係同屋室友?定係同居密友?: (S2)04. 各懷鬼胎

話明係放題，係一個大吃大喝嘅地方，所以小祺今日食量係多左少少，不過冇學翹係佢身邊，佢覺得有少少唔慣。雖然Victor坐係佢身邊照顧佢，但係感覺上，冇學翹咁好。
 
一大班同學聚會，肯定會有人飲酒，小祺嘅中學同學都唔例外。啤酒紅酒呢d係標準，仲有白餐酒同埋芝華士
 
場中酒鬼一見到就非常開心，無酒不歡，一時間，大量令狐沖出現
 
有同學拎住酒樽周圍隊，不停隊，亂咁隊，係人都隊。已經有幾位女同學俾佢地隊中，其實盲嘅都知道佢地嘅目的
 
小祺以前係班上係一隻幽靈般嘅物體，除左測驗考試之外，佢係班上嘅存在感可以話係0。不過，就算係存在感係0，佢自己都估唔到，全校最受歡迎嘅學生會會長兼校草模範生，同佢自己係雙向暗戀
 




係Victor身邊，都有其他男仔朋友存在，有幾個係佢生死之交，所以佢地一直都知道Victor係中學果時已經係鍾意小祺，雖然大學時都出過pool，但係佢最鍾意果個仍然係小祺。
 
「喂，Victor，Suki佢冇男朋友喎，你唔上去同佢飲返杯?佢好似一杯就收檔果種黎架喎」
 
「係囉，一於黎過醉後行兇，佢應該仲係…處喎」 「Victor你今晚有罐頭開囉」
 
一班男生係到笑騎騎咁講衰野，不停俾方法Victor，不過佢地都唔知道，小祺身後有學翹呢個守護天使係到。
 
係學翹車緊小祺去會場果時，佢遞左袋藥俾小祺
 




…………………………………….
 
「咩黎架?」小祺拎住袋藥問
 
「解酒藥，妳而家食左4粒先，一陣飲完酒再食一粒，咁妳就冇咁易醉」
 
「都話左我唔飲酒囉」
 
「唏!早年我同班同學返學校盤菜宴夠話唔飲酒啦，結果咪一開始就芝士華、白蘭地、Club VSOP、人頭馬、茅台乜都有」
 




「咁你地結果係點呀?」
 
「結果咪成班係學校禮堂瞓哂係到囉，第二日又頭痛又乜，仲要幫手清潔」
 
「點解呀?」「嘔到周圍都係」
 
「咁你呢?」 「我好平安咁返到屋企瞓覺」
 
聽完學翹咁講，小祺立即食塊餅再食藥，以防萬一
 
落車時，學翹拎左小祺部電話，係wts同LINE上打定個msg
 
「你做咩呀?」
 
「如果我一次過收到妳兩個msg，即係代表妳同我講飲左酒，可能會醉，我會儘快上黎接妳走」




………………………………………………….
佢地聚會嘅放題餐廳，並唔係位於普通商場，間放題位於酒店內部，以前係自助餐餐廳，不過自從冇肺後，就改為放題餐廳。而酒店亦好識趣，為光顧放題嘅客人提供50%租房價錢，目的就係俾d人飲完酒、食完飯後有一個「休息」嘅地方
 
係杏壇中學校友聚會中，一眾同學飲得不亦樂乎
 
「Suki，我敬妳一杯」忽然Jolin走埋去小祺身邊想同佢飲
 
「唔好啦Jolin，我唔識飲酒」 「咁唔俾面?」
 
「我真係唔識飲呢…」
 
呢一幕俾Victor見到，佢心諗英雄救美嘅機會黎啦，佢一個箭步行上小祺身邊幫佢擋酒
 
「Jolin，Suki佢唔飲得酒，我代佢飲」說罷，Victor拎起酒杯，幫小祺飲左杯紅酒
 




「喂，校草，做咩咁維護Suki呀?你對佢有意思呀?」旁邊嘅同學開始起哄
 
「嗨!!!喂Victor!!!嗨!!!」
 
Jolin見Victor咁幫住小祺，所以就更想夾小祺飲一杯，佢再倒一杯白酒，遞俾小祺
 
Victor再一次化身英雄，再幫小祺頂左杯白酒。果然係讀過大學嘅Victor，係大學冇飲過酒，點叫大學生?
 
有Jolin嘅朋友見狀，誓要幫自己朋友出啖氣，今次佢地拎枝芝華士出黎
 
要知道芝華士溝綠茶的話，係非常易入口，但亦因為易入口，所以令人好易醉同埋穿胃
 
當有人拎出芝華士果時，就知道，今晚酒店有生意了
 
大家玩到興高彩烈，一時間，眾人非常興奮