我喺迪士尼識咗個女仔: 21

朝早六點半，我同嘉澄已經食緊早餐。因為Disney Sea八點就開始排隊，要同班日本人爭玩機動遊戲真係有啲困難。

「你睇下個包，上面有胡迪個樣啊～」嘉澄話
「係喎，啲早餐都幾高質」
「好彩真係有去迪士尼咋～你真係好叻啊」
「嘻嘻，我係邊個啊，我係妳男朋友喎」

食完早餐，我地check out酒店，帶埋行李坐shuttle去Disney Sea入口，未夠八點已經好多人等緊，真係好痴線。

「快啲啦～成日慢吞吞」




「喂，唔知係邊個食完早餐係都要上去化另外一個妝呢？」
「咩啊？Disney Sea梗係要化個淡啲嘅妝啦，邊似你，咁邋遢就出門口」
「依家嫌棄我喇，依家唔要我喇，嗚嗚嗚」
「唉怕左你，呵返呵返」

旁人睇到覺得好肉麻反白眼嘅對白，成為我同嘉澄等機動遊戲嘅解悶劑。

首先去左買公仔，係咪覺得好怪？因為東京迪士尼有M Linabell，亦都喺暫時亞洲唯一一個迪士尼有。但係隻Linabell真係好大，超級大，差唔多有1/3個人咁高，港幣大約$900。

「哇～超靚啊呢隻，我有S Linabell，估唔到今次佢地可以一家團聚喇」講完，嘉澄仲攞埋佢隻S Linabell出黎影相。





我就係等緊佢攞出黎！因為…

「全家福點可以唔叫埋我啊？」我戴上Gelatoni頭箍，同埋攞出我隻S Gelatoni
「啊啊啊啊啊～點解你有嘅？」
「話晒都係迪士尼die hard fan嘛，呢啲嘢基本啦」
「我係話點解你會買Gelatoni嘅？不過你戴呢啲嘢又幾可愛喎～」嘉澄話
「唔係掛…哇頂真係變後生左幾年喎」我睇返同佢嘅自拍，又真係有返啲活力
「唉，不過我唔記得帶我個Bell頭箍啊，差咁啲囉」
「喔，妳講呢個？」我又攞出另一個頭箍




「啊啊啊啊點解你又有嘅？」
「不要問，戴就好了～」

戴埋啲頭箍，攬住啲仔仔女女，全園啲人都望到實。如果要我自己一個咁戴真係未必，不過有嘉澄喺度，好似所有嘢都瀰漫幸福嘅氣息。

裝備好自己，我地去左玩第一個game——夢幻奇航。呢個game類似港迪Iron Man咁，坐喺一個密閉空間睇4D電影咁，不過呢個上山又下海，好似仲震撼。越睇越唔明點解港迪嗰個玩5分鐘排半個鐘以上…

嘉澄一玩完就拉我去隔離區嘅玩具總動員瘋狂遊戲屋，話因為香港嗰個變左Antman，所以喺呢度一定要玩返夠本。但係呢個射槍就弱左少少，唔係玩燈光，個氣氛太開心了，我感覺Antman好似仲好玩啲。話雖如此，我地兩個都受過港迪嘅專業訓練嘛，五十萬分真係基本嘢～

「呢個麻麻地咋喎」嘉澄話
「我都覺，可能真係俾細路仔玩」
「咁樣玩法，又已經十一點喇…」
「係囉，排隊真係好浪費時間」我話

話雖如此，但係港迪喺疫情前都係咁多同胞㗎啦，況且東迪海係排得耐但係玩得開心，fair deal啦～





玩完Toy story，順便玩埋隔離個驚魂古塔。呢個真心勁，要排90分鐘，但係個個都話一定要玩，咁無辦法啦，唯有排隊等。

「Toni Toni～玩呢個會唔會好驚㗎？我好怕啊…」嘉澄無啦啦攞起Linabell公仔用可愛tone講嘢，我get到咩意思了，但係原來佢有啲咁嘅癖好…
「Bell Bell～有我陪妳唔使擔心啦。妳唔記得我係個勇敢嘅男孩子咩？」
「咁…你快啲保護我啦！」

