有一晚一個來電外傳: 第二章 - 出國前的租約
中三暑假正式開始，轉眼間同阿紫已經分開近半年，
喊又喊過，傷又傷過，
最頹廢既時期總算捱過去，
都係多得阿欣同我班朋友善言安慰，
我先可以咁快習慣返正常既生活模式。
雖然係習慣，但心入面總會有一種難以言喻既隱痛
長久咁寄生住，一到夜晚就有如毒癮一樣發作，不斷
削弱我既心理狀態，改變我既情緒，相信大家都會明白果種感覺。
不過，亦都係呢一次戀愛，令我更加意識到朋友既可貴。
七月中，
阿欣忙完會考之後，搵返我。
每次睇到手機熒幕顯示住阿欣既來電，
心入面都有一種莫名其妙既感覺，
就好似一個好親暱既人陪我咁。
我連忙接起電話。
我：點呀，會考果排都冇回音，
考得如何呀？
阿欣：嗯．．唔好再提啦．．
反正都已經冇咩所謂．．
我：點會冇所謂呀？
你真係唔為你前途擔心架咩！？
阿欣：阿樂．．．
其實我打黎，係想同你講件事架．．
我其實都心裡有數，
因為我清楚知道係咩事．．．
應該係關於我同阿欣既發展吧．．．
呢個時候，我輕輕係腦海入面，
回想返當日（幾個月前）阿欣特登邀約我打羽毛球去開解我，
以及同我表白既情節。
係果陣時，我仲記得我同佢以下呢兩句對話：
我：阿欣．．．
其實我岩岩先分手，受左咁大傷害，
一時之間我真係接受唔到愛情住，
我唔想到頭黎，換黎另一種傷害。
同埋，最重要既係．．．
我唔想當你係水泡咁，做阿紫既代替品而同你一齊．．
你明唔明．．？
阿欣聽到之後，就話：我明架．．
阿樂．．我都知你一時三刻冇可能咁快
接受到一段新戀情．．．
同埋，我都已經要預備會考．．
不如咁啦．．我地做住朋友先，
到我考完試，你放暑假時，
再睇下你接唔接受到好唔好？
你真係唔駛咁快答我住架．．
估唔到時間過得咁快，
轉眼間暑假，轉眼間阿欣已完左會考。
其實，我都已經作好主意，
將我既答案講比佢知。
阿欣：不如．．
聽日我地約出黎講呀。
我：好呀，冇問題．．
約好時間地點之後，我關上房燈，
躺上床，從那狹小窗框中望望外周既夜景。
微雨下為街景添多左一份剔透感，
夜晚十一點街道依然繁忙，
我凝望住汽車上上落落既情況良久，
心入面卻對住如此繁榮既景象萌生出一種寂寞同唏噓感。
當時心底係度諗：
人既關係，感情點解可以咁奇怪？
由陌生到相識，到相愛，我同阿紫既感情曾經
一度慢慢升溫，甚至去過短暫而觸目既沸點。
但係分開過後，一個原本最相愛，感情最濃最深既人，
驀然變得最陌生，最冰冷，甚至大家都唔會再搵大家，
唔會再了解大家既世界，大家係度做緊咩，過成點。
一對原本相戀既小情人，關係卻淪落至連普通朋友都不如，
真係夠諷刺。單單係呢點仲令我點樣去再敢愛一個人？
我對自己實在冇信心。
我側一側身，用手抱緊張被，
果種柔軟感就自然令我諗返阿紫既身體，
當然兩者係無法媲美。
我雙眼合緊，回憶以前攬住佢時既觸感，
柔軟，溫暖，芳馥，富彈性，具立體感，
呢ｄ記憶殘片就好似係冇幾耐前發生一樣，
感覺依然歷歷在目。
每晚既我，幾乎都係重覆住以上既事情，
就好似將一套電影翻播數十次，數百次一樣，
只係主角變成自己。
就係咁，不知不覺間，我就睡著了。
那是一個難以入眠既夜深啊．．．
起身原來已經係十一點，
見時間非常趕，我就即刻飛去浴室大動干戈，
然後求其笠件Tee加條牛仔褲就出門口啦。
正當答緊地鐵既途中，手提電話突然響起．．．
阿欣：喂！係邊呀？
我：就到啦就到啦。
其實仲未咁快到，差好幾個站，不過當然要講得好聽ｄ啦！
阿欣：咁即係係邊呀？答緊車定行緊過黎呀？
當我想答果時，
地鐵閂口既聲音大大聲咁響起：
嘟嘟嘟嘟嘟嘟嘟－─────
心諗：仆街啦，真係百詞莫辯啦！
阿欣有ｄ氣憤咁話：
哦！仲嘟嘟嘟嘟緊！即係仲答緊車啦！
死人樂隔咁耐先約你出黎一次你都要同我遲到架喎！
你仲有咩好解釋。
我：唔好意思呀，我尋日訓得唔係咁好，
所以先遲左起身，哈哈！
阿欣：笑笑笑，仲唔快ｄ死過黎喎！
我：我當然想死快ｄ過黎，
但我都叫唔到車長開快ｄ架。
阿欣：哎呀，仲咁串嘴呀！
快ｄ過黎，等我剝甩你棚牙佢！
我：好好好，我買副假牙比你慢慢剝。
阿欣既說話方式就係咁，真性情，
直腸直肚，不作忌諱，
同佢呢種相處方式其幾自然舒服。
到九龍塘地鐵站之後，
就直接跑去又一城搵阿欣啦。
冇見阿欣一排，今日一見，
覺得佢皮膚依舊白裡透紅，
就好似夏天既陽光都唔可以破壞佢既肌膚一樣。
我都忍唔住話：你既膚色真係四季都白架喎，
我曬幾曬已經黑啦。
阿欣向我單一單眼：做咩呀，羨慕呢！
你唔駛旨意藉讚我一句扯開話題呀！
你遲到喎！
我：噯，點都係逃唔過你既法眼。
阿欣：你呢ｄ招數太低啦，一睇就睇得出啦。
我：我補償比你啦，最多請你食ｄ野補數啦！
阿欣：又好，樓上food court吧！
我仔細咁望一望阿欣，
頭髮比以前長左，今日佢後面多左一個髮夾，
束起左少少頭髮，有點日系既風格。
我地一邊步行，一邊講講大家既近況。
阿欣先開口：樂，睇你好似瘦左少少咁既，
唔舒服嗎？
我摸一摸自己臉頰，然後話：
唔係呀，有瘦到咩？可能近排諗野諗得多，
訓得唔好掛。不過我係食極都食唔肥既，
唔似你。
阿欣皺眉抱怨：我而家好肥咩？
你對眼生係後面架！？
我：哈哈，肥少少先可愛呀麻，
唔好好似一般女仔骨杉杉咁。
阿欣：我呢ｄ叫標準！你地ｄ男仔識咩！
我心諗：標準既只係上身吧！
當然呢句我冇講出口，否則必然有殺身之禍。
