OT臨收工先發現走唔出個office 仲要比野追殺點部署: #β423-0002【代號：追殺】
即使喺幽暗既會議室入面，只靠住微弱既手機燈光，我都可以清楚睇到距瞪圓既雙眼入面暴動既血絲。距用空洞但狠毒既眼神勾實我塊面，擘大既口就好似喺度講：你做咩依家先黎？你做咩唔救我？
我個腦一片空白。一般人可能一世都唔會見過咁血腥既咁真實既畫面，空氣入面瀰漫既鮮血味道更加係令人忍住唔作嘔都有難度，甚至可以話係似催吐劑。
槍game喪屍game？no, no, no, 喺呢個畫面底下簡直係不值一提。
同埋我依家先睇得清，嗰隻似人似雞既怪物既背對著我，距可以望住我，係因為距個頭扭左幾乎360度。
距依家就喺度打量我，就好似打量緊一隻肥美既獵物。
我感受到前所未有既死亡威脅。我既身體被恐懼麻痹，個腦一片混亂，完全唔知依家應該點行動。
距即刻衝過黎我唔夠距跑點算？
唔郁？咁同坐以待斃有咩分別？
你明唔明？係嗰種做錯一個選擇就即死既壓迫！
距用距戈對好似白內障咁既眼掘實我，個頭抽搐地越黎越犀利，顯得非常蠢蠢欲動。
我終於知道我點都要走，但係當我嘗試郁我隻腳既時候，我先發現......郁唔到！
距淨係喺度震，但就好似打左樁落地下咁，點嘗試郁距都無反應，我甚至覺得對腳好似無曬知覺咁！
『郁阿仆街！唔郁你就要死喺度啦！』我不停輕拍自己隻腳，近乎哀求咁係心中默念，就黎要喊出黎。
終於距一下撲埋黎，而呢下我腎上腺素急升，對腳一野將我撐左出去，令我趴低左喺幾米遠既地下。隻喪屍雞撲左個空，都失重心跌左落地下。我即刻連爬帶滾起返起身，九米九衝返去會議室既大門。
搞清楚到底發生咩事喺呢一刻已經唔重要，最緊要係保住條命仔先。
我一野推開會議室既大門，外面係昏暗空曠既停車場，真係痴撚左線，但我都無得理架啦？我即刻衝出去！
停車場既好處係夠多掩體，周圍都係車。壞處係......咁空曠我好難搵到下一個門口阿！
我同隻巨雞喺個無人既停車場度開始左一場荒謬既捉迷藏。我不停搵d車匿埋喺距地後面，而距......一路橫衝直撞，撞開撞凹一架又一架車，發出觸目驚心既一聲又一聲「碰！碰！」。唔好話比距食左，我諗比距撞一下都粉身碎骨。
阿我唔記得講：隻野成兩米幾高，仲高過一道標準既木門阿！你地依家知有幾恐怖啦？
避左我諗十幾二十分鐘，我好快就跑到腳軟，扯曬蝦，塊面青過青瓜。喂大佬我普通打工仔黎架咋，上次運動應該係中學體育堂啦！你放過我啦！
我坐係一架車既車門旁邊，背脊緊緊貼住車門，後面係怪物撕心裂肺既嘶吼，就好似因為搵唔到我而暴怒咁。距既叫聲就好似幾百隻猛獸一齊尖叫咁，然後比空蕩蕩既停車場無限放大。聲音既尖銳令我成身起曬雞皮，更加令我肌肉再次僵硬起來。
我好難唔想像如果我比距捉到會點。
但係我真係跑唔郁了。 就喺我絕望之際，竟然比我發現不遠處就係亮住綠燈牌既逃生出口，可能係我之前太專注逃命，on9到連出口喺附近都無留意到。
我轉身確認左一下怪物喺離我比較遠既位置，我即刻衝過去破門而出。
本身係諗住將自己同呢隻怪物隔絕左之後，喺呢個迷宮空間入面不停移動，利用地形隱藏我既位置。點知一打開道防火門，我一興奮放手，道門即刻重重咁合上左，發出清脆既「砰！」既一聲。
