冧咗㗎……點解唔見咗嘅？」Fiona嘅聲線分散咗黃經理嘅注意力。向走廊另一邊盡頭望去，嗰個原本係佢哋撞爛咗道門之後跌低嘅地方，宜家乜都無。
黃經理扶住Fiona一步一步行過去，想搵出事情嘅真相。
牆上嘅燈一閃一閃，隱隱約約，令氣氛變得懸疑又恐怖。黃經理邊行邊留意房間嘅門牌，15……16……17……18……，梅花間竹左右分佈。不消十秒，已經行到下一個轉角位，左邊係後梯嘅出口，右邊係第27間房開始嘅走廊。
後梯嘅門原好無缺，完全無被撞爛過嘅跡象。
「奇怪，明明我同你一齊撞爛道門㗎喎，點解會無事嘅？」Fiona捉實黃經理隻手發抖，恐怖嘅事似乎又再次迫近。
「點解嘅？」黃經理毫無頭緒，望向另一邊走廊，Fiona放低咗嘅高踭鞋亦消失得無影無踪。
牆上嘅燈再次閃動，黄經理二話不說，扶起Fiona急步走返出櫃檯方向走。
正門外面已經無咗嗰副朦朧而又嚇人嘅面孔，除咗啲燈閃咗一陣之外，一切都無乜異樣。
「啊﹗啲畫……好恐怖呀……」當Fiona坐返喺梳化休息嘅時候，發現牆上面原本充滿歐洲風味嘅油印畫，變晒一幅幅黑白色嘅無意義塗鴉。
油印畫嘅塗鴉隱約滲透恐怖意味，一笪笪白色顏料，驟眼睇似人頭，但輪廓卻模糊不清，令人毛骨悚然。
另一方面，黃經理卻係櫃檯範圍內，聽到一陣好微細嘅聲音傳出 - 沙沙聲之中夾雜人聲。
「咁奇怪？只係行咗一圈，點解四週圍嘅嘢會唔同咗嘅？」黃經理謹慎地掃視住周圍環境。
如果喺一個正常嘅情況底下發生啲咁嘅事，黃經理一定會以為被人整蠱。但喺呢個變得咁恐怖嘅香檳大廈內，似乎所有奇怪嘅事都有可能發生。
黃經理雙手輕輕放喺Fiona膊頭上：「如果一陣有咩事，你要自己走先，知道嗎？」
Fiona擰擰頭，嘟起咀：「唔得，我驚，同行唔到，我要你同我一齊走。」講完呢句說話，Fiona將電筒交返畀黃經理。
其實佢嘅腳傷唔係太嚴重，要自己行其實唔係唔得。只不過Fiona係想同黃經理一齊走，或者佢唔想再經歷多次被丟低嘅感覺。
黃經理見到Fiona面上出現了一陣緋紅。
知道自己點都唔會勝出呢場爭論，黃經理只好乖乖拿回手電筒，小心翼翼走過去櫃檯，預計會突然有事情發生，所以佢已經擺出咗準備攻擊嘅姿勢。
櫃檯後，一個人都無，所有擺設仍然依舊，只係，多咗一部收音機。
沙沙嘅聲音從收音機發出，黃經理皺起眉頭：「幾時多咗部收音機㗎？」
正確嚟講嗰部應該係「卡式錄音帶播放器連收音機」，屬於黃經理後生時代嘅產物，喺宜家呢個智能電話社會，呢類古董已經買少見少。
播放器嘅喇叭位置差不多佔據咗成部機嘅一半面積，沙沙嘅聲音中夾雜住一把人聲，好難聽清楚說話嘅內容。
黃經理嘗試調高播放器聲量，人聲突然變得清晰。
「沙……沙沙……今晨尖沙咀發生嘅持刀脅持案，男戶主脅持太太同一對分別八歲及六歲年幼子女。對峙六個鐘頭後，警方終於破門入屋，但遇上男戶主激烈反抗，混亂中女戶主及一對子女頸部被刀刺中死亡，而男戶主則被警方開槍擊斃，事件中有兩位警務人員受傷。現場係尖沙咀金巴利道16號一座單幢式大廈七樓一個住宅單位……沙沙……沙……」