喂喂喂，劇情好似唔係咁㗎喎。

以前，我一定會覺得咁嘅角色扮演好低能，但係同嘉澄一齊之後，我發現自己好享受同佢一齊幼稚。

「阿Bell呢排食咁多好嘢，返到香港一定要減肥」
「Toni，你又亂講野啦？就算我變肥我都係咁靚㗎～」
「係係係，妳話咩就咩啦」





想講呢個驚魂古塔真係顛覆我對機動遊戲嘅印象。職員會閂埋度門爬升，然後去到某個位急速下降，停低就會開門有啲嘢嚇你，認真好玩過香港迪士尼。玩完呢個，嘉澄徹底開啟自己嘅機動遊戲模式，佢竟然拉我走去玩最恐怖嗰個地心探險之旅。

又排左成個鐘…

「哇妳得唔得啊…啊啊啊啊」
「啊啊啊啊啊」得到嘅就係大家熱烈嘅回應

明知自己驚仲要拉埋我去玩係咩玩法。

一手拖實嘉澄，一手抱住頭先放唔切入袋嘅Toni，仲要驚住咁做所有嘢，真係好鬼驚。

「喂！Toni同Bell就快嚇死喇大佬」玩完之後我話
「sorry啊…頭先唔記得擺返佢地入袋，有無整親啊？」嘉澄問
「整親就無，不過…
.




.
.
.
佢地話想玩Indiana Jones嗰個過山車喎」

我仲要專登行埋去嘉澄耳邊講，等佢以為有咩秘密。

「妖…仲以為你想講乜。咁快啲啦，雷Toni」
「點啊Bell Ma，妳行先啦，妳肥啊」
「邊度肥啊？？？打死你個雷諾曦！」
「好喇好喇，不如…拖住一齊行啦～」

嘉澄錘左我一下，然後都係欣然伸出手，順理成章，作為男朋友，梗係拖到實一實啦。

「印第安納冒險旅程…哇排80分鐘喎」




「買fast pass？」
「唔好浪費啲無謂錢啦～我地大把時間，Disney Sea收十點」
「對比港迪…八點就收，哈哈哈」唔係講笑，有時收工想入去買嘢都趕唔切。觀塘過去坐機場巴轉迪士尼巴士都要成粒鐘，仲未計龍翔道成日塞車。

「老師呢，就好多假期嘅，所以好多機會入場」嘉澄話
「唉，又串我，女朋友喎～」
「BellBell只會講真話唔會講大話㗎」唔知幾時佢又戴返頂Linabell帽。其實我都未見過佢真係戴，只係睇相見過，原來都幾襯。
「係咩～，咁Bell可摸以同我講Toni靚唔靚仔啊？」
「梗係靚仔啦～又成日引我笑，真係好得意㗎佢」
「咁姓雷嗰個Toni呢？」
「吓…哈哈哈哈呢個就…都靚仔嘅，成日引我笑就少啲，成日搞到我喊啊呢個Toni仔。唉，周圍帶我玩帶我食，唔要啊唔要啊！」

睇得出嘉澄講係咁講，但係佢嘴角都係忍唔住笑。

「其實搞錯左，Toni係我地個仔，Bell係妳…」我話
「故事入面Toni唔係同Bell一對咩？」嘉澄問
「吓？乜原來啲人物有拍拖結婚㗎咩…」
「Mickey同Minnie，Donald同Daisy…」

嘉澄咁講，又好似係喎。

「你話，要好似米奇米妮日日咁恩愛，真係好難，係咪真係要童話世界先有呢…」
「都唔係嘅，小確幸日日都在」

我默默咁拖起嘉澄隻手，期待Indiana Jones個過山車；我更加期待，未來同佢去嘅每一次迪士尼，睇嘅每一次Momentous，因為

“She is the Minnie to my Mickey.”

