係同屋室友?定係同居密友?: 37. 曝光

「save低，搞掂!」
 
小祺份功課，係一日之內就完成左，果時佢地兩個人連晚餐都未食。所以佢地就去廚房準備好今晚嘅晚餐
 
今晚係食肉醬意粉再加雪糕做甜品
 
完成哂功課嘅小祺胃口特別好，亦可以話係學翹煮野啱佢食，所以佢比平時嘅食量仲要多
 
佢地兩個一齊睇住電視，望住市區而家有幾亂，新聞亦都宣佈係凌晨2點左右會改發9號訊號
 




「呀…唔知我家姐佢地一家人點呢?」學翹呢個時候諗起學雯一家
 
「佢地住好遠架咩?」
 
「唔…同妳一樣住港島，佢地住西半山一帶」
 
「你堂家姐屋企咁富貴架?」
 
「咁姐夫係大狀，好多人搵佢打官司，但係都有代價架」
 




「真係?」
 
「姐夫經常都要用好多時間分柝案情同埋案件嚴重程度，雖然大狀寫一封信就幾萬蚊，不過姐夫封封信都係親自寫，唔係用temple」
 
就係學翹同小祺解釋緊黎大狀嘅野果時，學翹部電話響起，要求Facetime。來電者正正係家姐，不過打得俾佢facetime嘅，通常都係佢對外甥
 
「舅父!!!!!!!」兩把小朋友聲音由電話中響出，而且仲充滿活力
 
「卓凝，卓賢，點呀?你地果邊大唔大風雨呀?」
 




「好大風，仲呼呼聲呀!!!仲有好大雨呀!!!!」兩個小朋友非常興奮咁對住電話
 
「喂，你地要聽爸爸媽媽同埋姐姐話，唔好四周圍去呀知嘛?」
 
「知道啦!!!舅父你有咩做呀?你果邊點呀?」
 
「我呢到郊區當然風大雨大啦，不過我住3樓所以冇咩風呀」
 
當學翹同佢自己屋企人傾計果時，佢坐埋一邊避免上鏡，始終一男一女係同一間屋之中，少D人知道比較好
 
但係當佢起身去洗手間時，下學年升四年級嘅卓凝見到小祺行過學翹嘅身後，佢嘅觸覺立即上升進入警備狀態，務求一睹神秘女子嘅盧山真面目
 
小祺由洗手間行出黎，輕輕經過學翹身後時，電話另一端嘅卓凝好眼利咁見到佢，於是小妹妹就大聲叫
 
「舅父點解會有個姐姐係你屋企架!!!!」




 
卓凝咁樣大聲一叫，係佢地屋企嘅學雯同姐夫都不約而同將個頭擰個頭過黎
 
「咩話?卓賢，家姐話咩呀?」
 
「家姐話係電話入邊見到有個姐姐係舅父屋企呀」
 
學雯聽到個仔咁講，好驚個細佬又帶返個貪錢港女返屋企，所以佢好急咁走到去電話前邊
 
「係咪真架!!!」
 
學翹點都估唔到，會俾個外甥女見到小祺係屋企出現，佢有少少支吾以對咁答佢家姐
 
「家姐呀，其實呢就…件事就唔係妳諗咁嚴重嘅…」
 




「咁即係真架啦!!!係唔係呀!!!」
 
「係就係…不過…」
 
電話嘅另一端，黎大狀都拎住生果走埋過黎，好明顯係抱住睇戲嘅心態
 
卓凝好興奮咁係佢媽咪身邊咁講「舅父!!!叫姐姐過黎啦!!!快D啦!!!!認罪扣三分一刑期架!!!」
 
學翹真心佩服佢姐夫，將庭上嘅技巧教哂俾對仔女，所以佢地兩個都好牙尖咀利，屋企晚晚好似開Court咁款
 
學翹見到家姐一家人都出現哂係電話中，都知道瞞佢地唔住
 
「Suki呀，妳過一過黎丫」
 
係鏡頭外，小祺有點怕羞咁慢慢行過黎




 
「係…家姐、姐夫妳好，我叫小祺，係學翹嘅同事」