屌！ 我恨不得撞牆去宣洩對自己on9既憤怒，但我已經無時間，背後係怪物沈重既腳步聲，面前係一條向下既樓梯，我即刻連爬帶滾衝左落去，側身撞開左個出口。
我呆左喺原地，因為我返左黎office既走廊。
arm arm 你地都跟住我行，好清楚條路線係點，我根本無可能通過一條向下既樓梯返黎office走廊。
所有野已經無曬邏輯：迷宮一樣既異空間、殺人既怪物、活生生死喺我面前既同事兼老友。
但反正都返左黎，我迅速跑左返去自己個位拎返個背囊，並且將位入面盡量多既個人物品塞入個背囊度。
我知道自己依家就喺個類似死亡逃生既rpg game 入面，只有盡量收集夠多裝備先有可能生存落黎。
悲觀d諗，距未必係唯一一隻怪物，所以我絕對唔可以一路留喺office。
睇住檯面既全家福相架，我毫不猶疑將距揼落地下，然後掃開個相框，執起左一塊最大塊既碎玻璃。
我將距拎上手，諗左一陣。 「唉！」我無力咁垂低隻手。丁屎咁大塊玻璃對隻怪物有撚用咩？
我無好氣咁將距收左入背囊。睇住地上既全家福，我糾結再三，都係撥開地上d玻璃碎，將距收左入褲袋。
好！係時候要走！啱啱咁明目張膽咁打碎個相框個怪物肯定好快搵到黎呢度。我孭起背囊，思索左一陣，突然諗到個主意。
我衝去走廊既另一個盡頭，無遇到怪物。我好快將自己裝備好，帶住沈重既裝備就出發搵怪物。
怪物既位置唔難搵，從啱啱開始距就喺度不停嚎叫，係因為搵唔到我？但係叫聲有d奇怪，比啱啱更刺耳更幽怨，就好似......距喺度做緊d令距好痛苦既事咁。
我循住聲音黎到原本應該係經理房門外既位置，依家經理房已經成個消失左，剩返單調既牆紙。隻怪物就企喺牆邊不遠既位置，又係低住個頭唔知喺度做咩。
又食人？唔通呢個空間仲有人？
我勉強承受住震耳欲聾既音波，慢慢走近怪物，等我睇清眼前景象既全貌，我差d暈低。
成地都係......蛋。橡膠質既、佈滿黏液既......蛋。
距喺度生蛋，而生既方法係：喺個口度嘔出黎......
我花左一段時間緩和情緒。我用力咁吞左幾淡口水，企穩之後，我突然間無名火起。
「喂，怪物！」我厲聲喺距背後叫左一聲。 今次距無轉個頭過黎，而係直接轉身衝左過黎。 見到仲有隻蛋仲卡喺距喉嚨嗰度，條頸隆起左一個腫包，令我個胃一陣翻騰。
喺距衝到埋黎我面前只有幾十釐米既時候，我抬起事先準備好既滅火器，將嗰d二氧化碳定唔知咩氣體一野噴落距塊面度，距痛苦咁咆哮，擺動住雞爪，一時間漫天煙霧。 我再抽出腰間既消防斧，一野劈落距個頭度，一瞬間鮮血四濺，d血濺曬落我塊面度。
「吱！」距慘叫左一聲。
Fuck！都唔知有無細菌！
可能係腎上腺素既影響，我既動作充滿力量，沒有一絲猶豫。我抽出怪物頭上既斧頭，又一個側劈直接將距頭身分離，隻怪物直接倒地。
怪物倒地之後，我發左癲咁不停喺距身上不停劈、不停劈！
「屌你老母！阿帆有老婆仔女架知唔知阿！人地個女先兩歲咋！兩歲咋！人地幸福生活先啱啱開始咋！做咩要殺左距阿！殺左我呢間垃圾咪算囉！」
我一邊劈、一邊劈，愈來愈細力，愈來愈細力。直到隻怪物個軀幹早已經血肉模糊，直到我已經無曬力氣，我先跪坐落地下度，瑟縮埋一舊喺度喊。
「我應該點同距屋企人交代啊......？」 「點解偏偏係我遇到d咁既事啊......？」 隻怪物個頭反射反應咁蠕動，將卡喺頸入面嗰隻最後既蛋嘔左出黎。黏液濺落我腳邊，但我無理到。