係同屋室友?定係同居密友?: 21. 反擊

「結….結婚證書?我地都未結婚，點會有結婚證書」肖翠君開始支吾以對。雖然佢係大陸出世，但小學開始就係香港讀書，少少嘅法律，應該係話基本常識。一對冇血緣嘅男女，係法律上，必須有一張正式嘅結婚證書先可以成為合法夫婦
 
如今冇結婚證書係手，佢地關係點密切都好，層樓如果冇佢兩姐弟同意的話，佢屋企係冇可能拎到層樓
 
「我地可以加左名先結婚架嘛」肖太太開始方串大亂
 
「我係到聲明多一次，我同妳地姓肖嘅一家人唔會再有任何關係。層樓我同家姐係絕對唔會同意加妳地任何人嘅名上去」苗學翹今日嘅決絕，令肖氏一家都意想不到
 
「一係你加左我地名先啦，傢私都訂好哂啦」肖太太做最後嘅掙扎
 




「我唔會加，妳地一家人個心諗咩，妳地自己最清楚。肖翠君妳背住我做過D咩，妳應該好清楚」苗學翹用好冷漠嘅眼光望實肖翠君，一時間，肖翠君發現到自己嘅事原來俾人發現左
 
「你而家即係咩意思呀!我個女陪你捱左幾年喎!叫你加個名都唔得呀?」肖太太最終挖爛臉皮黎鬧，發癲程度有如我要食魚翅一般
 
「捱?捱妳地個屎忽呀?每一次妳地有要求，有邊次唔係係我身上拎著數?要車出車入，食野就搵定檯洗定野之後我去俾錢。過時過節又要孝敬下妳地，我地未結婚都已經咁，結婚後俾妳地掂埋我屋企D野咪仲死。今日點都好，我同妳地一家人恩斷義絕」
 
「你….你……」肖太太氣上心頭，佢之前所有幻想一下子全部破滅，但係，花生永遠都唔止一粒
 
「你竟然敢呃我地屋企?好!我地就同你上法庭!睇下個官點判死你呢D人渣!!」肖太太呢番「偉論」可能只有佢地自己一家人會同意，在場嘅幾位律師都知道….佢地執意上法庭的話，可能第一堂就有結果，而且有冇大狀肯接呢單CASE都未知，可能有d新手大狀會為左收入而接一場冇勝算嘅官司，就好似果d投資失敗、做保險俾人炒、做補習又冇料到嘅九流大狀先會接
 




「肖太太，苗生都係根據法律辦事，希望妳可以理解」張律師試圖打圓場，而肖氏一家非常之執著，苗學翹知道再留係到，可能又有不愉快事件發生，所以佢同游律師先行離開。不過離開前，游律師再俾咭片果個學師，故明思義，係睇好佢，叫佢考慮過去自己間firm個trainee或者將來過檔
 
離開律師事務所後，苗學翹自己搭車返到酒店式公寓休息
 
而肖氏一家，就開始為傢私退貨安排而煩惱。佢地貪念真大，所有傢私都係訂做，如今屋黎唔到手，所有傢私都可能要報銷，或者以低價賣返俾傢私廠
 
係佢地大鬧律師樓之時，消防接到投訴，有公屋住戶打開防煙門，又將物品放出走火通道，於是消防就聯同房屋署一齊去睇下
 
消防嘅老總同幫辦不停指出問題，房屋署職員不斷計分，得出結果，扣超過15分以上
 




亦即代表，佢地要搬離現有居所