我喺迪士尼識咗個女仔: 8

過左一個風平浪靜嘅新年，有啲人事卻不請自來。

無錯，就係曉盈。某一個夜晚我收到佢電話。

「曦…我好醉，過黎接我…」聽住輕浮嘅聲音，諗起佢一臉天真嘅模樣，我唔忍心。但係我已經決定要放手，因為我仲有更重要嘅人要愛。

可惜，感性戰勝理智。
「蘇豪東唔該。」
「靚仔去飲酒啊？」
「唔係，接人。」




「哦，哇我之前喺呢度接過個醉酒佬，過海去觀塘，一路嘔一路行。好彩佢落車先嘔咋…」我無興趣聽的士佬廢話，只係想快啲見到曉盈。

佢係一個傻妹，真係真係傻妹。仲記得佢第一次同我黎嗰陣仲係朋友關係，佢話唔開心就飲酒，但係酒量真係好一般，啤酒level都頂唔順，又要扮成熟。

「如果我醉左就可以唔理傷心事了。」
「飲酒傷身啊…」
「點傷都唔夠情傷，你都唔明…」

依家我同妳都明了。





去到蘇豪東，我仲記得曉盈去邊間酒吧，一去到就見到佢一個人坐喺門口bar檯。

「喂，走喇…」我細細聲同佢講
「我唔走啊…我要等我男朋友接我…」
「我地分左手㗎喇，我送妳返去啦」

我放低錢，然後一個人拖住曉盈截的士。

「香港仔中心。」





全程車我都無講嘢，曉盈訓喺我膊頭上，除左實際上嘅重量，仲有心裡愧疚嘅重量。我虧待左佢嘅青春，走到談婚論嫁嗰陣結果各走他方；同另一個女仔嘗試大膽求愛，我呢個時候又送緊第二個女仔返屋企。

「一天一點傷心過 這一百數十晚
大概也夠我 送我來回地獄又折返人間
春天分手 秋天會習慣 苦衝開了便淡」

我真係好憎電台，次次都播啲催淚歌。我冷靜地打俾曉盈媽媽，叫佢落黎接曉盈。

「阿曦咁夜嘅，點解佢飲到咁醉嘅？」媽媽問
「我都唔知，係佢打俾我叫我去接佢。」呢個時候我把聲已經好沙啞
「你…無事嘛？」
「阿姨…對唔住，我同曉盈分左手。」我忍住淚水講
「……」阿姨呆一呆
「所以，應該唔會再送曉盈返屋企喇，聽朝記得沖杯蜜糖水俾佢解酒。我記得上次仲有好多蜜糖」





我一路向的士方向行，臨上車之前，我擰轉頭對阿姨話
「對唔住。」

「司機唔該小西灣。」上車後我即刻忍唔住喊。
「今天終於一人回家 今天終於堅強回家
不需要他 可以嗎 可以的 一個於路上才明白
披起一些傷痕回家 日後慢慢自豪地結疤
不要怕 只等過去過去吧
不要怕 等想再愛再愛吧」車內又播出Gin Lee嘅今天一人回家，真係諷刺。

「司機可唔可以轉歌？」
「唔好意思啊…唔知道你失戀」司機轉左下一首
「卿卿我我幸運兒 天天春風得意…」竟然係雙雙

我放棄轉歌了，由得佢播。





返到小西灣，我去左海濱長廊行左陣。好耐好耐未試過咁夜喺呢度散步，呢排夜都係因為送嘉澄返屋企，唔知佢依家做緊乜呢？

就係咁啱，一個電話打黎，馬嘉澄。

「點啊死得未？」估唔到一個幼教開口就係講呢啲
「差唔多啦，喺海傍行緊」我意識唔到自己把聲沙晒
「你喊過？」
「無…無啊，邊度有」
「開FaceTime俾我睇下！」我敵唔過嘉澄，唯有show俾佢睇
「眼都紅晒仲話無嘢，咩事啊？」
「我見返佢啫…」
「…咁你地做左啲咩啊？」嘉澄停頓左一陣先問
「無啊…佢飲醉左，然後我送佢返屋企，乜都無發生過㗎！」就算我悲痛但係仍然強調
「我點會咁容易誤會啊，不過你地藕斷絲連又唔係幾好喎」嘉澄分析