「終於到我地喇～」嘉澄望住隊頭話
「傾住計排都好似唔係好耐啫，事先聲明啊，你一陣唔好驚」
「痴線啦…我依家免疫㗎喇」
「呵，睇死你都係攬住我隻手瞇埋眼玩㗎啦」

結果我地兩個都好驚，喺港迪練嗰啲U型灰熊去到呢度都係無用。

「廢晒武功喎馬嘉澄」我話
「你咪差唔多…」
「係喇係喇，不如食嘢啦」

今次我就無book餐廳，反正喺港迪都好少食Kiosk啲嘢，又貴又少，除左氹女仔之外我諗唔到有理由要去嗰度食。

「呢個熱狗望落幾好食喎，呢個漢堡包又好似好好食喎…」望住喺櫥窗面前煩惱揀邊個嘅嘉澄，我諗起當日港迪嗰個小朋友。

無人想做選擇，因為會後悔我地先會選擇。

「Why not booth？」我問
「咁先會顯得我嗰個好食㗎嘛～」

原來，我從來都無諗過選擇除左後悔，仲係特別。若然嗰樣嘢嗰件事唔係對你有特別意義或者記憶，我地仲會揀佢嗎？

「好，咁就不如食熱狗啦」

熱狗，就係我同嘉澄喺東迪海呢刻嘅特別。

食完之後已經四點幾，連續兩日玩咁多機動遊戲其實都有啲攰，所以我同嘉澄就去左海底王國玩啲小朋友嘢。

「呢個跳躍水母，係咪弱版跳樓機黎㗎？」
「點睇都弱過港迪個降落傘啦，唔係好想玩」
「玩啦玩啦～突然好想玩啊」嘉澄咁樣講，即係無得say no啦

個水母離地後揚起少少風，嘉澄啲髮絲隨風飄逸，唔小心遮住左隻眼。我輕輕咁撥弄佢啲頭髮等佢視線不受遮擋，映入眼簾嘅就係佢窩心又真摯嘅笑容。呢一刻，就算覺得幾幼稚都忍唔住笑啦。

落返地，嘉澄即刻好似審犯咁拉住我。

「講！頭先做咩笑得咁開心？」嘉澄問
「邊度有啊，咪都係正常咁」我扮到乜都唔知咁
「咩啊，明明就有笑」
「你唔望住我笑，又點知我笑先？」我一句道出呢個重點
「咦…死人雷諾曦，成日都係咁。」
「其實，你笑得開心咪得囉，我唔介意睇妳笑，因為你真係笑得好靚。」
「成日突然講埋呢啲嘢…想我點接啊。」

我地繼續行去其他機動遊戲。

「我介意你睇我笑。因為我想我地一齊笑。」

海底王國仲有個好弱嘅過山車，我同嘉澄玩埋之後就已經玩晒想玩嘅機動遊戲。

「不如玩埋呢個水上逗趣船啦，我表姐話想帶個仔黎玩」
「好啊，哇不過呢個都要排30分鐘…」
「唔怕啦，煙花差唔多九點先放，依家五點幾」

就係咁，排完發現呢個game真係for細路仔…不停轉不停射水，不過嘉澄好似玩得好開心咁。

「真係咁好玩咩？」我有啲不解
「好好玩喎呢個，啱晒我表外甥」

原來嘉澄咁投入只係為左幫佢表外甥揀啱玩嘅遊戲。

「妳真係好好啊…」我突然捉住佢臉頰講
「咩事啊…好多人啊呢度我怕醜…」嘉澄塊面瞬間變到好似個蘋果咁
「妳成日都為人設想，由沙頭角的士到行程，再幫表外甥揀機動遊戲。同我一齊妳唔使㗎，只需要做自己同埋俾我寵！」我忍唔住喺同佢講
「又無啦啦想搞到我喊…你真係好衰啊雷諾曦！」嘉澄破涕為笑

玩完呢個遊戲，我同嘉澄無再刻意搵目標去玩，或者更加珍貴嘅係喺呢個童話世界平靜嘅每一秒，睇下周圍嘅小朋友同主題人物嘅互動，睇下嘉澄嘅會心微笑，一切都足矣。

「咦？嗰邊係咪可以同D&F嘅人物影相啊？」嘉澄指住路邊間屋問
「我睇下先…係喎，仲要唔使排隊。影唔影啊？」我問
「梗係影啦，我邊個都鍾意」

入到去，原來係Duffy～ 嘉澄開心到彈起，仲手忙腳亂咁跌左Linabell落地。Duffy扮到好可惜咁執返起佢，然後嘉澄戴Linabell帽嗰陣仲要交足戲扮驚訝。反而我攞Toni同戴頭箍嗰陣，Duffy掛住同嘉澄玩唔理我囉(Ｔ＿Ｔ)

然後我醒起，Duffy其實係男仔黎。。。

影完相，嘉澄仲係好激動咁攬住Duffy，要等到職員叫先肯走。都難怪嘅，迪士尼人物嘅感染力真係唔講得笑。就算係米奇百年不變嘅親切笑容，或者係Eeyore略為厭世嘅模樣，都有捧場客。