「新聞報導？」黃經理真係覺得好奇怪。收音機又再響起人聲：
「沙……沙沙……尖沙咀香檳大廈B座一個辦公室單位，早上發現人體殘肢。據消息指，現場係一間內衣批發公司。早上八時，職員上班時發現辦公室大閘未有鎖上，覺得有可疑，進入辦公室後見到有血跡，櫃桶及夾萬有被搜掠過嘅痕跡，並喺洗手間內發現一對斷手，職員大驚報警。警方到場調查，於辦公室倉庫內發現其他部分殘肢。經初步分析，死者為該內衣公司負責人，死亡原因仍然有待進一步調查，初步懷疑涉及勞資糾紛……沙沙……沙……」
黃經理默言，報導仍然繼續：
「沙……沙沙……一身材魁梧男子被發現昏迷於尖沙咀金巴利道16號香檳大廈二樓梯間，身中百多刀，救護員到場搶救無效，當場死亡。該名男子生前屬於三合會同興記成員，活躍於尖沙咀一帶，綽號「大刀」，主要負責替組織執行「家法」，上址為同興記尖沙咀分會地址。因時值總督衛奕信爵士新上任不足一週，警方大為緊張，有組織罪案及三合會調查科將接手調查……沙沙……沙……」
「沙沙……沙沙……尖沙咀發生兇殺案，一名女子被大量裝修用石膏粉封埋於尖沙咀一時鐘酒店浴缸內，被發現時已身亡，屍體被石膏嚴重灼傷至難以辨認。由於石膏粉遇水發熱及凝固，警方連同忤工總共花約6個鐘頭時間將屍體搬離現場，由於未有發現身份證明文件，屍體被送往葵涌公眾殮房暫時存放。現場係尖沙咀金巴利道16號香檳大廈一樓戴東尼酒店，早上7時……沙沙……沙……」
收音機不停重覆播放呢幾段新聞，但錄音帶位置卻係空嘅。黃經理嘗試調教收音機，但似乎亦只接收到呢個頻道。「呢度其中一間房曾經係兇案現場……」黃經理心知不妙，吞一吞口水，將手裡面嘅電筒握得更緊。
「R43。」佢心中再次浮現出呢組字：「係咪呢間房？」
「嘟嘟……嘟嘟……」旁邊嘅電話又再響起，沉思中嘅黃經理嚇到彈起身，Fiona亦「啊」一聲叫咗出嚟。猶有餘悸之餘，黃經理又心生一點點憤怒，一手拎起電話大叫：「我警告你唔好再玩電話呀﹗」
眼尾一望，來電顯示仍然係「R43 incoming call」。
黃經理心頭狂跳，意會到自己可能係鬧緊一隻鬼。佢覺得成件事好荒謬同好唔實在，所以當破口而出之後，反而冷靜咗落嚟。
電話另一方毫無動靜，只存傳嚟空洞嘅空氣聲，然後又突然收線。呢個時候黃經理記起，啱啱聽完第一次電話之後，佢只將電話聽筒放埋一邊，但今次佢決定將電話線拔走，唔畀部電話再響。
收音機仍然重覆播放新聞，黃經理將收音機聲量收細，行到櫃檯外面，背靠櫃檯慢慢坐落地下，佢覺得好累，抱頭沉思：「唉，點先可以離開到呢幢嘢……」
Fiona見狀，一拐一拐地走過去黃經理旁邊坐低。佢哋兩個人都無出聲，呢場沉默嘅寂靜亦唔知道維持咗幾耐。
「Fiona，我哋行啦。」黃經理抬起頭，心中有個盤算：「宜家後門走唔到，前門又走唔到，但應該仲有一度門連接中梯……」
「去邊呀？」Fiona問。
「搵出口，呢度環境會轉變，再變落去唔知會有乜嘢事發生。香檳B座有三條樓梯，我哋宜家去搵第三條樓梯，睇下有冇機會走……你隻腳無乜事嗎？」黃經理左望右望，仍然小心留意周圍環境。