如是者，我同佢傾到凌晨兩點先返屋企，但係更令人surprise嘅係第二日。

「叮噹～」晨早流流有人撳鐘
「邊個啊？」我帶住睡眼惺忪開門
「係我～」
「哇！妳點解知我住呢度㗎？」
「我問強嫂㗎～佢話你屋企人又去左旅行」
「係啊啲老人家就係鍾意周圍去…」

嘉澄攞出兩份早餐，我淨係著住條睡褲。

「妳食邊份啊？」我問
「其實…我兩樣都想食，hehe」咁即係點啊
「我share俾妳喇。」我準備夾起啲公仔麵嗰陣佢阻止我




「唔得，咁樣啲沙爹咪唔均勻。一係咁，你快啲食完一半跟住我食」
「妳食先啦，見妳咁想食」

佢真係唔客氣地食晒成碗。

「唔小心食晒成份添，你唔會怪我㗎呵？」佢對水汪汪嘅眼睛對住我，就算幾嬲都消氣啦
「點會呢？唔夠慢慢食啦」

望住眼前呢個女仔撒嬌，我慢慢放低左尋晚嘅悲痛。

嘉澄提議食完早餐出去行街，見今日假期佢又買早餐俾我咪陪下佢。

「啊～你話買返個電話殼好唔好呢？依家嗰個好似有啲舊」佢問
「想買咪買，不過未必啱款」
「咁咪啱囉，我今日報左個手機殼DIY，一齊去啦」嘉澄興奮咁拉住我隻手
「喂喂喂痛…呢啲嘢唔啱我㗎，搵第二個啦」我耍手擰頭
「都報左喇，陪吓我啦」我發現依家啲女人真係好古惑

我懷疑嘉澄根本就係一早plan好晒，連巴士都識得帶我坐，轉個頭已經去到觀塘。

去到場地，全部都係一對對情侶，果然呢啲食水嘢係有助增加情趣。個搞手一路教一路俾我地實戰，只係嘉澄塊面越整越難睇。

「妳唔舒服？」我輕輕摸佢額頭，又無發燒喎
「唔係啊，係我個ex…」嘉澄面有難色原來係撞見故人
「喔，估唔到妳啲taste都幾獨特」
「妖，唔想見到佢啊，俾佢見到我自從佢之後無拍過拖真係好樣衰」

估唔到嘉澄嘅死穴就係唔敢面對以往嘅戀情。

「唔該，可唔可以幫我地影相啊？」我叫嘉澄個ex幫我地影相
「好啊」
「係妳？」明顯個ex好驚訝
「你地識㗎？」我扮唔知問
「前度。」嘉澄話
「哦…唔好意思啊我唔知」
「估唔到妳有拖拍喎～定係ptbf？」佢Ex串我
「我同嘉澄係真心的，唔好再挑撥離間我地之間嘅關係」我認真咁講
「你講我就信，都無證據。」

我毫不猶豫咁錫左嘉澄一啖。

「依家你信未？」
「你地好嘢」

我見到嘉澄解氣個樣放心晒，繼續整手機殼。

「你同我嗰個一樣嘅？」
「你抄我！」
「妳抄我！」
「你抄我！」
「妳抄我！」
「小學雞」
「你都係。」

兩個人相視一笑，享受一刻幼稚。

整完手機殼，嘉澄逼我用埋佢聲稱我抄佢嗰個手機殼，仲要po IG。

「終於有人陪我整手機殼，呢啲caption好容易令人誤會囉…」我抱怨
「真戲假做，Come on～」
「有無諗過我，無啦啦俾人誤會有拖拍…」
「依家我好差咩？死人雷諾曦！」
「咁粗魯，起碼溫柔少少啦」
「你自己睇下自己咩樣先啦」
「我咪靚仔一個」

整完手機殼四點幾，食飯又唔係，行街又好悶，隨口噏去睇戲，嘉澄又話好。

「頭先套戲好好睇喎～」
「係咩，不過戲院張凳都幾舒服」我並沒有專心睇戲
「又唔專心睇戲，罰你請食飯。」

小姐，係咪都我請㗎啦。

飲飽食醉，係時候返屋企，不過戲劇性一刻就出現了。

「我條鑰匙呢？」嘉澄緊張咁摷手袋
「係咪漏低左喺餐廳啊？」
「無理由㗎，我都無攞…Shit。」
「哇，使唔使講粗口啊？」
「今朝我出門口阿媽幫我鎖門。」
「咁咪啱囉，叫佢開門」
「問題係，佢同我老豆今日去旅行，五日後先返」

