係同屋室友?定係同居密友?: 13. 邀請

學翹望住ROY forward俾佢嘅資料，邊睇邊jot低重要野。因為除左小祺之外，學翹都知道自己會介紹部門運作，因為老闆想搵一個對技術性資料，行動以及處理化學品有深認識嘅人去幫小祺手，學翹就自自然然成為唯一嘅人選
 
由壓縮氣體，到液態氮至化學品，呢d都係平日學翹要處理嘅事。學翹要處理嘅野，比其他老員工更多，呢個同佢鍾意學野嘅性格可能有少許關係
 
Mark低哂所有重點，甚至連部危險品車都再次溫習點用，唯一一樣令佢煩惱嘅，就係國語
 
學翹知道自己嘅國語，應該同古天樂差唔多level
 
要黎嘅始終都係要黎，當日上午，小祺留左係總部招呼來賓，過左午膳時間後，各來賓都準備去參觀危險倉，於是小祺就拎出電話同一張字條，佢將字條上邊嘅一組電話號碼save低後再開whatsapp，對方圖像係一隻Snoopy
 




而Snoopy，正正係學翹所鍾意嘅卡通人物
 
學翹收到小祺嘅wts之後15分鐘，一大眾來賓都到達佢地呢個小小嘅分部門參觀
 
苗學翹用好流利嘅英文同廣東話，仲有古天樂嘅普通話向各來賓介紹佢地部門工作、危險倉之類。原先小祺仲緊張會唔會準備唔夠，怕自己解釋得唔夠清楚，不過當學翹一出口介紹果時，佢所有嘅顧慮都一掃而空
 
苗學翹向各位來賓都解釋得非常清楚，如果遇上普通話問題，小祺會自動補上，佢地兩個嘅默契非常之好
 
當來賓離開之後，學翹電話收到小祺嘅Wts
 




「唔該哂你」
 
「唔洗客氣，妳電話我要del嗎?妳應該唔想同其他同事有太多深交」
 
小祺見到學翹嘅wts後，自己諗一諗
 
「乜我真係咁易睇得出咩?」
 
但係為左氣氛唔好咁尷尬，小祺都覆返佢
 




「唔洗Del的，可能我地會有事要聯絡。希望只會係公事上有聯絡」
 
小祺諗過之後，確定唔會得罪人後先send出去
 
的確，如果唔係同自己係同學關係嘅話，自己係唔太想同人有太深交。
 
暫時兩個人嘅距離，維持係同事之間
 
「ROY，你有事搵我?」學翹行入ROY間房
 
「喂兄弟，坐低先，有野搵你斟斟」
 
學翹坐低左之後，ROY都單刀直入
 
「我想搵你住入黎宿舍，你有冇問題?」




 
學翹聽到自己上司咁樣嘅提議後，個腦係到load緊，不出兩秒鐘，佢就反問
 
「但係而家唔係有同事住緊咩?而且仲有另一個同事都排緊隊喎。其實我住入黎冇問題，我平日甚少去街，但如果俾我爬左果一位同事頭，佢嘅反應一定會好大」
 
ROY坐正個人好快咁出答案
 
「佢黎左十幾年，職位冇變過，你應該都知原因」
 
「知道」
 
「有咩原因?」
 
「唔聽從指示，經常性請長病假，每次有足球大戰直播後總係會病一日。」
 




「仲有冇?」
 
「做野馬虎、用暴力對待辦公室嘅門同其他設備。鍾意投訴過多工作量，遲到早退。對其他同事及用家唔友善」
 
ROY聽到後都微微一笑「你都講哂d重點出黎，你認為大老闆會俾一個咁嘅員工黎住宿舍?有突發事件你覺得佢會幫手?」
 
好老實，果個同事一定唔會幫手，仲會用好多藉口黎推卸責任
 
如果住入黎宿舍，當然交通冇咁方便，而且有時要係宿舍standby，變相假期會少左，加上要扣5%人工當係租金。
 
但係宿舍空氣好過外邊，而且返大學用設施都方便，其實最大問題都係食野方面，而家可以叫外賣送上門，住入黎宿舍，仲可以將而家間屋放租，一舉兩得
 
其實老闆一早就預左學翹會住入黎，而家只不過係循例上問一問
 
自從學翹屋企出左意外後，佢有一排時間情緒低落，學校批左一個月恩恤假俾佢，佢都冇用哂，當屋企人火化後，佢第二日就立即返工。明顯地，佢用工作去麻醉自己




 
「冇問題，我而家屋企裝修緊，暫住係附近d服務式公寓。我諗…」
 
「唔洗咁快住，而家單位仲翻新緊，遲少少我地再通知你幾時搬入黎，同埋有咩儀式要搞，你自己決定」
 
「我明白」
 
「同事方面唔洗擔心，而家老闆都搜集緊一d資料，你明架啦，老闆之前點解唔批果位同事食肥雞餐」
 
苗學翹嘅頂頭老闆，郁起手上黎都唔會手軟