我：不過，今日你束起既髮型同以前唔同左呢。
阿欣見到我咁講，就對我有點雀躍：
係咩？嘻！點唔同法呀？好睇嗎？
我點點頭：好好睇，好少女，好有和風既味道！
阿欣笑左起黎：哈哈，好和風！你當我係野食咩！
我：係既話味道應該唔錯哦！
阿欣：識得講笑心情應該唔錯啦！？
見你咁我就放心啦，
我會考期間一直擔心你耶！
我微微搖頭：其實心情亦冇咩點，
我亦唔係已經冇晒事，
只係學你話，生活總要過落去既，
唔開心夠，係時候要振一振作呀麻！
總唔能夠為一樣野周旋咁耐吧！
阿欣聽到我咁講，
就輕輕咁拍我膊頭：叻仔！睇黎你諗法好似成熟左喎！
咪當多個經驗囉！
我：哈，唔係啦，一到夜晚我最打回原形！
唔知點解總係係夜深人靜時胡思亂想。
然後，阿欣輕輕靠埋我耳邊．．．．
阿欣輕輕靠埋我耳邊，
我身體突然覺得彊硬左一樣，
佢語氣帶點誘惑話：咁你諗住我咪得囉！我又唔介意既。
比佢咁講一講，果時連下身都硬埋，
真係弱不禁風。
我：唔好啦，諗你咪更加訓唔倒！
阿欣聽到我咁講之後就特登加快腳步，
一副唔想理我既樣。我見佢咁，
我又學佢一樣加快腳步。
我：喂喂，行咁快做咩呀？
你好趕時間咩？
阿欣：唔係呀，唔想理你咋麻！
我：我知你唔會咁小器既。
望住阿欣嬲既樣，其實都幾有趣。
阿欣：唔係喎，我份人係極小器架咋喎。
然後講完阿欣就再加快腳步。
我見佢咁，心入面由衷咁口快講左句說話：
但你唔理我既話，我諗冇咩人會理我架啦．．
雖然話口快，但事實的確如此，
最交得心莫過係佢。
行係我面前既阿欣，係果時停低腳步，
稍稍轉轉身，本來有點嬲爆爆既口面，
而家卻展顏微笑。
我心底實在費解：係咪個個女仔既表情都係咁週期性？
唔開心幾秒，開心返幾秒，又唔開心幾秒───
佢行過黎，捉住我手心話：行快ｄ啦，我肚餓啦。
然後我地就睇下有咩野好食，
見到泰式野咁吸引，我地都不約而同選擇了。
阿欣要既係豬頸肉金邊粉，
我就點了海南雞。
搵個位子坐好之後，
阿欣主動夾左件豬頸肉，話：交換呀，好嗎？
我點頭同意，
然後話：係呢，你都仲未同我講你會考考成點。
阿欣微微嘆氣，心情突然變得沉重起黎：
考成點都已經唔再重要啦．．
阿欣：嗯，ｄ海南雞味道唔錯啊可？
我下意識覺得阿欣扯開左話題，
唔通佢有咩唔想講？
不過當時我冇迫佢。
阿欣：係呢，你揀理定文科呀？
我：嗯，當然係理啦，
文科科目太悶，我次次上親堂都訓覺收場。
簡直就好似催眠一樣，仲好過食安眠藥！
有次訓到口水直流添．．
阿欣：真係核突，對歷史果ｄ唔感興趣？
我：一點也不。
阿欣：選附加數？
我點頭：好擔心呀，但實在冇咩其他好選擇，
人地話，修左附加數之後對普通數學科目會比較著數，
做起題目時會較得心應手，
我亦因為咁才選啊！
阿欣：都係既，對慣難既數，對返普通數學會易應付ｄ。
不過附加數唔係易既科目，特別係對你黎講，
你真係落足幾倍努力先得呀！
阿欣繼續話：岩啦，我可以比我ｄ書你睇下先，
預習一下嘛。
我：多謝你，一直以黎你都幫左我好多好多。
阿欣語氣略沉：可能機會唔太多啦．．
我見阿欣咁樣，顯然有ｄ唔對路，
平時既佢絕對唔係咁，我有點擔心．．
於是我話：係咪有ｄ咩發生左，
係既唔怕講喎，我會支持你。
阿欣食左兩口豬頸肉，便擱下雙筷。
神色帶點凝重，稍頃，
張開口：嗯．．．
亦都係我搵你出黎既原因．．
我果時有點唔明白，
如果係講我地日後既發展，
倒不置於咁既心情吧，
總覺得氣氛有ｄ不對，
我亦隱隱意識到有咩大件事來臨一樣。
我：放鬆ｄ，慢慢講，
我非常樂意聽。
阿欣眼定定咁望住我，然後終於道出令我吃驚既說話．．
阿欣：樂．．
我患左絕症，時日無多啦！
我愣住好一會，
簡直不相信自己既耳朵，
我：下！？咩話？？絕症！？
咩病呀？點得黎架？點解而家先同我講呀？
阿欣見我表情咁認真，
不禁笑起上黎：哈哈，講笑咋，
點會無啦啦得絕症呀，你都傻既。
不過見你咁緊張果個樣，真係好好笑，
而且我都好開心見你咁！
我：頂你個屎忽欣，好搵唔搵搵ｄ咁既野黎講，
我真係嬲架！認真ｄ好唔好？
阿欣稍為正經一點：時日無多係真既．．
我：嗯？點解．．？
阿欣：因為，我同媽咪好快就移民去美國。
果一刻，我聽到呢一句消息，
反應依然不下於剛才阿欣講笑果句，
我實在完全唔知點回話，
就好似喉嚨聲帶瞬間消失左一樣，
縱使我張開口，但卻無言以對．．
我果時又覺得阿欣講笑，
然後話：阿欣．．
你講笑咋下話？
都話我會嬲．．．．
阿欣斬釘截鐵：係真。
所以野已經安排好．．
我倆係果時互相對望，
手上都停下食野既動作．．
我真係唔敢相信耳邊既一切係事實！
我：係．．係幾時既事？
點解到咁急先同我講？
阿欣：半年前，媽咪已經講過呢個提議，
起初我都以為佢講笑，並無加作理會。
但佢既意志好堅定，畢竟果邊有人接濟比較好，
最主要既係咁樣就可以同老豆分開，
唔駛再受佢氣。
我默默咁聽，一直冇回話。
阿欣：一直以黎媽咪都受住老豆既氣，
坦然同我講話已經忍夠佢，一直比佢搞到好唔開心。
加埋佢酗酒好賭，為呢ｄ話題實在鬧過好多好多似交，
我一個女仔又做得ｄ咩？所以佢話移民，縱然我係幾唔願意，
我都唔想佢再留係度受苦，或者離開呢度對佢黎講係一種解脫，
我實在好錫我媽咪，所以我並冇反對ｄ咩，為我自己爭取ｄ咩，
只要我媽咪過得舒服就夠，而我去度邊都一樣。
阿欣繼續話：樂，你屋企景況同我差唔多，
