係同屋室友?定係同居密友?: 12. 互相解救

小祺聽到學翹嘅回覆，心情立即由谷底彈返上山頂咁樣
 
「係呀，阿翹，有枝二氧化碳想加架，房間係…」
 
未等小祺講完，學翹已經回覆佢
 
「將張氣單放係工作檯就得架啦」
 
「唔該哂你」小祺聽到有人幫佢完成個job後，立即放下心頭大石
 




當小祺坐返埋位果時，雄哥就對佢解釋「我地所有趕、重要嘅job通常都會交俾Alvin同阿翹，因為佢地兩個係最可靠。如果係Bio或者Biochem緊急嘅job或者有野送上去，都係會交俾阿翹」
 
「點解嘅?咁佢工作量咪好大囉」
 
「因為阿翹同妳一樣，佢之前係我地嘅UG同PG，所以佢同理學院嘅同事好熟，有時我地做唔到D order或者搵唔到用家簽收，佢都有辦法搵到人」
 
「佢唔介意咁好人嘅?」
 
「因為佢而家有時仲會幫教授做研究，佢平日工作時間會留係office同出去幫手送野，但係一放左工，佢就會上實驗室做研究，只要以前教授一開口，佢就會返上去」
 




「咁…佢唔洗返屋企?」
 
「屋企呀…」一講到學翹屋企，雄哥都有點難過。而小祺見到咁之後都冇再追問落去，始終係人地嘅私事
 
15分鐘後，學翹就將送完嘅二氧化碳簽收單放係小祺面前
 
「唔該哂你呀」小祺好有禮貌咁講
 
「小事黎者，如果有緊急事，都可以搵我幫妳搞」學翹有禮貌咁回覆
 




學翹坐低係自己位望到電話，又係肖翠君嘅wts，內容都係一樣，幾時去律師樓搞加名
 
學翹循例咁答佢，話會問姐夫幾時有時間陪佢去
 
然後就通知裝修師傅，佢已經搬左去酒店式公寓，可以開始裝修
 
放工後，學翹今日並冇返佢而家臨時嘅住所，反而，佢上左理學院拎一大堆卷返自己部門嘅位，自己幫教授改mid term卷。即使係畢左業，佢仍然好鍾意為舊老闆幫手
………………………………………………………………………………….
 
「Suki，妳入一入黎丫」ROY通話內綫電話搵小祺同幾個同事入房
 
係房內，佢地睇住下兩星期即將介紹俾guest嘅資料，而且仲要係國語
 
「兩星期後，有一班內地嘅人員會黎了解下我地化學倉嘅野，所以要麻煩大家準備一下。咁Suki」
 




「係」
 
「咁就拜託妳去講解下俾Guest聽」ROY將呢個任務pass俾小祺
 
就算小祺已經係學校超過5年，不過佢所接觸嘅野大部分都係學生時代嘅事，部門運作仍然未熟悉，所以佢對於今次呢個task都有d驚
 
出返去自己個位時，佢立即睇睇資料，佢就發現，原來有好多野都唔識。於是係lunch time，佢同幾個同事坐埋一齊傾下呢個task點做
 
「既然係關於供應部，妳會唔會打算搵佢地幫幫妳手?話哂佢地都係我地部門」Doris提一提Suki
 
小祺都覺得呢個方法唔錯，但係佢諗一諗，上次咁樣俾人拒絕法，今次又唔知會點。因為佢已經了解到，有d同事係咩都唔想幫手，最好唔好煩到佢
 
「搵佢地幫手呀…我又會食檸檬啦喎」小祺將上次件事講俾同事知道
 
「傻妹，妳搵果兩位大哥就當然俾佢地拒絕啦，佢地出哂名唔做野，多少少野就投訴」




 
「所以我而家咪煩惱緊囉」
 
「妳搵另外果兩個咪得囉」
 
「佢地，我又怕麻煩到人地，佢地都有自己野要做，有時仲要幫另外果兩個做埋野」
 
「妳可以搵阿翹幫手呀，佢一定肯」穎雯係呢個時候伸個頭過黎講
 
「妳又知佢肯幫手?」Doris反問
 
「咁我同佢一齊M.Phil同PhD架嘛，識左咁耐，我好清楚佢性格」
 
「PhD??」小祺望一望穎雯
 




「係呀，佢同我同一個老細，我同佢一齊畢業架」
 
原來呢個小部門，入邊D同事都有深不可測嘅人係到