「我OK呀，不過你拖住我行會好啲……」講到呢度，Fiona主動拖住黃經理隻手，抬頭望住黃經理。
「……咁你跟實啲。」黃經理用力拖起Fiona，再次向右邊嘅走廊前進。
甫一踏進走廊，佢哋就發現勢色唔對。走廊左右兩邊嘅房門號碼全部消失，只有一式一樣嘅白色房門。
雖然無晒號碼，但黃經理喺第一次行過走廊時曾經影低酒店嘅平面圖，而事實上，佢自己都記得房間嘅排列。
「每走過一個轉角，就有13間客房。」佢提醒自己。
記憶所及，第一次行經走廊時並無見到連接中梯嘅門口。「唔通喺房入面？」黃經理嘅猜測，只能夠透過進入客房檢查來證實。
佢順住次序扭一扭左右兩邊嘅客房門鎖，全部都係被鎖上，一直到走廊末端。
牆上面嘅燈又開始閃閃下。突然間，所有嘅燈都熄晒。
漆黑一片，心驚膽顫。喺黑暗之中，黃經理同Fiona聽到一下清脆嘅「咔咤」聲，
似乎係有一道門被打開。
Fiona更加用力捉緊黃經理隻手。同時，黃經理按下手電筒電源掣。一道弱弱嘅光線向走廊牆身照射。
手電筒向另一邊走廊照射，左右兩邊房門排列整齊，右邊中段位置出現一道黑色夾縫。
黃經理發現其中一間房門被打開。剛剛嘅開門聲，好可能就係由呢間房發出。
「過去睇下，好嗎？」黃經理細細聲問Fiona。
「我好驚呀，唔好啦……」Fiona嘅精神狀態似乎已經去到臨界點，唔敢再冒險。
「一係你喺門口等我，我好快咁入去睇吓？」黃經理再提議。「你唔去得唔得啊？」Fiona叫停黃經理，唔想佢去涉險。萬一豬肉佬再次出現，捉走黃經理，Fiona就會失去唯一嘅依靠，佢亦無可能獨自承受一個詭異嘅環境。
Fiona清楚知道自己對黃經理有好感，喺危險裡面，呢一種感覺越發明顯。
「Fiona，你聽我講，我都好唔想去，我都好驚，我知道你都一樣好驚，但如果我哋唔行出去睇下，留喺呢度都唔係辦法。」黃經理輕握Fiona雙臂認真地講：「你跟實我，唔好離開太遠。可以嗎？」。
Fiona遲疑一陣，終於都點點頭。
871215(李先生)
黃馬太已在2020年10月2日 23:42看過
由Lo Ve Angel所傳送
23:55
有種部隊 Guts Army
佢哋只有一枝電筒，照到前面嘅地方，照唔到後面。Fiona抱實黃經理條腰，合上眼睛，不敢向四週張望，怕有其他怪物從後面走廊出現。
黃經理慢慢向走廊中段開咗嘅客房門口前進。到距離只有五六步嘅時候，黃經理用手電筒照一照門隙，無特別異樣。
去到客房門前，黃經理赫然發現，唯獨呢一間客房門上有記號 -- 手寫紅色「Room 23」字。黃經理吸一口氣，再伸出右手推門。
因門鉸生銹而發出嘅磨擦聲響徹整個走廊，黃經理感覺到Fiona身體隨即震動咗一吓。
客房內嘅空間不太大，電筒光線照射到不遠處嘅地方就已經係床邊，白色床單中央有一大片血紅色污漬。黃經理暗罵自己倒霉：「搵樓梯出口又唔見一搵就中，偏偏一開門就遇上呢啲嘢！」