家人關係唔好，你都應該好明白你媽咪既痛苦吧？
換轉你係我，你都會答允你媽咪既要求，係咪？
不過，令我想留低，最唔捨得既．．
就只係阿樂你，你知嗎．．？
阿欣最後呢兩句說話，打入左我心底入面，泛起無數無數漣漪。
阿欣：最初既時候，屋企生活都比較富庶，
老豆無好賭，縱然有時會飲一ｄ酒，
但就唔會去到酗酒既程度。後期老豆學人
玩股票，聽媽咪講好似最後蝕左頗多既錢。
於是就從私人樓搬到普通屋村，亦即係你之前想黎我屋企
果個單位。
聽到呢度，我先知道，原來阿欣本身都係有錢人家。
到至今，我先發覺，原來我根本唔太了解阿欣，
枉為佢既朋友．．．
阿欣啜兩口檸檬茶，繼續話：
事後因為老豆打擊好大，
就開始飲酒成性，
然後冇幾耐又跟人賭錢，
靠運氣過生活，所以媽咪就成日同佢嘈，
搞到我有時都好難集中精神讀書。
自始我既性格就變得比較難親近，
所以冇太多朋友。
講到呢度，阿欣強顏歡笑起黎，
見住佢咁，我無不為佢心傷。
阿欣：我會到以家先同你講，
係因為你果時剛分手無耐，
我都費事煩你，加上自己又要預備會考，
就一直留到而家。
估唔到，已經幾度遍體鱗傷既阿欣，
依然會為左我著想，加上佢一個人扛起佢
家庭背景既現實，亦冇咩同其他人講過，
成日憋係心入面應該非常痛苦，
我真係想像唔倒佢係點樣捱過黎，
佢實在比我想像中堅強好多．．
我卻冇為佢做過ｄ咩。
我：其實你有咩都可以同我講，
屈住屈住咁耐又何苦？
你知我都好樂意聽你既一切一切架麻！
係果時，阿欣再講一句說話，
令我初次感受到默默愛住一個人既偉大。
我：其實你有咩都可以同我講，
屈住屈住咁耐又何苦？
你知我都好樂意聽你既一切一切架麻！
阿欣聽到我咁講之後，
微微搖搖頭：聽到你咁講我已經好滿足架啦！
我唔講你知，係唔想比倒咩麻煩或者負擔你，
果時你亦需要時間去將分手既事忘記，
我仲點忍心見到你更加愁眉苦臉落去呢？
你冇睇到你當時既頹樣咋，本身已經樣衰架啦，
仲要黑埋口面，講埋比你知咪仲麻煩！
我唔想你連我果份都操心埋，果時既你最重要既
係振作起黎。況且．．．．
我：況且咩野？
阿欣淡淡咁話：一直以黎有好多野都係自己放係心入面，
都慣晒啦，所以呢ｄ野對我黎講都唔太構成影響，
你唔駛太擔心我喎！我真係冇咩事呢！
我仔細聆聽阿欣既說話後，
我徹底感受到阿欣佢實在太處處為我著想，
唔單止一直以黎要承受住屋企既負面環境，
仲要搞到自己變得無法親近，冇咩朋友，
有心事都唔可以同人講，只係收埋係心度，
背負住呢一切一切去承擔自己既學業，
仲要幫我補習，係我分手既時候開解我。
但咁樣對佢一ｄ都唔公平啊！
我腦入面掠過一絲怒意，
提高聲線咁話：點會唔擔心呀！成日收收埋埋都自己都唔好啦！
你話你屋企發生問題之後性格就變得孤僻起黎，
咁已經係一個好明顯既影響啦！仲點可以話冇事呀！？
我自己都好想可以為你做返ｄ野架，你又知唔知呀！？
我自己講完之後，都好奇怪點解我情緒會變差，
變得對阿欣惡起黎，我果時只係將我心入面既野講晒出黎，
再唔理任何思索，因為我真係好重視阿欣呢個女仔，係情誼上．．
阿欣比我既語氣稍稍嚇親，
成個人好似懾住左咁，定神望住我，
但我仍可以察覺到佢澄澈眼珠輕微既抖動，
好似唔敢相信我會講出呢一番說話一樣。
阿欣支吾以對：阿樂．．．你．．．
我知我講錯野，脾氣差，
嚇親佢，我：對唔住，我太激動，
你處處為我，我仲咁樣對你。
果刻我心底入面感受到自己徹底既失敗，
我究竟係度做咩鳩呀！！
阿欣支頤展顏，笑住話：
我冇嬲你ｄ咩，你之所以咁激動，
完全係出於你對我既緊張，
呢ｄ係自然反應黎架，阿樂。
我：咁我同你咁熟，當然緊張你啦！
呢ｄ仲駛問既．．
阿欣搖搖頭：嗯嗯，緊張係出於愛既，
咁即係話你．．．
我一聽到阿欣咁講，
即刻打岔：食野！咩都唔好講！
阿欣：嘻，你走唔甩既。
然後我地倆人就繼續食野，
好似忘記左自己為咩而黎一樣。
食完野之後，倆人欠身離座，
係又一城商場入面隨便逛逛。
其實我一直比較鍾意漫無目的咁行，
無需要特別計劃定黎緊做ｄ咩，唔做ｄ咩，
行到邊興致起既，就做果樣。
又一城商場我果時應該係第二次去（屌你地冇得笑鳩我啦 ），
第一次係同邊個去，幾時去，早己經忘記得一乾二淨。
雖然係第二次去，但依然比入面複雜既扶手電梯搞到一頭霧水。
望著一間間名店既高級櫥窗陳列，
我亦即係得望既份，連入去既功夫都懶。
反而阿欣每次行過服裝鋪頭就一定會手指指，
問我意見。
阿欣：喂喂！樂，行過黎啦。
我：咩呀？
阿欣：行過黎先啦！
望下，你話我襯呢條裙靚唔靚？
我仔細望望，佢指既係一條黑色吊帶連身裙，
有點氣質既味道，
然後話：好似對你黎講，過於成熟喎！
阿欣：超，我都中五啦，咩都熟晒，怕咩姐！
我：哦？有人認老喎！
阿欣：妖，認真啦，好冇睇呀？
我：我點知呀，我又唔太識睇，
你問個sales咪仲好，做咩要問我姐！
阿欣：咁sales梗係話好睇架啦，話你懞盛盛架真係！
比ｄ意見都唔得！
我：我認為少女ｄ岩你好，睇落去可愛ｄ呀麻！
阿欣：嗯，我都覺我著得少女ｄ比較好睇！
聽完之後我心入面暗屌：屌你有晒答案仲問我！
我：不過果條裙都幾好既，鍾意既咪買囉。
阿欣：傻啦，邊有咁多錢姐！
我買衫平平地就算架啦，
名唔名牌咪又係咁著！
唔似得我班女仔連返學袋都要名牌，
無無謂謂！
我：最平凡既你就最好睇。
阿欣：嘻，估唔到你都幾識講野！
行行下，
