我喺迪士尼識咗個女仔: 22

經歷過一連兩日嘅奇妙之旅，終於都回歸平淡嘅第五日。應該係玩得太攰，兩個人成十點幾先起身。

「今日我地去邊先～？」嘉澄問
「食個brunch先啦～豐洲市場！」
「係咪有拖羅㗎？」
「唔知㗎，睇下妳個焚化爐一講食即刻醒晒」
「咁係吖嘛，你唔食邊度有力玩？」
「好好好，行啦」

今日嘉澄嘅outfit係米色長裙同一頂農夫帽，相當青春，搞到喺lift度忍唔住對門自拍。





「我有話俾你影咩？」
「妳有得揀咩？嘿嘿」我話
「哼，又口甜舌滑，馬老師不受這一套」

不受定怕醜啊？

依稀記得細個同老豆老母去過築地市場，印象中就係濕同多人，類似香港啲街市，但係豐洲市場根本就係個商場，新裝修不在話下，個地下係乾㗎！咁樣邊度有feel㗎？

唉算，都係為左食佢嘅嘢先黎。





「壽司大！！！快啲排隊啦」嘉澄拉住我去壽司大門口排隊
「妳又話無plan行程，妳又知呢間出名？」
「我有煲啲YouTube東京美食攻略㗎～之前喺香港煲到流口水…哈哈哈」
「一提到食就哈哈哈咁，唉～」

等左差唔多45分鐘，終於到我地。其實食乜顧客係控制唔到的，唯一可以控制就係價錢。¥7000有十二盛壽司，有拖羅有海膽，算係咁啦。至於味道如何，由於店面勁窄，基本上我記得嘅就係拖羅真係我食過最好味嘅，油脂感爆滿！！

「好好食啊！！！我未食過咁好味嘅壽司㗎」
「你好似講左呢句好多次喇喎…」





食完之後，我地喺豐洲行左陣，然後去埋有明個新商場。

「其實究竟東京有咩玩㗎？點解我地去親都係商場嘅？」嘉澄問
「咁我地都唔鍾意博物館寺廟嗰啲，係玩呢啲㗎啦」我話
「突然覺得有啲悶…哈哈哈」
「咁不如行下？」

我地喺有明行完，嘉澄始終都係想行返商場，所以返左去東京站酒店嗰頭。

東京站地下街係誇張地大，同樣好適合嘉澄行街。一路行一路買衫，究竟女人個衣櫃有幾大…

「今次旅行起碼你有無買左十件衫…」我問
「唔緊要啦，25kg行李喎，衫唔係好重啫」
「唔係…個問題係我地聽日會去Outlet，你依家買咁多做乜？」




「吓，咁快去outlet？我地走喇咩？」
「走喇，聽日咪第六日」
「吓…咁快就放完假喇」

嘉澄放低件衫，略為失望咁行出街頭。

「使唔使咁sad啊…暑假再黎過囉」我追出去問
「唔係啊…我怕返到香港你會唔理我啊」
「點會啊？妳係我女朋友喎，我會唔記得你？」
「我係怕…怕你個表白只係建基於日本嘅浪漫氣氛，返到香港妳就唔要我」

真係傻妹黎…呢套理論肯定係唔知乜IG心靈雞湯聽返黎啦。

嘉澄對呢段關係缺乏信心，我可以點做啊？





我又諗起強哥UA單嘢，拖就對了。於是我衝上前拖起佢隻手。初春嘅東洋街頭仲有一絲冷風，就係呢個拖手，連繫我同佢嘅溫暖。

「啊…好暖」我同佢同時講
「行啦，仲有好多精品店喺前面」
「嗯，但係要一直拖住喎」

前面有間賣御守嘅鋪頭，我先醒起原來未買手信。

「係喎～妳使唔使買手信啊？」我問
「要啊，阿爸阿媽知道我去日本之後叫我要買好多野返去囉，唉」
「有無話買咩先～？」
「我諗住買隻招財貓俾老豆，跟住御守俾阿媽囉。至於班同事，求其執啲嘢食就得㗎喇，佢地去日本仲去得密過我」嘉澄一路揀御守一路話