R23係唔係新聞報導所指嘅兇案發生地點，相信只有走入去先會知道。但走入呢間客房，又會發生乜嘢事呢？
用電筒開路，黃經理帶住Fiona大膽地走入R23。Fiona喺後面瞇住眼問：「宜家點呀？」
「裡面無人……有張床，有部掛牆電視……一張連鏡梳妝枱……」當電筒照射到梳妝檯鏡而發出反射光線時，黃經理從鏡中見到一個燈泡倒影，喺佢哋身後嘅房間出現，自左至右一閃而過，而佢都幾肯定自己無眼花。
黃經理立即擰轉身一望，燈泡又從右邊閃過左邊。喺呢個時候佢先真正睇清楚，有一個吊燈泡喺佢哋後面嘅房間，左右搖擺。
「我哋後面仲有一個洗手間，裡面有燈……」黃經理將情況形容畀Fiona聽，同時感覺到Fiona已經開始攬住自己行。
「我哋係咪要入去啦？」Fiona問，仍然唔敢打開雙眼。
「入去睇下有無線索吧。」黃經理回答，Fiona再無任何回應。
從廳位置望入洗手間，只見到個洗手盆同埋一塊半身鏡，睇唔到馬桶或者浴缸部份。
黃經理打斜行，想多借少少位觀察洗手間嘅情況，但只見到一塊拉起咗嘅白色浴簾，而馬桶蓋則已經放低，上面亦有好多污跡。奇特之處係，黃經理見到白色浴簾上，有一處向外突起，就好似有某啲東西正在向外指出。
喺好奇心驅使下，黃經理想大膽走入去洗手間：「Fiona，你鬆一鬆開手先……我想入去洗手間……裡面好窄，你喺門口呢度等我丫。」
「唔好丫……我好驚㗎……」Fiona又緊張起來。
「無事㗎……無事㗎……」黃經理再次安慰Fiona：「我要你幫手，你攞住枝電筒照住我，得唔得？」
Fiona勉為其難地點點頭，就接過黃經理手上嘅電筒，筆直地射向黃經理塊面，令得黃經理不得不擰開頭：「你冷靜少少，貼近呢邊牆，幫我照住洗手間裡面。」
「對唔住……」Fiona真係好緊張，仲覺得好凍。
「我入去喇。」講完之後，黃經理一步一步踏入洗手間。
洗手間吊燈泡搖晃不定，泛黃嘅燈光亦左搖右擺。牆上面部份磁磚已經剝落，馬桶蓋上有幾個黑色鞋印，地上則滿佈白色嘅灰。
「石膏粉？」黃經理又想起新聞報導嘅內容，不禁打了一個冷顫。
佢慢慢靠近塊白色浴簾，又再深深吸一口氣，快手將塊浴簾向下扯，心中已經預計，會見到一堆被石膏填滿嘅凝固物，同埋有一個人被埋喺裡面。
「啊！」雖然已經有預想，但黃經理仍然叫咗一聲。佢用手掩口，無諗過真實嘅會情況畀想象更恐佈，而且位置亦同新聞報導中有所不同。
一個血肉模糊，難以辨認嘅臉孔被嵌入浴缸旁嘅牆上。屍身大部份地方同樣都被封於牆壁之中，胸口有一個大約兩個拳頭大小嘅窿位，只有右手明顯地向前伸出，指向前方，形成浴簾上突起嘅位置。左手則握實拳頭，同樣外露，而且可以見到手心握有一條鎖匙，鎖匙上吊住一個牌仔，上面寫有「戴東尼正門」五隻字。
牆下嘅浴缸則有一束束頭髮，以及經由屍體指尖一滴一滴流出而形成嘅一灘血水。不過好奇怪，黃經理並沒有聞到任何血腥味。
「呀﹗」Fiona見到牆入面嘅屍體，被嚇到踎喺地上，用手遮住自己雙眼，唔敢再望。
喺搖曳嘅黃色燈光下，黃經理感到極度心寒，眼前畫面實在太恐怖，佢只有呆站喺浴缸旁。屍體嘅手指喺佢面前，由上而下直伸，角度剛剛指住佢心口嘅位置。