我突然有個疑問：阿欣，你話你以前生活條件比較好，
咁你果時既性格係點架？
阿欣：果時？可能因為仲細，未好似而家咁男仔頭性格！
咪同普普通通女仔差唔多囉！
我不禁大笑：哈！真係想像唔倒你變成一個正常女仔果個款係點！
之後我當然受盡皮肉之災啦，
頂佢臭婆欣搣人果時真係好撚狼同痛！
我：喂！屎忽欣！好痛呀，比你搣紅左啦！
睇唔睇倒？
阿欣：哼！冇搣瘀你咪算便宜左你囉！
狗屎樂！
冇錯，佢一有咩唔忿氣就會叫我狗屎樂！
同佢嘈完之後，迎面而來既一個熟悉面孔令我不禁呆住，
係你！！？
果個人見到我，都停低左腳步，
我正想開口叫佢個名之際，
佢已經話：你咪阿樂！？一定係你啦！
哈哈，又會咁岩既，我地好多好多年冇見啦喎！
我：大波達！頂，咁都係你撞到你！
你條死肥仔！
阿欣：大波達？咁鬼搞笑既個名！哈哈！
大波達：頂你阿樂係女仔面前都叫我呢個花名！
我心諗：係喎，仆街啦，叫大波達叫得咁撚順口，
唔記得左阿欣企係我隔離添！
我：Er…嚴格黎講呢個唔係一個女仔黎！
阿欣即刻兜掌用力拍我背脊，
痛到我叫左出黎。
大波達見到我呢個景況，即刻眼都突埋，
差在冇標青屎。
大波達幸災樂禍咁話：哈哈，阿樂你都有今日啦！
比女仔食住。
我見太耐冇見，所以就想邀請佢飲杯野：
喂，一場見面，冇理由咁快走架？
一齊去飲杯野呀。
阿欣，你唔介意多一個人呀可？
阿欣好開心咁搖頭：唔介意呀，我對你地兩個Ｄ野好有興趣，
哈哈。
大波達：咁去邊好？
阿欣：星巴克吧！
就係咁，我同阿欣就係果時第一次去星巴克飲野，
第一次知道佢既口味，佢既嗜好。
三人行黎到星巴克，
環境的確舒適，
但我望望價錢牌，
心諗：屌！咁撚貴既！咖啡都要廿幾蚊杯！
我：喂，去買罐雀巢咖啡飲算數啦，
咁貴。
阿欣：又唔係成日黎，難得一場撞到朋友，
你都想搵個岩傾計既地方傾耐ｄ架麻，
一杯野飲坐成日都得架啦，阿樂！
我聽完佢咁講之後：有道理，坐成日就唔駒！
搵位坐啦大波達，今日我請你飲！
想飲咩即管開聲！
大波達：飲夠兩杯得唔得？
我即刻打左佢個波一下，然後話：
你睇下你既身型！
仲飲兩杯！而家見返你仲未中風都算偷笑啦！
大波達：哈，咁求其一杯比我啦。
我：咁我同阿欣出去買，你坐係度等陣。
說畢，大波達就用圓滾滾既身型滾去側邊坐低。
正一肉團黎！
出到收銀機位置，
我就問問阿欣：你鍾意飲咖啡架咩？
阿欣：做咩呀？想了解我呀！
我：咁算啦，我睇下有咩飲好過。
阿欣：喂！衰人！
我只係鍾意飲熱既咖啡架咋。
你呢？
我：我麻麻地架咋，有時嫌太苦太濃。
阿欣：咁跟我飲焦糖咖啡啦！
All time favourite。
唔會太苦又唔會太濃。
係果個時候，我個心入面，
就自動鑲嵌左焦糖咖啡呢個記憶，
直至而家，每次去星巴克時，
我都幾乎一成不變點呢杯咖啡，
但卻桃花依舊．．．
只覺自己有好多過往既回憶都寄生於生活點滴之中：
昔日去過既餐廳，
昔日既利口樂，
昔日既星巴克，
昔日既焦糖咖啡。
每每再遇時都會令我自動諗返過往既事，
有時我會處之泰然，
但有時卻無法釋懷。
大家有冇曾經問過自己，
太多回憶又係咪一件好事？
落完order，等左一陣之後，
三杯熱騰騰既咖啡就到手。
雖然係炎夏，但商場冷氣亦頗凍，
正好可以暖暖肚。
我地都坐低左之後，
就開始傾下大家既近況。
我：大波達，同你介紹一下，
佢叫阿欣，同我同校，不過讀緊中五既。
大波達個樣有點好奇：
咁你地係點識？
阿欣：因為條死蠢數學太差，
所以數學老師搵我教佢。
大波達：哈，益左你啦，阿樂！
我：食屎啦你，受唔少苦你唔知咋！
阿欣即刻用兇狠既眼神望住我：係咩？受左咩苦呀！
我：見你眼神咁兇狠！
好！呢杯咖啡我敬你既，飲！
我繼續話：波達，你而家讀書還好呀麻？
大波達：一般般啦，你知我頭腦唔係咁靈活。
我：睇得出，肥成咁想靈活都難。
阿欣：哈，阿樂你把口真係好賤！
係呢，你地係．．小學同學？
大波達：係呀，幾乎六年都同阿樂一班。
同佢都算幾熟，應該係話，真心朋友都係得佢一個。
我：因為佢太肥，所以小學時好多同學都排斥佢，或者恰佢，
當然我都有恰，但叫適可而止囉。
大波達：哈，你果ｄ係玩姐。
阿欣好奇問：點恰法？
我果時坦蕩蕩咁講：一班人玩逗袋。
大波達：哈，男仔玩意，女仔好難會明架啦。
阿欣一副認真既樣：有幾難明呀，玩豆袋呀麻，
我小學都好鍾意玩架。
阿欣咁講一講，
我同大波達都互相對望，
然後大笑起黎。
我：哈哈！你點玩呀阿欣！女仔之家！
阿欣傻傻咁話：有咩好笑姐！咪用手拋下拋下個豆袋囉。
我：阿欣，你果種豆袋就係拋既，
我地果種就係逗既，明唔明”豆”同”逗”既分別？
阿欣果時聽完，諗左一諗，
即刻話：妖，原來你講果ｄ，
哈哈，好鬼cheap呀你地！痴線架！
我：小學係咁架啦，
唔逗過人點出黎行呀。
冇佢過日辰好辛苦架！
大波達：哈哈，係呀，小學男仔都係玩呢味野。
我：咪臭係，唔通學女仔咁拖住手周圍行啦喎！
不過呢條友真係好Ｑ易喊架！
阿欣：下！？真係睇唔出喎。
我：真係痴鬼線，最記得係上美勞堂我多手
拗斷佢支鉛筆，跟住佢Ｄ馬尿就即刻標晒出黎啦。
仲要大大聲喊方死冇人知添！
阿欣：哈哈，唔係掛，一支鉛筆咋喎，咁跟住點呀？
我：跟住咪比老師罰到反艇囉，
真係多得呢條pk仔唔少！
大波達：冇計啦，果時得返一支鉛筆，
都比你拗斷，就唔知點解喊出黎啦！
唔係只係你架，我記得我同你有難同當過架。
