［搞笑］［打機］收錢幫人戒除網癮，幫到困咗喺遊戲世界: 三十九、自煮研發

唔好誤會，我唔係一舊木頭，我都鐘意睇花車巡遊同埋食好野，但我真係對表演同煮食乜認知。



當年升中參加迎新日，主要係俾我哋睇吓唔同學會表演，俾學會招吓生咁。



拉丁舞學會嘅顧問陳老師，可能見我骨骼精奇，熱情招待我去睇拉丁舞學會嘅表演，我見啲師兄師姐表演得幾好睇，覺得好有型就加入咗，成為拉丁舞學會唯一一位中一男同學。







半個月後，我跳得實在太差，據同學形容我係生硬似一隻擺埋咗一個世紀嘅扯線公仔，而且我成日掛住打機唔去練習，陳老師就好婉轉咁請咗我離開。



陳老師，對唔住，浪費咗你嘅時間，但事實證明我唔揀跳舞係正確選擇。自此之後，我喺現實生活都冇咩做過表演類嘅嘢，表演賽就過咗幾場。







煮嘢食方面，我嘅認知大多嚟自上網睇片。



小學二三年班嘅時候，大家都變得有少少百厭，兼且唔鐘意喺屋企食飯，成日話要去麥當勞食開心樂園餐儲玩具。佢地話好羨慕我可以日日食開心樂園餐，但冇人知道，我其實好想同佢地一樣食到住家飯，當然，我有得食開心樂園餐都好開心，因為成日都拎到唔同玩具，仲可以賣俾同學仔。



「魚仔你就好啦，我媽咪都唔俾我食煎炸嘢，我想入麥當勞都冇機會。」







「唔緊要，你俾錢我就得㗎喇，上期玩具啲貨好齊。」



喺呢個時候，我已經知道自己同其他小朋友好唔同。



我係自由嘅小朋友，但都係一個不被愛嘅小朋友。



我嘅監護人係我舅父，佢係一個單身阿叔，我唔怪佢唔愛我，因為佢仲肯俾個地方我訓、供書教學已經算係咁。我相信，佢係愛我媽媽嘅，如果唔係，邊個單身男人願意留一個死嘅仔係自己屋企阻住晒？佢唔識煮野食，亦唔知小朋友鐘意食咩，佢日日都買開心樂園餐俾我，係因為我細個嗰陣好鐘意食，於是佢就默認咗我日日食都會好開心，我亦都唔想開口同佢要求食其他。







我怕佢嫌麻煩，要趕我走。



大個咗成日都買外賣，做電競選手搵最多嗰期我會食好少少。樂樂睇唔過眼我成日喺出面食，好鐘意煮野俾我食，嗰陣可能係我食得最多住家飯嘅時候。



講返花車巡遊，我對花車呢樣野係冇頭緒，雖然我哋可以用魔法搬野砌野，但我想砌嘢必先要明白背後既原理，否則會咩都唔成事。而且，花車唔單止要識行識走，設計唔止要好睇更加要貼題，唔可以只顧我哋嘅個人愛好。







煮野方面，據了解三位評審都唔係普通人，我地鐘意食嘅野，佢哋未必啱食。



由於不設獎項，往年嘅豐收慶典我都係好求其咁參加，今次睇嚟我要認真少少。



距離豐收慶典仲有三日，我要做得好好睇睇。



我搵咗烏鴉組隊參加花車巡遊，因為我知道佢點都會拉到啲適合嘅人一隊，同埋佢係現階段最唔似會拒絕我嘅人，雖然我唔太識欣賞佢嘅中二美學，但我相信同佢一隊都唔會壞得去邊。







煮野食方面，我知道自己係技巧方面冇咩勝算，唯有喺情懷方面取巧。



由於評審名單公開咗，我諗我可以由佢哋嘅身份入手，整幾味佢鄉下嘅家鄉小菜，賺幾分印象分。



就係咁樣，我要好認真咁進行人生第一次認真嘅花車巡遊，同埋煮認真嘅飯。



花車巡遊唔敢講，喺美食評賞方面我有揸拿啲，主要係因為我已經熟讀咗遊戲故事。我好了解遊戲唔同NPC嘅背景故事同埋關係圖，自然更加容易捉到佢哋條路。如果唔係煮野食時不得使用魔法，我相信我嘅勝算會更加大。