「畀……返……個……心……我……」黃經理記起電話中傳嚟嘅呢句說話，個心真係離一離。佢立即退後幾步，返出去抱住已經喊緊，而且不斷顫抖嘅Fiona。
黃經理從外面再望返入洗手間，發現屍體並唔係指向佢心口，而係指住黃經理身後嘅馬桶。
而馬桶旁有一部白色嘅掛牆電話喺正個馬桶隔離，上面有個紅色嘅貼紙寫住「R43」。
「R43係電話編號，唔係房間號碼……」黃經理視線返回馬桶上：「係咪應該揭開馬桶蓋睇吓？」
一個詭異嘅畫面突然出現：一副溶溶爛爛而且入咗牆嘅屍體指住馬桶，仲要攞住一條出口嘅鎖匙。黃經理真係呢世人都未遇過相似嘅事情。如果唔係因為條鎖匙，怕且佢一早就打退堂鼓。
「Fiona……Fiona……」黃經理見到Fiona被嚇到花容失色，覺得十分可憐。佢被Fiona緊緊抱住，只能夠摸摸佢個頭講：「無事㗎，佢唔識郁㗎……你睇下……」
「唔睇！好核突呀……嗚嗚……」Fiona哭著說。
「好好好……唔睇唔睇……但係佢攞住條大門鎖匙，我哋攞到鎖匙嘅話可能走到㗎。」黃經理安慰Fiona。雖然唔肯定鎖匙啱唔啱用，但佢都想畀個希望Fiona。
「等等先……你放鬆少少先…」黃經理繼續講：「我過去攞埋條鎖匙就走，好唔好？」
仍然喊緊嘅Fiona慢慢鬆開手，放開黃經理。
黃經理再次行去屍體前面，小心翼翼伸手扯下鎖匙吊牌，但唔成功。佢有諗過不如大力扯斷隻手，再將佢鑿開，但太血腥，佢過唔到自己嗰關。
「打機就天下無敵，唉……」黃經理心中苦笑。
佢再望一望隻手指，又望一望馬桶蓋：「會唔會係一個線索？」黃經理重覆思考：「畀返個心我……牆上面個窿……指住個馬桶……」
呢個似乎真係一個線索。
一個畫面突然出現喺黃經理腦海中：「有個女仔跟一個人嚟到時鐘酒店，然後發生爭執，女嘅被人喺床殺死，而且攞埋個心出嚟，掉落馬桶，而屍體則被放入浴缸，用石膏粉加水掩埋，屍體全身被加水後嘅發熱石膏粉導致嚴重灼傷，血肉模糊，石膏然後凝固，屍體被封在裡面……情殺……背叛……只有憤怒到極點嘅人先會下到咁重手……」
黃經理從心中嘆咗一口氣，人死咗，連屍體都唔放過，究竟仇恨嘅力量係咪真係咁大。佢都唔知點解自己會諗到呢點，冷靜咗一陣，就無再諗落去，然後嘗試用腳尖挑起馬桶蓋，「啪」一聲，馬桶蓋應聲反起，打喺後面嘅水箱。
馬桶裡面一堆黑色物體滿佈中間有水嘅地方，但燈光太暗，黃經理睇得唔清楚。「Fiona，可唔可以照一照過嚟？」黃經理叫道。
Fiona單手將電筒遞畀黃經理：「你可唔可以自己攞去照？我唔敢睇……」
黃經理攞過電筒一照，全身毛管立即戙起。
馬桶窿入面，最少有廿隻曱甴喺水上飄浮，下面似乎仲有好多，啲曱甴全部都唔郁，應該係死晒。但一堆密密麻麻嘅曱甴屍體，其實都係好恐怖。
黃經理打了個冷顫，擰埋一邊，唔敢再望嗰堆曱甴。曱甴係黃經理死穴，細細個已經好驚，以前仲試過畀曱甴爬上身，嗰種經歷嘅恐懼感覺歷久不衰，亦諷剌地令佢覺得鬼反而更容易接受。