我：邊次呀？鬼記得咩！
大波達：電腦堂比人罰果次囉！
我：哦，頂你仲好講，係你累我架！
大波達：哈哈！
阿欣：咩事呀，我想知呀！！
快講啦阿樂！
我：哦，有兩次既。
你想聽邊次？
阿欣：兩次都講晒。
於是，我就講左兩單經典小學雞野比阿欣知．．．
我：有一次上電腦堂，呢條肥仔摟我玩比卡超打排球
（唔知有冇人有印象呢隻game，n年前，屌你真係經典中既經典）
，咁我見悶悶地就應承佢啦！話晒我玩呢隻game真係無敵！
咁我就係電腦開啦！開頭玩都玩得好小心！
費事比阿sir見到！如果唔係就大獲。
點知呢條肥仔．．
阿欣：點呀點呀？
我：因為我成日羸，佢唔忿氣，
摟我一定要佢嬴為止，
咁我見佢輸唔切咪答應囉．．
點知同呢條柒頭皮玩多鋪，
呀～佢真係嬴我喎！
於是呢條友就忍唔住大大聲聲係堂上講－”哈哈！阿樂，今次仲唔我嬴！你都有今日啦！”
阿欣聽完之後，由衷便捂嘴邊大笑起黎：
哈哈，真係好百痴呀，咁即後點呀？
我：之後阿sir就走埋黎，同我地講：
你地都有今日啦！上堂玩遊戲！？
落堂訓完一輪話就叫我地罰抄”我以後不准在上課時玩遊戲”一百次。
正一屎忽鬼黎！
你話！點會有人咁百痴大大聲聲係堂上個呢句，
仲要全班最靜果時喎！
大波達：哈，咁真係忍唔倒呀麻果時，
衝口而出咋．．．
我：坐你隔離真係冇好野架！
阿欣：哈哈，幻想到果時你兩個百痴樣都已經夠好笑！
第二個呢第二個呢！
大波達：第二個．．仲爆．．
我：第二個又係電腦堂架，真係比佢害死！
果次真係慘啦，算好沙膽架啦。
又係呢條肥仔話上電腦堂齋聽好悶，
所以就無啦啦係我耳邊話－－
”喂！阿樂，比ｄ好野你睇呀”
”咩好野呀”
”日本ｄ水著女優真係好鬼正架”
”有幾正呀？”
”深田恭子囉（果時好heat），真係靚到甩碌，
開比你睇呀！”
說時遲那時快大波達沙膽到即刻係電腦開深田恭子ｄ
泳衣照，仲要睇到淫笑到好大聲－－－
阿欣果時笑到伏左係台，真係第一次見佢咁，
跟住就話：哈哈！！笑到好鬼辛苦呀！
跟住呢？
我：跟住仲駛問既．．
阿sir聽到佢d淫笑聲，當然又即刻行埋黎，
因為呢條肥仔開得太多相，閂唔切，梗係斷正啦！
叫左你減肥！成日手腳唔協調，閂少少野都咁慢！
最後兩個被記缺點一個！
諗返起最衰都係你！
大波達：咩姐，咁真係靚呀麻！
然後我一邊打大波達，一邊話：靚呀拿！靚呀拿！
大波達：唔好唔好！投降．．．
大波達繼續話：不過，阿樂的確係一個好男仔黎，
果時最交得心，又唔介意同我一齊玩既，
就只有佢。因為佢呢種性格，果時都好受男仔同
女仔歡迎，相反我就冇咩啦．．
我：傻啦，真心對人既一定會有人睇倒既。
阿欣微微笑：嗯，我知阿樂就係咁既為人，
所以我先同佢咁close咋麻。
大波達：話時話，我一開始已經好奇想問，
你地兩個係咩關係？
阿欣隨之開口回答，至於答咩呢，
就聽日繼續吧！
大波達：話時話，我一開始已經好奇想問，
你地兩個係咩關係？
霎時間比大波達問呢一個問題，
我實在有ｄ擔心，
原因唔係因為問題既本身，
而係阿欣一定會玩野。
我正想用我最快速度答之際，
阿欣個百痴婆已經搶先過我：仲駛問既，
我地係情侶黎架啦。
經佢咁講，我心諗：屌佢又神經失常啦，
呢ｄ就係成日將自己收收埋埋既後果！
我即刻兜啦梗係：唔駛理佢架大波達，
佢本身個人係有ｄ神化，
我藥都帶埋黎比佢食架啦，
一冇食藥就發作啦你睇下佢。
然後我即刻拎我ｄ心臟有問題既藥放係台面。
我同阿欣講：欣，你乖啦，夠鐘食藥啦，我喂你啦！
送住咖啡飲，乖！
阿欣估唔到我有呢一著反擊，
所以就用一個狠狠既眼神厲一厲我。
我心裡暗笑：今次仲唔玩撚死你！
點知佢仲有一著：樂，你又黎啦，
我地咩都發生過啦，
你都係怕醜先唔認架姐，
我明既。
頂，我真係萬萬都估唔到佢痴得咁徹底，
果時比佢咁講一講我即刻呆左冇聲出，
面都紅撚埋on鳩鳩，生歐歐咁坐係度。
大波達一聽完呢句，又係度淫笑：
阿樂你都算衰啦！中三就學人做埋呢ｄ野！
咁鬼咸濕既你！以前既你都唔係咁既，
邊個帶壞你架先。
我：咪你囉，自從睇左你ｄ深田恭子之後我就壞啦！
大波達：哈，賴得就賴啦你，
之前都係睇姐，估唔到你而家竟然對女仔．．．
我搶住解釋：我冇呀，你咪聽佢亂ｕｐ啦！
阿欣：阿達你講得岩呀，
佢好咸濕架，成日都話想玩花式。
比佢咁講完，我塊面已經紅到無可奈何既地步，
花式！？咩花式呀！呢ｄ都有花式架咩？
駛唔駛fing埋絲帶呀，轉碟呀果ｄ呀！
大波達聽完阿欣既說話仲笑得大聲，
我就冇佢兩個咁好氣，飲下咖啡算。
過多陣之後，大波達都要走先，
話費事阻住我兩個，得閒先約我再傾，
大家交換左聯絡方法之後，
佢就率先步出星巴克。
果時剩下我倆個，亦正正式式步入正題。
大波達走左之後，
即時覺得間星巴克闊落左好多。
阿欣見我個樣好似有少少嬲咁，
就問我：樂，你唔係嬲呀麻？
我冇理佢，頭就擰去望第二邊。
其實我又冇咩點嬲既，
不過見佢玩得咁興起，
我咪興起唔理下佢咁囉。
阿欣見我咁，就起一起身，
行埋去我椅背後面，
輕輕用雙手搭一搭我膊頭，
個頭貼近我耳仔邊話：樂，唔好嬲啦，
都坐左咁耐，不如出去行下囉。
我同阿欣係果個時候就只有幾cm既距離，
縱然佢講果句說話係只需幾秒鐘，
但我卻感受到佢輕輕細語既溫柔聲線，
同埋佢熱呼呼既吐息，
加上貼近耳邊感覺上聲音就變得更立體，
令我整個人都軟化起黎。
