［搞笑］［打機］收錢幫人戒除網癮，幫到困咗喺遊戲世界: 三十八、卡夢

係朗仔。



「魚哥，點解你要咁幫我，咁你自己點算？」



「唔好傻啦，我幫你係生意嚟，我有錢賺㗎。」







「你大可以坐地起價，但係你冇。」



「咁你以後記得跟實我，唔好白費我心機。」







「多謝你，對唔住，我收返對你嘅成見，其實你個人明明唔係咁冷漠，點解你…」



我冇聽完佢講咩嘢，直接傳送返尼斯湖。我並唔係嬲佢誤會我，只係怕佢對我有期望。



佢再中二病，都算係一個有大好前途嘅中學生，對我呢種爛賭二有希望唔會對佢人生帶嚟咩正面影響。







自從俾人踢左出隊之後，我特別聽不得人地同我講有關我嘅好說話，因為我會覺得佢哋係揶揄緊我。



我心底覺得，就算而家已經冇賭，自己都只係一個破壞人夢想既爛賭二。



無數個夜晚我都恨自己係個自私嘅人，但原來我係危險情況之下，都願意保護身邊嘅人。



呢一種自我觀察令我覺得唔自在，個心有少少似俾人輕放喺個放滿棉被同毛公仔嘅搖籃咁。







我唔習慣被人重視，更唔習慣俾人用溫柔嘅目光看待，我寧靜大家都當我係一個貪錢嘅自私鬼，咁我就唔使承受人地對我幻想破滅時嘅眼神。如果我最後都要深陷泥濘之中既話，我寧願自己冇俾人撈過上黎，因為我已經冇辦法再承受其他人對我嘅失望。



休息一陣之後，我開始整理一吓自己嘅思緒。



因為異變，遊戲入面多咗好多全新嘅內容，算係一個好大型嘅更新，平時我或者會有好期待有呢啲大型更新，而家嘅我只係覺得好費力，喺呢個環境之下，改變可以好致命，所以我寧願冇咩變動。







首先，而家大家係可以幫自己立遺囑，受益人可以隨時更改。



雖然「Reality」呢個遊戲好貼近現實，但佢一直都冇遺囑功能，因為玩家可以不停復活，完全冇必要諗自己死咗之後啲財產歸邊個。



而家，因為大家而家一死就冇得翻生，冇辦法拎返自己嘅財產，所以大家可以自由選擇自己死左之後，剩低嘅真實結晶同道具要俾邊個。呢樣野可能會大大提高遊戲入面既犯罪率，喺呢個緊要關頭，人人都有機會諗唔開之後做壞事。



理所當然地，我都立咗遺囑，受益人係朗仔，如果我真係死左，希望我留低嘅野可以幫佢喺呢度生活，等佢唔使咁徬徨。







之後就係，而家有好多大大小小嘅新任務可以接，而呢啲任務嘅報酬都係真實結晶，最低嘅報酬係0.1粒真實結晶，唔知要做幾多個呢啲細任務先到五百粒，不過叫做俾個希望唔好打嘅人，等啲人唔好咁快失去希望。



有啲高難度任務報酬可以到五個真實結晶，但呢類型嘅多數係先到先得，而且只可以由一個人完成，整體難度同危險性會較高。我之後嘅主力都會放係呢啲任務同埋我熟悉嘅活動上面，務求盡快收集真實結晶俾朗仔。



據我認知，紅玉圍獵之後嘅活動係豐收慶典，呢個並唔係一個需要打打殺殺嘅活動，相反地，佢需要嘅更多係玩家之間嘅合作。 換而言之，呢個活動對我冇咩優勢，但佢冇咩危險性，我都可以參加一下。



豐收慶典呢個活動，主要分為兩部分，第一部分係「花車巡遊」而第二部份係「美食評賞」。







卡夢喺呢個遊戲入面，係祝福玩家，為佢哋帶嚟「豐盛」嘅神明，佢嘅形象係一個舉止優雅嘅金髮女性，當然，我唔知而家會唔會又有咩變化。豐收慶典係為咗感謝卡夢帶嚟嘅豐收，亦係為咗求佢來年再次帶嚟豐收。



第一部分嘅花車巡遊，需要玩家組隊準備花車，之後喺主城既大道遊行，想要突圍而出恐怕唔係一件易事。往年嘅花車巡遊都冇分排名，主要係俾玩家發揮吓創意、滿足吓表演慾。



第二部分嘅美食評賞簡單得多，只需要煮出令評審滿意嘅食物就可以了。



非常唔好彩地，我對表演同煮野食都冇咩造詣，完全諗唔到自己點樣喺呢次活動入面成為最高得獎者。