係同屋室友?定係同居密友?: (S2)15. 商討案情

上菜時間到，苗氏一家人食得好開心，大家屋企人見面傾計
 
一如以往，佢地後生坐嘅檯，通常都會有餸剩低，所以每次學翹都會搵膠盒入起d餸菜
 
今日佢又入起，不過唔係為佢自己，佢係為左留俾小祺食
 
另一方面，小祺同Rachel今日早左完成實驗，佢地商量有咩做時，Rachel得知學翹屋企安排左個女仔同佢相睇後，就義不容辭，提議同小祺一齊出去尖沙咀睇一睇個對象
 
所以此時此刻，佢地兩個人係地鐵站行出黎
 




學翹佢地一家人係尖東果邊食飯，而小祺同Rachel係海港城一帶行
 
小祺用wts通知學翹，佢地黎左尖沙咀，到佢差唔多完場佢地就去等車
 
呢個果然係好方法，因為苗老太正想叫村姑去學翹到住幾日，帶下佢去玩
 
而村姑嘅計劃亦係如此
 
苗老太覺得自己就快抱曾孫，所以佢非常開心
 




食飯時，苗老太經過叫學翹照顧下村姑
 
「學翹呀，你幫阿娟夾下餸啦，你唔可以只係照顧個妹架」
 
學翹同學嬛兩個對望，然後學嬛雙手撓實學翹
 
「唔得架麻麻，阿哥要照顧我架，我唔俾人搶走阿哥架」
 
講完，苗學嬛成個人攬實佢阿哥
 




村姑係食飯期間嘗試同學翹傾計，不過學翹嘅反應非常冷淡
 
「哦，係呀，哦，咁囉」呢d
 
村姑仍然覺得學翹只係怕羞
 
好快到左散席，苗學翹拎住吸左印嘅單據去停車場搞免費泊車
 
村姑係苗老太身邊陪住佢，村姑依然相信苗老太嘅話，非常期待一陣有車坐嘅時間
 
「阿娟呀，妳就快係自己人，唔好客氣，一陣我叫學翹車妳去佢到過幾晚佢帶妳玩返幾日，之後快快趣趣搞埋婚禮嘅野」
 
「知道麻麻」村姑呢一下非常胸有成足，佢嘅香港夢就快要實現
 
學翹係離開酒樓前sent左個msg俾小祺，通知佢就走得




 
「咁我地係邊度等好呀?」
 
「華懋等囉」
 
「即係邊度呀?」
 
「尖東華懋喎」
 
「唔知邊度呀」
 
「妖!!大富豪呀!!!」
 
一講大富豪，Rachel就立即知道地點，冇辦法啦，真係好出名丫嘛
 




學翹同黎大狀仲有一干人等去停車場拎車，姐夫輕輕拍下佢膊頭
 
「你同事單野呢，應該一堂就搞掂，唔洗你上庭」
 
「一堂咁快?」
 
「佢過堂都已經話要打，呢d小事，裁判署者，唔洗去地院，好快搞掂」
 
「鋤得入?」
 
姐夫笑一笑「喂，齊哂料，咁簡單都鋤唔入嘅話，個檢控官炒得啦，而且對家申請legal aid，求其幸運大抽獎抽左個打交通嘅俾佢，好難唔贏喎」
 
「最高幾多碌呀?」
 
「傷人39，最高3碌，對家問過可唔可以O.N.E. BINDOVER，不過否決左，佢拎野車你果頭果下就肯定唔可以ONE，佢唔認罪，冇左1/3優惠。而且佢又性情暴燥，睇黎都係受靶居多，似坐足3碌」




 
「叫個檢控官輕手少少，始終佢有個女」
 
「難得好似你咁好心，怪唔得個村姑咁鍾意你」姐夫又笑騎騎咁講
 
「呀….你唔好提佢啦」
 
「一係你叫個同事下次黎囉」
 
「下…..咩…咩同事呀」
 
「我上次見佢一出地鐵站，就走左上你車，然後你開車返宿舍係唔係?」
 
學翹碌大隻眼望住姐夫「你幾時見到架?」
 




「就上個月某個星期一晚之嘛，你家姐都知呀」
 
「下!!!!」
 
「拿，乖乖地認罪，係唔係金屋藏嬌先」
 
「呀….佢係我….室友，一齊住宿舍，正確黎講係我收留佢」
 
「呵呵，你仲唔斷正?」