係同屋室友?定係同居密友?: (S2)06. 佢係我男朋友

小祺嘅同學見到小祺跌入學翹懷中後，想伸手拉佢返黎
 
然後小祺見狀就出聲
 
「唔洗你地啦，佢係黎接我走架」
 
一聽小祺咁講，所有人都好疑惑，究竟佢係小祺邊個?點解會黎接佢走?
 
「Suki妳有冇睇清楚係邊個呀?」
 




小祺望一望「我同大家介紹，佢叫苗學翹，係我大學嘅同事」
 
眾人聽到同事後，都大呼好彩，原來小祺仲未名花有主，不過之後佢地就唔係咁諗
 
「佢亦都係同我一齊住係宿舍」
 
大家聽到後，連飲左酒嘅都醒一醒
 
「Suki，妳唔係話同女同事一齊住咩?點解會變左男同事架?」
 




小祺嘟長個咀「如果我唔飲果兩杯，我就會同妳地講我同女同事一齊住，不過飲左啦，我腳步浮浮，先同妳地坦白咁講，我係同男同事一齊住宿舍，同埋….」
 
小祺抬頭望住學翹，學翹知道小祺想講咩，所以佢點一點頭
 
「佢係我男朋友」小祺雙手撓實學翹
 
當小祺宣佈學翹係佢男朋友時，立即全場酒醒。校草Victor同埋其他男同學非常失望，而女同學們就非常驚訝
 
因為佢地眼中，最平凡，最唔引人注目，最冇存在感嘅小祺，原來已經有男朋友，仲要係同居果隻
 




「好啦，我地走先啦」小祺撓實學翹離開
 
一眾人就睇住學翹拖起小祺離開會場，而同小祺比較熟絡嘅同學，都因為小祺離開而離場，佢地快步追上小祺
 
「Suki!!!」
 
「係?咩事?」
 
「妳真係冇事丫嘛?」同學細心問到
 
「我黎之前食定解酒藥，冇問題嘅」講完，佢再放幾粒入口用水送
 
「估唔到妳有備而黎喎」
 
「都係佢細心者」小祺望住學翹




 
「呀….連妳都派狗糧俾我地啦….咁妳快d返去休息下啦」
 
正當佢地轉身走時，學翹叫住佢地
 
「妳地住邊呀?我架車有位」
 
Peggy同Winnie都係小祺讀書時嘅朋友，所以學翹就打算車埋佢地
 
「Suki，妳批准我地做電燈膽?」
 
「有咩批准唔批准呢?上車啦」
 
結果佢地一行四人上左學翹部車，Peggy同Winnie都係住筲箕灣，所以佢地經紅隧過海上東區走廊
 




沿途佢地不停問小祺嘅事
 
「妳地拍拖幾耐呀?」
 
「幾耐呀…….唔…..上次打風果時囉」
 
「10號果次呀?」
 
「係呀…果次我返唔到屋企，佢就收留我幾日，之後我返屋企後發現自己好似鍾意左佢，佢又一直對我有意思，所以…..」
 
「所以妳直頭搬埋去住呢?」
 
小祺面紅紅點頭
 
「好羨慕啊，返工又一齊，放工返到屋企又一齊」




 
「咩喎…」
 
「妳放心啦，如果我地見到妳唔想見到嘅人，我地唔會亂講野架啦」
 
「得啦，我信得過妳地兩個」