我嘅工作就係揀我鍾意嘅女仔拍拖: 序

序 -

凌晨嘅油尖旺同朝早有好大對比，人來人往嘅馬路，係呢個時候變咗老鼠曱甴嘅天堂。但我近排好鍾意係呢啲時間行街，可能係因為我唔想對住咁多人，空無一人嘅街道令我好放鬆。

唔少人都會討厭或者怕自己一個人，因為覺得寂寞嗰陣，有時真係幾難捱。不過而家嘅我，寧願寂寞都唔想再害人。可能係壞事做太多，有時自己都會因為僅餘嘅惻隱之心而控制住自己。

慢慢，我行到去旺角嘅一個路口。正當我難得地可以點起支煙嘅時候，手機響咗。手機上面顯示：+852 9128 xxxx
我冇save到佢電話，而我知道佢係邊個。因為，佢今日已經第十三次打嚟...

「喂？」我開口。




「......」過咗好幾秒都冇人講嘢。我亦都唔急住出聲。
「...你真係諗清楚？」一把柔弱嘅女聲問。
「嗯，我地冷靜下啦」我用懶洋洋嘅聲去講，冷漠到連自己都覺得會唔會做得太過份。
「我真係好唔捨得..」佢話。
我緊係知你唔捨得，但係對唔住，我係冇可能會同到你一齊。當然，呢一句佢係唔會知道。
「性格不合嘅話，再拖落去都係會散。你知道嫁」我按照返佢地教我嘅講法去答，我要塑造返分手嘅責任唔係我度嘅感覺。不過呢啲情況我都已經見過太多次，就算你講唔捨得，其實都只係一種習慣。
「我知我有時候係會發你脾氣..但係我唔係有心嫁。我知我有時會好唔理性，有時又好情緒化..但係..」佢越講就越有想喊嘅感覺。佢係一個好女仔嚟，我知佢岩岩喊完冇耐，我都廢時又再整喊佢。

「我求下你..比多次機會我，求下你吖...！我淨係想開開心心咁同你一齊炸...。bb..可唔可以...」佢情緒開始唔穩定。我吞一吞口水，諗緊點樣解決。





呢一刻嘅我同一個果斷決定分手嘅男人一樣，只係不停諗方法撇開呢個女人，所有甜蜜嘅回憶係呢一剎只會變成嘔心嘅感覺。當然，有咁嘅諗法係因為我唔想再傷害佢。純粹因為一條聽落好仆街嘅公司規矩。

我聽佢講完再小心翼翼咁處理好呢通電話就收咗佢線。我算唔算係鍾意過佢呢？點都有啲嘅，但始終我真係見過太多唔同類型嘅女仔。好難再有女仔會令我心動，加上工作嘅性質，我慢慢變咗一個好虛偽嘅人，收起咗自己嘅真感情好耐了。

我重新拎起電話，打比另一個女人。電話好快接通咗：
「分咗啦」我話。
「好～執唒手尾？」一把好好聽嘅聲問我。
「嗯，應該唔會有咩問題」
「好啦。你係街？」佢又問。
「掛住我？」




「你上次係咪話要休息兩個禮拜」佢無視咗我嗰句。
「嗯，可唔可以？」
「咁岩有個新人頂住先，老細批咗」
「唔該唒。咁你呢？」我再問佢。
「我可能做埋最後一單就唔做」佢好平靜咁講。
「真係！？點解嘅？」我平靜嘅語調終於因為佢呢句有啲起伏。
「可能姐。你快啲返去啦，夜啦」
「你關心我？」我乘勝追擊。
「係咁啦，掰掰」佢講完就直接收咗我線。…

會發生呢一切一切，都係源於幾年前嘅一個夜晚，令我嘅人生注定比其他人特別。

特別幸福辛苦