係同屋室友?定係同居密友?: 19. 律師樓

苗學翹今日專登唔渣車出去，一黎佢仲有d攰，二黎佢唔想肖氏一家圍住佢部車係到嘈，而最重要嘅係，中上環、灣仔同觀塘老母一樣，塞到仆街
 
上到去果間小律師行，坐係會客室等律師黎。肖太個樣已經非常開心，因為佢覺得間屋佢自己就快有份，所有傢私都安排今日送到，佢今日開心個樣，令到一眾街坊都非常討厭。肖太仲經常炫耀自己即將搬出公屋，殊不知佢遇上嘅問題，係令佢自己都意想不到咁大。
 
當代表肖家嘅律師事務所嘅律師入到黎，就問學翹拎樓契出黎
 
「苗生，我地已經準備好哂加名文件，呢到係印花稅要苗生你交嘅，仲有…呢到本行收費，如果冇問題可以簽名作實。然後我地再立新樓契」
 
苗學翹拎起d文件睇，好細心咁睇，肖翠君佢非常不滿，肖太太亦不停催促學翹簽名。其實苗學翹係有一個習慣，佢習慣所有文件都用同一枝鋼筆簽名，同埋佢個英文簽名「Clevery」係有少少地方冇人知道嘅寫法習慣
 




「哎呀~仲睇咩呀?一家人你荒我地會呃你咩」肖太太好不滿咁催促
 
「都係等一等啦」
 
「仲等咩丫!簽個名之嘛」
 
其時，會客室門響起叩門聲，然後文員打開門對入邊嘅人講
 
「麻煩哂各位，有位游律師黎左，佢自稱係苗生嘅代表律師」
 




其他人望住苗學翹，然後佢點頭承認，文員好快出去接游律師入黎
 
肖翠君仲不明所以咁問，點解無啦啦要搵佢屋企嘅律師黎
 
「解決我同妳地之間嘅事」苗學翹有d唔太高興咁講
 
「大家都係自己人，有咩解決者?快快手簽左名加名仲好啦，簽啦。我唔會害你架」
 
苗學翹望住肖太太「哦，係咩?」
 




游律師入到黎果一刻，代表肖家嘅律師都呆一呆，因為游律師係黎大狀嘅同學之餘，仲係律師界都出名，雖然冇自己嘅firm，但係佢嘅可靠，係行內係出哂名，而游律師嘅專長，就係分析問題，當學翹個姐夫係庭上有出色表現果時，佢背後總有個好同學游律師係到安排其他野。
 
如今好朋友嘅舅仔咁俾人恰法，游律師都義不容辭咁幫手，因為苗氏幾家人，都幫過游律師唔少。苗爸爸非常辛苦賺錢為自己家庭，所以游律師都答應過世伯，會好好照顧學翹
 
「我係苗學翹先生嘅代表律師」游律師黎到就交換咭片先，呢個係行規
 
負責接待嘅，原來係PCLL嘅實習trainee，所以當佢接咭片時都有d手震
 
「係…游律師，請你等等，我…我去叫師傅出黎」
 
「唔洗啦，呢個係trainee學野嘅好機會，我睇一睇料先」
 
游律師飛快咁睇過所有文件，都不禁暗自讚嘆對方嘅實習律師，佢所準備嘅文件好足料。不過始終係未正式掛牌，總係有少少甩漏
 
如果係正式執業嘅律師，而又唔係好似某d同著白色衫嘅人握手嘅律師之流嘅律師的話，肖家呢單Job，肯定係唔會接