「下面係咪真係有嘢㗎……隻手指都係亂指嘅啫，無意思嘅……」黃經理想說服自己，唔再朝呢個方向諗，佢快手將馬桶蓋放返低，同時大力呼一口氣。
「做咩呀？裡面……有咩嘢呀？」Fiona好驚，但又想知。
「唔……不如唔好問丫……」大部份女仔都驚曱甴，唔講似乎係一個好選擇。
雖然唔再睇到嘔心嘅馬桶，但之後點呢？黃經理腦海空白咗一陣子。
「搞咁多嘢令到我地入嚟，似乎又唔係一個偶然……但馬桶裡面真係會有個心喺度？」黃經理又諗：「如果佢真係嗰個受害人，佢都係想請求有人幫佢手……但咁多曱甴，真係好恐怖……其實都死晒，又唔會郁，無事嘅，最多唔好望……」
思緒混亂，諗到幾乎精神分裂嘅黃經理，佢決定先確認一下係咪有嘢喺馬桶裡面。
馬桶旁邊有一支廁所泵，佢將厠所泵上下倒轉，然後再次打開馬桶蓋。
一隻隻曱甴嘅屍體又再次浮現，黃經理瞇埋眼，用廁所泵嘅手柄篤向馬桶中央，仲未篤到好入，已經感覺到裡面有一舊嘢，佢再用手柄撩一撩，感覺上呢一舊嘢有一定體積。
「OK……之後點呢……」黃經理又呼出一口氣。
最直接嘅做法當然係伸手入去將異物抽出。
「死咗㗎啦……死咗㗎啦……死咗㗎啦……死咗㗎啦……」黃經理再瞇住眼，不斷咁催眠自己。旁邊嘅Fiona對發生緊嘅事情一無所知，但見到黃經理嘅反應，都預計到會比較負面。佢用手遮住自己雙眼，唔敢直望。
「好快嘅啫，一伸手入去捉住就抽上嚟，都唔駛兩秒，好快嘅啫……好快嘅啫……」佢一方面鼓勵自己，另一方面已經伸隻手入馬桶內。
當曱甴嘅屍體接觸到黃經理嘅皮膚時，佢本能地縮手，叫吼咗一聲；「啊﹗」抒發心中恐懼，同時想為自己增加膽量。
「OK……再嚟……再嚟……」佢再次伸手入馬桶，比上次再落些少，但同時亦接觸到更多嘅曱甴屍體。佢又再一次縮手。
要克服恐懼從來唔係容易嘅事。黃經理記起返工時面對嘅服務使用者，希望佢哋克服對愛滋病嘅恐懼，打破明知自己無感染風險，但仍然驚到要死嘅恐懼。佢哋要打破嘅假象，似乎比起宜家自己面對嘅情況來得更容易。
黃經理又大叫一聲，呢一聲叫得好響好長。佢忍住呼吸，一下子就將幾乎整隻左手伸落馬桶，一直到底，而右手則要按住馬桶邊，以平衡身體。大量曱甴屍體湧出，同佢塊面只有幾呎距離。
喺濕淋淋又拮手嘅觸感之中，佢摸到一個類似球狀又有彈性嘅物體，然後飛快地將個球狀物體捉緊並抽起，高舉喺慘黃色嘅燈泡下，成個過程只花幾秒時間。
一部份曱甴屍體隨住黃經理抽起嘅動作向外飛出，有幾隻跌喺馬桶邊，亦濺濕不少附近嘅地方。
燈光底下，一個鮮紅色嘅心臟滴住水，靜靜地擺係喺黃經理手心上。
黃經理呢一生人都無試過攞住另一個人嘅心臟喺手入面，呢個感覺實在太奇特，肉腍腍嘅手感令佢覺得好想嘔吐。
佢轉身面向浴缸，將手中嘅心臟塞入去屍體身上個窿度。一氣呵成，黃經理唔希望個心再留喺自己手上，多一秒都唔想。
黃經理向後退，攬緊Fiona，定睛地望實牆上面嘅屍體。
「1……2……3……4……5……6……7……8……9……10……」黃經理心中默數著時間，到第38下時，「叮」一聲，屍體左手握住嘅鎖匙跌入浴缸。