唔係掛，我雷諾曦做咗二十六年人都未見識過咁荒謬嘅嘢喎。

「咁依家可以點，租幾晚酒店囉」反正港島區有錢真係唔愁無酒店住
「咁貴，先唔要」
「咁妳想點？妳聽日後日都要返工㗎喎」
「去你屋企住咪得囉！」
「吓，咩…咩料啊，妳講笑咋？」唔係講笑，我真係驚

嘉澄轉個身就入左GU同U記買左幾件衫，然後去惠康買埋梳洗用品，佢真係認真的。

其實，住酒店同買呢啲嘢價錢都差不多吧。

「我ready喇，係咪坐8P去小西灣？」
「弊在我未ready呢…都唔知我阿爸阿媽點諗」

我擔心左半個鐘車程，返到屋企我先發現係多餘，連同我嘅存在都係多餘。

「仔你訓聽俾人地嘉澄訓房啦」老母唔客氣咁揼晒我啲床鋪出廳
「喂…」我叫極都無人理

老竇問我，係咪玩唔夠加錢叫嘉澄黎訓，屌佢。

就係咁，我原本應該開展我四日廳長生活。

「喂…雷諾曦」就快訓著嗰陣，有把女聲喺我耳邊講嘢
「邊個…哇屌，嚇撚死人咩」
「入黎訓啦，我問你阿媽攞左張墊」
「妳唔介意咩？」
「你想腰痠背痛咪繼續訓出面。」

咁我恭敬不如從命了。

「講明先啊，你夠膽訓上黎我一定幫你切左佢」
「妳都痴線，訓覺還訓覺，我點會有興趣」
「哼，依家我係第二個訓你間房嘅女仔啊」
「所以？使唔使頒獎俾妳？」

你一言我一語咁，大家都去左搵周公了。

第二朝，唔知點解我左手有啲痺，起身睇一睇，屌那星馬嘉澄訓左喺我隻手上面。我望住跌晒落地嘅被，仲有隔離訓到勁冧嘅嘉澄，仲有唔小心食波餅嘅右手，好啦我屈服，痺就痺多陣，其實天花板其實都幾靚吖，其實馬嘉澄身材都幾好吖。

Shit，唔小心諗歪咗，不過呢種幸福你估咁容易有咩。

到馬嘉澄起身嗰陣，佢先係震驚，然後不懷好意咁笑。

「你記得負責任喎」
「吓，咪屈我喎」
「講笑咋，我知道我尋晚跌左落黎，不過太眼訓同黑咪費時郁」嘉澄話

呢個女人，真係好蠱惑。

星期日，我曾經諗過俾錢嘉澄搵開鎖佬，但開鎖佬獅子開大口要收成千蚊，加埋我老豆老母死都話要嘉澄留喺度，咁算數囉。

老豆老母，咁快就習慣轉新抱，真係好嘢。

跟從屋企傳統，星期日係要去飲茶的，今日不例外，只係曾經組合係四個人，變三個人，依家又變返做四個人。

只係我估唔到咁快嘉澄已經進化到唔使洗碗嘅階段。以前曉盈都要半年先可以唔使洗碗，嘉澄僅僅用左半個月，就已經唔使，不得不佩服佢真係好叻氹老人家。

「快啲叫嘢食啦，鍾意就叫啦」哇，我未見過平時寧願唔食飯都要等優惠時段嘅老母咁闊綽，仲要嘉澄填左4個灌湯餃都面不改容

既然係咁，我都唔執輸。
「媽，我想食鮑魚酥啊…」頭先頂點，依家特點，應該無問題啦
「無啊，填呢張啦你」老母繼續同嘉澄密密斟，俾左張$25.8優惠點心紙我，老豆繼續睇報紙置身事外

個個都話飲茶見家長最攞另一半命，顯然喺雷家飲茶見家長最攞自己命，最後埋單我俾，但係老母唔俾我叫鮑魚酥，究竟係咩玩法，有無人知？