「妳開心啦，咁都俾妳影到Duffy。仲要頭先佢掛住同你玩唔理我囉⋯⋯」我話
「咩啊～咁我真係太激動嘛，Duffy好好啊，好溫暖嘅擁抱……」嘉澄仲回味緊頭先同Duffy見面，原來出面已經開始黑天
「原來已經差唔多六點幾，你睇下玩多個game我地就去排隊睇煙花？」我問
「好啊，咁不如玩旋轉木馬啦～」

呢個沙漠商隊旋轉木馬，對比香港嗰個差啲童話氣息，不過都係一樣咁適合呃like影相。

「啱啱幫妳影嘅相夠妳po十年了」我話
「係咪㗎？一陣張張都係黑圖…」嘉澄半信半就咁攞起電話
「算你啦～啊，都好攰喇。不如直接去等煙花啦」嘉澄話
「好啊，我睇攻略都話要早兩個鐘去霸位」

唔記得講，因為千葉近海，所以有無煙花睇仲要睇埋風向。同埋放煙花嗰個位置喺地中海海灣區同美國海濱中間個海度，所以唔課金其實睇極都係有限。

見到日本人都係席地而坐，我地入鄉隨俗。嘉澄靠喺我膊頭，一邊碌IG一邊抱住Linabell。我就抱住Toni，得閒摸下佢啲毛，好似一對老夫老妻湊仔女咁。

「聽日…」我諗住同嘉澄講嗰陣，先發現原來佢已經訓著左。都難怪嘅，呢幾日去旅行好似仲攰過平時，我好努力爭取每分每秒同嘉澄相處，因為無人知道場奇妙之旅幾時會完。

點解我會諗呢啲嘢…

我無叫醒佢，又唔想佢醒，唯有一路頂住身軀，一路睇聽日食咩好。

「喂…醒喇。仲有半個鐘就放煙花喇」
「嗯…我訓左幾耐啊？」
「差唔多成個鐘喇，啊～」我趁呢個時候伸個懶腰
「死啦，係咪我喺你膊頭太耐啊？」
「唔係～本身呢幾日都攰啦」
「但係好開心喎～」
「咁又係，唔攰！」

等左成兩個鐘，終於放煙花了。

我都唔係好記得煙花係點了，因為真係好遠，淨係見到有啲花船 (咁路面嗰啲叫花車水上嗰啲應該係咁叫？) 喺度兜下兜下。

「整體多野睇過港迪嘅，不過好似無城堡啲煙花好散」嘉澄回程嘅時候話
「係囉…可能因為係東迪海唔係迪士尼，城堡唔係最重要」
「你最重要…哈哈哈哈」嘉澄無啦啦咁講，搞到我有啲怕醜
「無啦啦咁講嘢嘅～又有啲咩請求先？」
「我想買多隻公仔啊…」嘉澄手指喺我臉頰打轉，又擺出佢水汪汪嘅眼睛，點拒絕啊？

最後臨走嘉澄買多左隻M Cookieann先肯走，坐JR走嗰陣攞死我，成手都係仔仔女女…

「重唔重啊？」嘉澄問，我仲以為係咪有機會分擔我啲嘢呢，點知…
「我好肚餓啊～食乜好啊？」
「知道妳啦…一係松屋一係求其搵間拉麵算，妳帶路啊，我無手…」
「都好喎～黎到咁耐都無食過拉麵，終於可以見識下」
「咁你不如攬返佢啦？」我好無奈咁講

唔係講笑，玩完兩日迪士尼真係好攰，食左乜嘢其實都唔係太清楚，淨係記得間嘢喺東京站附近，性價比幾高。快手食完就推行李去新酒店喇。

真係頂唔順嘅我地，一去到酒店房就直接訓落床先。

「聽日行程點㗎？」嘉澄問
「無諗啊…我好眼訓，不如聽朝先諗」
「懶到你吖，不過算啦，你呢幾日幾好」

酒店床上，訓住馬嘉澄同我，仲有各Size嘅Duffy & Friends，然後安穩睡去….


因為去一次迪士尼真係好攰… 仲要好似湊仔咁款。不過，見到今日嘉澄咁開心，一切都值得了。