「跌咗……條鎖匙……出嚟……」Fiona驚訝地說。
黃經理都覺得太神奇，佢無期望過，通常打機先會發生嘅情節，居然喺現實生活發生。佢等咗一陣先慢慢跣過去浴缸嗰邊，觀察有無其他動靜。
大門鎖匙跌落血水當中，黃經理見四周無何異樣，就彎身去執鎖匙。而眼尾卻見到見到有粉狀嘅顆粒沼住浴缸邊流落嚟，心中產生不祥嘅預感。
「啊﹗」黃經理聽到Fiona喺背後發出驚慄嘅叫聲，佢以為Fiona係門口遇到怪物，立即起返身望出去。與此同時，一個黑影向黃經理飛過去，幸好佢能夠及時避開。
黃經理認得個黑影係一支廁所泵，亦同時見到原來係Fiona用枝廁所泵指住佢。
「Na姐你做乜嘢呀？」黃經理唔明白點解Fiona要用支廁所泵襲擊佢。
正當黃經理嘗試釐清目前狀況時，卻見到Fiona再次連人帶廁所泵衝上前，向住黃經理個頭打過去。
「啪」一聲，Fiona打中一隻出現喺黃經理頭部側邊嘅手。「走呀，佢郁呀﹗」Fiona聲撕力竭大叫。黃經理一個跨步立即退後，眼前嘅畫面真係畢生難忘。
牆上面嘅屍體扭動，一副血肉模糊嘅軀體想突破牆壁嘅封鎖，向前撲出。油漆大片大片地剝落，屍體嘅面上只剩紅色嘅肉，眼眶中一對黑白分明，卻又猙獰無比嘅眼睛，望實黃經理同Fiona。
黃經理拉住Fiona節節向後退，眼望屍體從牆壁掙脫，上身已經完全凌空，兩隻手按牆借力，想扯出仍然被困嘅雙腳。
佢哋兩個都被嚇得目定口呆，幸好黃經理比較快回復理智，冰冷嘅鎖匙觸感由手心傳出。「走……走走啦……」二話不說，黃經理已經拖住Fiona離開洗手間，想逃離呢間客房。
客房外嘅走廊仍然漆黑一片，喺電筒光照射之下，明顯見到兩邊走廊嘅牆壁都快速地出現血色嘅裂縫。裂縫之中，有好多細小嘅昆蟲向四方八面竄出。
「呢個環境又開始改變……」黃經理怕Fiona走得慢會墮後，索性抱起佢向櫃檯方向飛奔。
裂縫越裂越快，越裂越大，蟲仔從地面同天花板瘋狂湧出，形成一條差不多變成黑色嘅走廊。黃經理聽到身後嘅牆壁好似正在崩塌，亦聽到一把聲音叫道：「畀……返……條……命……我……」
「畀返個心你仲要攞埋我條命，痴線㗎﹗」黃經理大叫。
仲有幾步就去到大門，黃經理放低Fiona，飛快地走過去打開門鎖。
「快……快快啲，佢出到嚟啦﹗」Fiona大聲叫喊，佢見到一整個血肉模糊嘅屍體已經出現喺轉角，而後面就有一大堆昆蟲跟隨。Fiona不斷催促黃經理，緊張嘅心情已經掩蓋過對昆蟲嘅恐懼。
「點解唔得㗎﹗﹗」心急，但又開唔到大門，黃經理瘋狂用力扭鎖匙，但始終都係徒勞無功。佢吸一口氣，用一秒嘅時間冷靜落嚟，望住鎖匙同門鎖，發覺有異樣，門鎖上嘅字左右調轉。
第一眼辨認唔出係乜嘢中文字，再用多一秒鐘，黃經理先睇到係寫住「中國製造」。
只有鏡入面嘅影像先會出現呢個情況。
「啊﹗」女屍已經喺Fiona前面三四步嘅距離。佢合上雙眼，一隻手捉住黃經理膊頭，另一隻手掩住自己塊面，唔敢想像將會發生嘅事情。去到呢度，終歸一劫難逃。
Fiona感覺到，一隻手已經被扯住。
(待續)