地下街啲御守對正條街，就咁攤出黎俾人揀。我唔知有無禁忌，但係硬係覺得喺度買御守唔多吉利。





我拍拍嘉澄叫佢出返間舖。

「妳覺唔覺喺度買有啲奇怪啊？」我問
「其實都好似係，有啲似街市」

我諗呢啲都係for走馬看花嘅遊客㗎啫，但係我地點可以咁兒戲。

「係咪應該去嗰啲咩廟定宮殿度求會好啲…」我突然諗到一個地方，忍唔住嗌左出聲

「明治神宮！」我同嘉澄竟然同時諗起呢個地方。

我即刻上網search，明治神宮收五點，依家係四點，坐地鐵千代田線，半個鐘，夠時間啊！

我即刻拖住嘉澄跑去地鐵站，用最快嘅速度上車、落車，然後繼續跑。搭車途中，我先發現嘉澄跑到塊面紅卜卜，好得意。





「好熱咩？」我問靠喺門邊嘅嘉澄
「梗係熱啦，無啦啦無預警叫人跑」嘉澄一臉無奈
「對唔住囉，我驚你真係好想要個御守嘛，咪激動得滯拖住你跑…」
「嘻嘻…我呃你㗎咋，頭先我終於feel到自己仲有啲青春，咁樣跑上次應該係讀書嗰陣除夕倒數追尾班車」
「哎呀，你成日呃我㗎喎。」
「係啊係啊～我就係要呃下你，等你唔夠膽咁曳」

傾下傾下，終於到明治神宮。唔能夠話好大，只能夠話超級無敵大。見到鳥居唔代表到左，仲要行多15分鐘，先見到個正殿。

「哇…呢度使唔使咁大啊？」
「供奉天皇㗎，梗係要有排場啦」
「唉唔好講咁多，快啲搵御守啦」

終於喺神樂殿隔離搵到賣御守嘅地方。

「買一個俾老豆保佑工作、一個俾阿媽保佑健康…」嘉澄一路揀一路話
「買一個保佑我地愛情運啦」我話
「都好～買多個俾Jennifer同富哥啦」
「係咪保佑BB肥肥白白？」

我地兩個一齊笑左出聲。

「咦，呢度仲有得求籤添喎，不如求返支啦」
「好啊，等神明指點迷津都好」

嘉澄喺攪珠機度抽到十九號籤，可能係因為遊客多，所以每張籤文都會有埋英文翻譯。

“Water meekly follows the contours of any vessel it is poured into,
yet it can also pierce stone itself.
Let your heart to be as patient and as strong.”

中文大概係要像水一樣溫和，也要像水一樣強壯。

「好高深喎～到你喇」嘉澄話

“Other people’s words,
Sometimes good and sometimes bad.
Need to be heeded,
If we listen carefully,
We can benefit ourselves.”

後來上網先知，原來明治神宮所有籤文都係詩句黎，無分吉凶，真係別有韻味。

喺明治神宮附近行左個圈，行行下去左原宿。記憶入面除左個木製車站之外真係唔知有咩行，但係嘉澄就異常雀躍，因為有竹下通，尤其有COSME藥妝，佢又可以血拼…

喺嘉澄買買買嗰陣，我上網碌碌下發現大名鼎鼎嘅Bills班戟就喺附近。呢啲消息梗係要同嘉澄講啦，適逢呢啲就快六點嘅尷尬時間，我估應該都唔會太多人。

顯然我錯了，去到經過一番交涉，原來人地係要book位，不過好彩真係唔係高峰期，可以攝到張檯俾我地，不過都要等半個鐘。有得等好過無得食吖，於是我都加入嘉澄掃貨行列，估唔到佢咁快已經買好手信俾人，仲買埋俾我屋企兩老。

「你又知我阿媽鍾意呢隻藥膏貼嘅？」我問
「上次去你屋企見到客廳有個箱入面全部都係呢啲嘛～不過你老豆我真係諗唔到買乜，佢好似無乜嗜好咁…」
「佢係得部車過日子㗎啫，求其執啲汽車用品俾佢就得㗎喇」