阿欣佢，女仔起上黎既時候，的確令我無法抵抗。
我輕輕答應之後，就同佢出去繼續行下。
兩人行到溜冰場前，都自然停下腳步，
雙手擱著溜冰場邊既欄杆上，
輕輕伏低身，望望人溜冰既景況。
望住人群係溜冰場裡面來回滑翔，
有Ｄ一望上去就很專業既感覺，動作乾淨利落，
由滑行動作，躍騰，著地，轉圈，都完美得令人讚嘆，
簡直就好似將場地演化成一個舞台，係上面盡顯舞姿一樣。
有Ｄ則是初學者，就係場邊小心翼翼掌握溜冰既竅門，跌過，起身，
有如剛學行走既初生之犢。
阿欣望住場入面一個人話：個女仔好犀利呀可？
簡直就好似表演緊一樣。
我：認同。
阿欣：係呢，樂，你鍾意溜冰嗎？
說完就用手將頭髮撥撥去耳後，
露出耳朵既阿欣變得更有少女味道，
清純得透徹，就好似可以看得穿一樣，
很有透明感。
我：其實麻麻地，
我唔鍾意困係一個地方活動，
感覺就好似籠入面既雀咁。
你呢？
阿欣微微笑：唔鍾意，
不過如果有你陪就不在話下。
我就笑住話：係麻？
你講野既模式好鍾意以我為軸心呢。
不過，自從見返你之後，
老實講，我更加鍾意你笑既時候。
阿欣稍稍睜大眼睛，
恍惚對我既說話好有興趣一樣：
鍾意我笑？
我：嗯，
你笑果時唔知點解有一種好強既親和力，
令到人會定神被吸引住，
心境更會比你傳染倒，見住你笑既時候，
自己都會開心埋一份。
阿欣面露悅色：呢ｄ正正係笑容既魅力呀。
不過，從來都冇人咁讚我架，
樂，多謝你。
對我黎講，呢種魅力，哪怕只得你一個可以牽動到我。
阿欣坦然話：咁你，除左鍾意我個笑容之外，
咁你鍾唔鍾意我啊？
就係果時，我將我心入面既說話，
講晒比佢知。
經阿欣咁問，我個人就變得認真起黎。
反正始終都要講麻！
我：呢一個問題，其實我都諗左好耐。
自從分手以黎，你一直都幫我好多，
我對你亦有好感，但就未至於到鍾意，
不過．．
阿欣：不過咩？
我望住阿欣雙眼：不過，
我心入面一直有樣野擔心緊．．
我繼續話：我怕我對你既好感，
只係屬於對阿紫感情入面其中一部分既投射，
我實在分唔倒到底自己對你既好感，
係真真正正屬於你，定係點，
你係一個好好既女仔，
我唔想到最後至發覺，原來一齊之後先知道，
我對你既感覺其實係錯覺．．
再加上，
你都要出國嘛！咁仲點．．
阿欣：就係要出國，我先想搵返你。
因為我知道我再唔咁做，就真係冇機會啦，
出左國更加冇可能維持倒，
我只係想係出國前既一個半月裡面，
可以試下同你一齊既感覺，
只要一個半月就夠啦，我怕以後見唔返你時會後悔冇咁做．．
我聽到呢番說話，
先發覺原來阿欣比我想像中投放左更加多感情係我身上。
果時，我亦好清楚點解阿欣會縱使得返再短時間，都會咁做。
原因唔係在乎時間既長短，而係鍾意一個人既時候，
就會好想把握同對方一齊既時間。
呢點，我係係阿紫身上學返黎，因為要見佢一面，都要等一個月時間，
但只係得數個鐘頭既機會。
我：我明白，不過我仲未搞清楚我既感覺，
我唔想對你咁唔公平．．．
阿欣微微低頭：但我真係冇時間等你搞清楚．．．
我猛然比呢一句點醒，
心諗：係喎，
對阿欣黎講時日無多，搞清楚得黎都．．
仲邊有時間慢慢培養感情！？
唉，點解個天咁鍾意作弄人！？
縱然係咁，我實在唔知點答。
兩個人係果陣時都沉默起黎，我知我果時傷左阿欣，
但我實在唔捨得對佢咁唔公平先咁做。
沉寂之間，空氣變重了，氣氛凝重了，
我望住阿欣微帶失落既樣，
卻無法作出任何安慰性既說話，
因為我知道佢並唔需要呢ｄ。
良久，阿欣開口提出一個建議．．．
阿欣：不如我地黎一個短期租約，怎樣？
我聽到之後，不禁大惑：短期租約．．？
阿欣解釋：我時間實在唔多啦，
比你搞清楚黎我都已經飛走左，
仲邊有咁多時間等你喎。
但我又想把握時間，剩返既日子我真係
好想試下同你一齊既感覺。
阿欣眼定定咁望住我話：
能將呢份感覺帶到去異地並保存住，係我最想要既願望。
阿欣講完之後，
心入面既悸動就更加震撼，
震撼得令我對語言既影響力感到驚訝。
簡簡單單呢一句，卻打動至心靈最深處，
果時我亦成個人都愣住，腦海就好似處於空白期一樣。
阿欣：咁係呢段期間，你咪可以順便搞清楚你對我既感覺係點囉。
我又可以感受下我同你一齊既感覺，
係咪一舉兩得呢？
我：但咁．．．會唔會有點兒戲？
阿欣：你就兒戲！
我好認真架！唔係玩玩下！
你當我係咩呀！
我從來對感情既事都唔會以玩既心態對待既。
我不得不佩服：唔係唔係，
虧你諗得出呢條橋，
成日咁多鬼主意。
我補充一句：我唔駛交租金架可？
阿欣：哈，你想交既我都唔拘既。
我收好貴租架喎！
我：但我仲擔心．．．
阿欣冇好氣話：妖，你咪咁婆婆媽媽啦，
成日擔心呢樣擔心果樣，
點會成事架！一於咁話啦！
租約聽日開始生效！
然後佢向我單單眼話：聽日起你就係我男朋友啦！
我會詳細寫埋租約條件比你架啦！
我：下？租約條件？
阿欣：係呀，即係邊ｄ可以或者應該做，邊ｄ唔可以做囉！
如果唔係我咪蝕低晒！你都傻既！
我：點睇都係我蝕低啦下話！
阿欣即刻一路搣我塊面，
一路話：係咩？你再講多一次！？
我：唔好唔好，好痛，放手．．放手．．
個嘴歪啦．．
我強烈要求租約條件入面加返一條”受租人人身安全保障條益”
（如果唔係十條命都唔夠玩，對住呢個暴力狂）
阿欣果時一路行，回頭望我笑住話：
冇得討價還價喎，
行啦，傻佬！
講完以上一切說話之後，
阿欣心情豁然開朗左好多。
其實，果時既我，
只要見到佢開心，
