《求婚嗰日，我發現我女朋友鍾意食屎》: 五十八

嗰一晚嘅激情擁吻，就好似打開咗潘朵拉盒子一樣，將丘志傑同向彩萍之間本來封閉嘅感情都倒哂出嚟。
往後嘅日子裡面，當兩個人喺夜總會相見嘅時候，彼此都會好自然咁挨住或者攬住對方，就好似一對熱戀緊嘅情侶一樣。
而兩個人同情侶嘅唯一分別，就係佢哋從來都唔會離開夜總會見面。
向彩萍當然明白箇中原因，但係對佢嚟講，佢亦都唔奢望自己同丘志傑嘅關係有見得光嘅一日。
 
所有有一次，當向彩萍收工嘅時候拉住丘志傑走到夜總會門口。
本來，丘志傑已經準備好自然咁鬆開手，但係向彩萍即刻拉住咗佢，好嗲咁同佢講一聲：「可唔可以同我影張相？」
喺一早夾好嘅阿娟配合之下，呢張相好快就影完。
當呢張相哂咗出嚟之後，向彩萍當然知道丘志傑唔方便保存，所以佢就叫丘志傑喺上面簡單寫啲嘢，當係送俾自己嘅禮物。
當時微醉嘅丘志傑喺相嘅背後簡單寫咗「天長地久」四個字，再加上自己個名，然後就將相交俾向彩萍珍而重之咁保管。




對向彩萍嚟講，呢張相就好似係佢嘅心願，希望有朝一日佢可以同丘志傑光明正大咁行喺街上面，天長地久咁過日子。
 
有時候向彩萍覺得自己好似《倩女幽魂》嘅聶小倩咁，永遠同丘志傑一齊嘅時候，都只可以喺最陰暗嘅地方，好似一見陽光，佢就會永遠消失咁。
雖然係咁，但向彩萍又覺得只要能夠繼續擁有見到丘志傑嘅時光，即使不見天日，依然可以係一種幸福。
所以，向彩萍就索性任由呢段關係繼續喺黑夜發展。
可惜嘅係，即使黑夜幾咁漫長，但係黎明始終都會來臨。
黎明為他人帶嚟係通常都係希望，但係偏偏，對向彩萍嚟講就係絕望嚟時刻。
 
事情係發生喺一個平平無奇嘅晚上。
今晚，丘志傑跟住佢老闆嚟到夜總會，同行嘅仲有佢哋首次接觸嘅大客。




丘志傑理所當然咁拉咗向彩萍喺自己身邊，並且簡單交代下眼前呢個大客有幾咁重要。
本來席上嘅氣氛都相當唔錯，但係直至呢個大客同丘志傑起咗衝突，場面就變得好混亂喇。
呢個大客首先用酒樽一下打傷咗丘志傑，而向彩萍眼見鍾意嘅人受傷，當然第一時間過去扶佢。
但係，呢個舉動偏偏就令到呢個大客更加氣憤，並且再拎起一個酒樽走向丘志傑。
 
當向彩萍望住丘志傑滿頭鮮血咁坐喺自己身邊，同時見到個大客拎住酒樽來勢洶洶，佢內心知道，要解決目前嘅危機，方法就只有一個。
「蠱」。
但當呢個念頭一閃過，向彩萍腦海入面即刻出現咗媽媽嘅聲音：「萍，記得，千萬不要在別人面前動用蠱咒，到時候公安捉你，別人也會疏遠你。畢竟，不是每個人都能接受『蠱』，更不是每個人都能接受他人的黑暗面。世上的人啊，即使知道這世界除了彩色還有黑色，但他們就是不願意接受。」
向彩萍望一望身邊受傷嘅丘志傑，佢知道如果自己呢個時候用「蠱」，丘志傑絕對有可能會發現嘅。
如果丘志傑發現咗，有可能就會因為自己嘅怪異而離開自己。




但係向彩萍同樣諗到，就係呢個人，一直無介意自己出身卑微，願意尊重自己、聽自己講嘢、愛錫自己。
既然佢連自己嘅出身都可以接受，咁佢會唔會都可以接受到自己識得用「蠱」呢件事呢？
 
呢個問題，連向彩萍都唔知。
但就喺呢一刻，向彩萍知道「蠱」係當前唯一可以救到丘志傑嘅方法，所以佢決定押上佢同丘志傑嘅關係，亦都決定相信丘志傑。
信佢，將會係一個願意接受自己一切，包括黑暗面嘅人。
 
向彩萍將隨身帶備嘅「赤木笛」拎出嚟，再用極速嘅手法將笛放入口度。
然後，佢改用非常獨有嘅呼吸法，令到「赤木笛」發出聲音人類都聽唔到嘅高頻聲。
就喺大客拎住酒樽準備向丘志傑扑落去嘅時候，一條手臂咁長嘅蜈蚣就落咗喺佢嘅手上面。
「啊！！！！！」大客鬧出咗佢腦海入面所有識得嘅粗口，但話口未完，又有幾隻大蜘蛛從天花板上面跌咗落去佢塊面度。
今次，大客無再大嗌，因為佢已經嚇到暈低咗。
 
呢一晚，就喺一場鬧劇嘅狀態之下完咗。
當其他人都走哂之後，房入面就只係剩翻低丘志傑同向彩萍。




向彩萍用繃帶幫丘志傑包紮傷口，而丘志傑就趁住向彩萍喺自己面前嘅時候，問咗佢一個問題：「頭先……你吹嗰枝紅笛係咩嚟㗎？」
向彩萍聽到，知道丘志傑果然發現咗啲嘢。
眼見呢一刻丘志傑嘅表情並無咩特別，向彩萍考慮咗一陣之後，佢決定將自己識得用「蠱」嘅事和盤托出。
因為，佢都想證實自己內心對丘志傑嘅信任係無錯嘅，呢個男人，係一個可以接受到自己黑暗面嘅人。
如果真係咁，向彩萍真係唔介意一世都做一個留喺黑暗入面，但係只屬於丘志傑嘅女人。