於是，我地買完藥膏貼之後返去Bills門口，終於有得食。

Bills其實最好食就係班戟，所以其他嘢可以唔使嗌。果然無令我地失望，係好好食好有空氣感，但係好鬼甜。

打卡一流，味道都唔錯，就係食完可能糖尿病。

飲飽食醉，我同嘉澄都係繼續買手信同買嘢俾自己，結果兜兜轉轉又搵到間Bic Camera，咁順便買汽車用品俾老豆，再順便買嘢俾自己。

「買完未啊，又買呢啲嘢，我好悶啊～」嘉澄問已經行左成個鐘嘅我
「對唔住啊BB豬，行上癮㗎會，一係我借Toni俾你解悶啦」
「吓？你今日都有帶出街？」
「點知我女朋友會唔會無啦啦嬲啫，咪叫Toni黎幫手」
「我似咁無理取鬧咩？哼！Toni陪姐姐玩唔好理呢個哥哥」
「喂喂喂，玩還玩，叫埋Linabell一齊玩啦」
「我無帶…」未等佢講完，我攞左尋日喺Disney Sea趁嘉澄去廁所嗰陣買嘅Linabell帽戴喺嘉澄頭上面

真係有啲似Linabell…

「喂，好羞恥啊…」
「唔係喎，好得意啊」我話
「妖～又唔係你戴」
「妳依家咁樣，我唔行喇，我地去遊街示眾啦」
「喂啊～」

最後喺新宿街頭，東京人會見到一個戴住Linabell帽嘅女仔同埋一個攬住Gelatoni周街行嘅男仔，就係咁。

唔理其他人嘅目光，我可以喺嘉澄面前做返自己。曾經嘅我覺得一個大男人鍾意迪士尼好羞恥，但原來擁有珍貴嘅童真唔係個個都可以，加埋嘉澄嘅出現，無論係米奇米妮定係當勞黛絲，都形容唔到我同嘉澄。

迪士尼真係好奇妙啊啊啊啊啊！不枉我掏心掏肺課金。

「會唔會太outstanding…」嘉澄問
「你都還好吖，我攬住Toni行啲人以為我變態」
「咩喎，Toni係我地個仔黎㗎，有咩咁變態」嘉澄摸摸Toni個頭，呢隻嘢仲幸福過我
「哇我生到個咁靚仔嘅…」
「因為遺傳我啲基因囉」

兩個人行下行下又肚餓，結果去左松屋食牛肉飯，簡簡單單應付一餐。

「你話吖…我地去日本都無點食過燒肉嗰啲特色嘢，但係就去玩左兩日迪士尼。會唔會俾人笑吖嗱？」嘉澄問
「點會啊，同最愛嘅人做最愛嘅事，人地點諗關我咩事～」
「口甜舌滑，罰你幫我食塊牛肉。唉，食咁多返去真係肥晒」
「有我陪妳…不過今次玩完真係要努力工作喇」

食飽後，我地喺新宿慢慢行返去兩個站地鐵距離嘅酒店。

「喺日本咁樣行係浪漫，喺香港咁樣行係受苦，多人到爆」嘉澄話
「依家幾點啊，人地聽朝要返工㗎…」我拖住嘉澄話。唔知點解，自從嘉澄講完佢好擔心我會唔要佢之後，我都好緊張。我好怕辛苦放低嘅人，無啦啦又會因為某啲原因而出現返。
「係係係～不如買條雪條食啦。呢種天氣啱啱好，唔太凍唔太熱」
「你確定7度係唔太凍唔太熱？？？」

話雖如此，但係寵嘉澄寵到漏嘅我咪都係乖乖咁入便利店陪佢揀雪條。

「哇凍凍凍…」
「邊個叫妳食雪條，我有提你㗎」
「係喇係喇你最叻，食住行返酒店啦」

講起酒店，我曾經諗過住返原本嗰間，去迪士尼嗰日唔check out算，但係又想方便啲去outlet，所以就搬左去東京站附近。

「唉，又係時候執行李喇，好多嘢啊點算啊？」嘉澄問
「邊個叫妳買咁多嘢啊…你擺啲俾我啦，我無乜嘢」
「就知道你大把位，來吧～」

嘉澄起碼買左十件衫仲有啲零零碎碎嘅耳環裝飾，女人真係好恐怖。或者呢個先係正常嘅女人，之前我唔習慣買手信。

執左成晚，終於執晒啲嘢入行李，但係嘉澄發現左個問題——咁我地去完outlet買嗰啲嘢點算？

「都預左妳會買好多嘢㗎啦，所以…我帶多左個篋，之前飛過黎嗰陣擺埋喺個大篋入面一次過寄艙。」
「你好聰明啊BB豬～」
「梗係…唔係點算啊，唔通買多個篋咩？」

執齊所有嘢，嘉澄同我就入寢了。聽日第六日，亦都係最後一日，血拼Outlet結束今次東京奇妙之旅。