其實對我黎講經已非常足夠。
眼見佢以前受左好多唔開心既事，
仲成日屈係心入面，
我亦可以藉住呢個租約，呢個機會，
去將阿欣既心扉打開，再了解佢多一Ｄ，
要令佢學識去同人分享，唔好成日自己收收埋埋。
至少將來同佢分憂既人唔再係我，
佢都可以學識去搵人傾訴佢自己既心事，
呢樣亦係我最想改變佢既一件事。
我亦好慶幸我當時能夠做佢第一個有機會同佢深入了解既人，
因為我自問自己無咁既魅力去吸引到阿欣將我當成佢既咩人。
我亦知道，佢好需要呢一份租約，
因為佢需要既，唔係租約既本身，
而係一份佢能夠依靠，能夠信賴既人，
一份安全感，從而令佢係過往疲累既世界入面得到一份心靈上既慰藉。
令佢係原本一片黑暗荒蕪既乾土上，
添上濕潤溫暖既水源，泥土，種子，
再種出佢過往色彩絢麗般既心境。
阿欣，只要你累既話，我幾時都可以無條件借我膊頭比你依偎住。
你永遠係同我最交得心既女仔，你知道嗎？
望住阿欣佢喜悅既神色，
我個心亦釋懷左好多，
因為我曾經為過人與人關係既脆弱令到我對感情失去信心，
但今日至少我既做法係正確，
我冇再令第二個女仔傷心，
特別係你，阿欣。
無幾耐，行多一陣之後，
我同阿欣亦各自返返屋企，
佢話趕住要寫一份租約條件喎，
真係冇佢收。
返到屋企之後，
都已經夜晚七點幾。
食飯既時候，我老母亦無忘同我傾計。
媽：仔，今日做咩唔聽電話呀，
打過比你兩次喎。有緊要野搵你．．．
我：下？有咩？可能較左震機聽唔到。
媽：有咩咁大件事要較震機呀，
九成約左女仔啦！
我：都算係既．．
媽：邊個女仔姐，講黎聽下。
我：媽，你咁八掛架！
比我靜靜地食飯都唔得既！
媽：食飯幾時都有得食啦！
阿仔你都算叻啦，咁快又識到女仔。
我：邊係呀，咪又係之前上過黎果個女仔囉，
阿欣呀！
媽：哦？係佢呀，佢唔錯呀，
生得幾標緻，講野又斯斯文文。
我冇好氣咁話：都話佢平時唔係咁架囉．．．
媽：有咩所謂呀！
最緊要拿拿林生米煮成熟飯呀麻。
聽到我老母咁講，即刻飯都噴埋出黎，
邊有老母咁教仔你話，真係比佢激死。
我：我唔係好大個咋喎，邊有咁快去到呢個地步呀。
媽：嘿，怕咩，當年我比你大一兩年已經到呢個地步啦！
我：得得得，我唔想知你ｄ情史。諗起都嘔心。
況且你果時咩年代呀？農業社會又點同呢．．
媽：咁又唔係咁講呀，果時我阿媽都係咁教我，
拿拿林生米煮成熟飯綁住個男人先呀麻。
我廢事佢又講到興起，
就轉移話題：頭先你唔係話有野想講架咩？
媽：啊，係！
過兩日得閒就拎ｄ新衫比阿婆著，
同埋幫我拎ｄ水果去，
阿媽要返工唔得閒，幫幫忙得嗎？
我：嗯，冇問題。
媽：仲有呀，聽日好去覆診啦知麻，
唔好再拖。
我點點頭，然後就爬埋兩啖飯去沖涼。
沖完涼之後，就打比阿欣，
同佢講話聽日朝早陪我去醫院覆左診先，
然後先去其他地方，
佢示意答允，就話係地鐵站月台等。
翌日，我準時朝早十點就係約定既地鐵站等。
見天陰，出門時順道帶一把縮骨遮走。
我慢慢咁走近月台車頭方向，
只見人群從車門落車時急忙四躥既情況，
我集中精神望住一個一個係我身邊擦過既身影，
都唔見阿欣既面孔。
我：女仔總係大條道理遲到既！
於是我就坐係長凳上靜靜咁等，
同時腦入面係度諗：究竟會係一個點既租約呢？
條件應該唔會好苛刻掛！？
一陣要我任勞任怨咪仆街！
冇幾耐，我聽到一把熟悉既聲音：
諗咩諗到咁入神呀！？
我突然比佢嚇一嚇，成個人彈起身，
就話：哇！嚇死人咩！你幾時坐左過黎架？
攝青鬼咁！
阿欣扁扁嘴話：你就係鬼呀！我都未話你，
一帶朝早就心神恍惚咁！
講，係咪諗緊第二個！
我：我仲有邊個女仔可以諗呢，大姐，
唔通諗住Amy咩！
阿欣：點知你呀，你知你ｄ口味幾獨特架啦，
話唔定有少少變態添。
我：變態果個係你吧！
話時話好耐冇見過Amy，唔知佢點呢？
阿欣得意洋洋，用手指掂一掂我個鼻話：
今日你只准諗我，其他一律禁止，
行啦行啦。
講完之後，阿欣就拉起我成個人。
頭先掛住諗野，都冇咩點留意阿欣既打扮。
當日佢著作一件比較緊身既黑色短袖衫，
同一條藍色類似熱褲類既牛仔褲，
加一對小小既拖鞋。
左手有圈住束頭髮既髮繩，
估唔到對腳都幾標準嘛！
因為挨近左阿欣旁邊，
我亦隱約聞到佢既髮香，
係淡而不俗既洗頭水香氣，
實在沁人心脾。
我好奇問：欣．．
阿欣：嗯？
我：點解女仔頭髮成日都有咁大浸洗頭水味既？
我次次洗完頭之後，１５分鐘倒陣味就散晒，
我亦留意過冇咩男仔會有洗頭水味，係得女仔先有。
阿欣微微展顏：哈哈，你份人都幾奇怪架喎，留意埋呢ｄ野。
咁女仔頭髮長呀麻，相對要落多ｄ洗髮露架啦，
所以咪香ｄ囉。
我：定係你地洗唔乾淨咋！
阿欣搣一搣我：你就洗唔乾淨呀！臭到死！
有車啦，仲唔上！
車廂雖然唔太多人，
我坐地鐵亦唔慣爭位坐，
位子都係留返有需要既人坐比較好。
我同阿欣捉緊扶手柱，
列車開動時所帶起既微風時不時牽起
佢既髮絲，佢慣例地將耳邊既頭髮撥向耳後，
呢個動作我就最喜歡，每次都好有美感。（唔好話我變態）
阿欣望住我話：係呢，你定期都要去覆診架嘛？
我微微點頭：嗯，兩至三個月一次吧。
阿欣：好似好麻煩咁既．．
嚴重嗎？
我：嗯，唔嚴重，都慣啦，
例行檢查黎架姐。
阿欣向我提出一個要求：
我．．可以跟埋你一齊見醫生嗎？
我：你都有病？
阿欣打一打我隻手：你就有病！我想再了解下你多ｄ得唔得？
我：當然可以。
阿欣：嘻，一言為定！
勾手指尾！
我：幾歲呀阿婆！
阿欣：叫你勾就勾啦！
就係勾手指尾既時候，
我將動作稍稍變成十指緊扣，
然後話：行啦，到站啦！
只見阿欣面帶紅霞，
目光唔再望住我，
微微低下頭同我一齊走出車門。
果時，女仔手心柔軟既觸感，
對我黎講果種感覺就好似失而復得一樣。
我唔再係獨自係夜深時幻想呢種觸感了，
而係實實在在啊！
出到地鐵站有蓋範圍外，
果然不出所料，落雨了。
我：睇你個袋咁細，
都應該冇帶遮架啦。
阿欣：嗯嗯，點算呀？
咁樣出去實濕晒架喎！
我：你怕？
阿欣：又唔係怕既．．．
如果你趕時間既，我都可以同你沖過去既．．
我笑住話：傻瓜，邊個話我冇帶遮姐，
行啦！
我自知縮骨遮面積有限，
根本冇可能遮晒兩個人。
一個人濕好過兩個人濕，
咁就梗係我濕啦．．
雨勢開始增大，
我就特意用左手攬一攬阿欣膊頭埋黎我身邊，
同佢講：唔好行咁出啦，一陣你濕左點算？
一陣病唔好賴鬼我呀！
阿欣見我咁樣攬住佢，
就細細聲話：喂喂，邊個比你咁攬架。
我：咁呀，算數囉。
然後我從容不迫咁放開手，
繼續話：好心著雷劈！
阿欣：唔係．．
我只係有點驚訝你會咁做姐，
唔係想責怪你既意思。
我：哎喲咬喲？做咩變得咁溫柔呀？
好似一個小女人咁，突然之間唔慣添。
阿欣見我咁講，
就唔忿氣，雙龍出海咁推左我出遮外：
話：你就小女人，慢慢淋雨啦！
然後就擔左我把遮走。
我即刻追上去：頂！大姐，你整到我濕晒啦。
阿欣：車，鬼叫你咁講野先。
我：讚你溫柔都唔得既，
唔通話你粗魯你先鍾意咩！
阿欣：好明顯你唔係真心讚，而係取笑緊我啦！
你當我傻架咩！哼！
我：好好好，你岩你岩。
（唉，要調教佢真係比想像中難呀）
阿欣：知驚啦咩！
行左十五分鐘倒，
就到左醫院，阿欣見我塊面濕濕地，
佢突然又好溫柔話：你睇下你幾唔小心呀，
有遮都整濕個人既，
紙巾呀，拎去抹一抹啦！
我心入面暗屌：食屎啦你！明明係你推我出去既！
我：我手濕抹唔倒呀，
幫我啦。
阿欣咧起嘴：
嘻，好呀！
然後佢竟然用力係咁幫我抹，
我即刻話：喂，痛痛痛！
我塊面就你比你抹損啦！
阿欣：本身你都已經樣衰啦，怕咩姐！
然後佢繼續出盡力咁抹。
我：投降，投降。
可唔可以解約？唔係我十條命都唔夠賠比你．．
阿欣：哈，你就想。
快ｄ帶路啦！
然後，我倆就進入醫院大樓入面。
只怪我帶錯人黎了！我應該帶佢去青山，
而唔係正常醫院之係！
入到醫院，
又係一股令人窒息而濃烈既消毒藥水味，
醫生同醫護人員依然一如既往咁忙得死來活去。
我跟住指示牌，去屬於我應該去既診療範圍。
我用手指一指其中一個指示牌：
喂，見唔見到呀，
精神科係果邊呀！仲唔快ｄ行入去！？
check check好喎！
阿欣即刻用手拍我背脊：
想死呀！
到接待處做一做少少手續後，
就等姑娘叫名等入醫生房。
我同阿欣係果時就搵左個位置坐低先．．
阿欣：有時我好怕黎醫院．．
我：嗯？點解呀？
阿欣：怕見到親人病嘛，
怕見到佢地受盡病痛折磨既樣，
怕見住佢地離開而自己咩都幫唔倒手。
我：你又唔係醫生，
只要你定時花時間陪下佢地，
同佢地傾下計已經好足夠啦。
病人既心理健康都好重要．．．
阿欣：講就係咁講．．
但始終會難過，會唔好受．．
我爺爺就係係醫院度過身架啦．．
阿欣講到呢度，
就用雙手掃一掃自己手臂．．
我：係咪凍？
我係袋入面拎見長袖外套出黎，
主動幫佢披上身。
阿欣係果時慢慢挨住我膊頭，
同我講：真係好恐怖，好可怕，
前一日仲見住爺爺好地地，
下一日就過左身，
一諗起突然失去一個親人既感覺，
就覺得好冇安全感，同埋自己根本做唔倒ｄ咩。
我：自己要做既，就係好好咁活下去嘛！係咪？
果時，護士姑娘亦叫起我個名。
我：到我啦，入去啦喎。
我起一起身，將手輕輕遞向阿欣，
倆人緩緩步向前方。
醫生：哦？阿樂，
你今日冇帶你媽咪黎喎。
阿欣即刻答咀：
係呀，佢媽咪要返工，所以就帶住女朋友黎啦。
護士聽到都忍唔住笑左起黎。
頂你個屎忽欣，駛唔駛對外人都咁直接呀！
我實在意料不及，
面上猛然變得紅透起黎！
我：Er....唔好意思。
然後我細細聲係阿欣耳邊：喂，駛唔駛咁直接呀，作死呀！
阿欣：怕咩喎。
詳情就唔講啦，
反正應該冇咩人有興趣，
所以我加快少少步伐吧！
阿欣：醫生，阿樂個病有冇試過好嚴重呀？
醫生望一望我，我：嗯，冇所謂既，比佢知都冇問題。
醫生：其實都唔係太嚴重，
最嚴重果次都係暈低過一次，
其後都係受控制範圍之內。
阿欣大反應：下？暈低？
點解我唔知既？
我：Er...好耐之前架啦．．
而家冇野．．而家冇野．．
我順便問問醫生：
醫生，有冇ｄ咩病會令到一個人成日出手打人架？
醫生：有，燥狂症等等。
我：聽唔聽到呀，係時候食藥啦。
講完後阿欣即刻啤一啤我。
見冇咩事，等拎埋藥，
我地就出去醫院canteen食飯。
阿欣：嘻，阿樂，
你睇下，我尋晚終於寫好份條約啦。
我見份條約即刻打左個突，
咁撚多條件既！？屌那媽呀！
阿欣份不明文且不人道條約係咁寫既：
1.除左攬同錫之外，其他冇我准許既野一律唔可以做。
2.錫都要岩timing先比錫。
我望完之後o嘴，心諗：下！？點先算岩timing呀？
3.幾時都要對我咁溫柔。
4.要比我打，唔准有怨言。（holy shit，真係有呢條)
5.唔可以對我講大話。
6.唔準做變態野。(你講緊你自己？）
7.食飯唔需要幫我比錢。
8.發生咩事都要以我為先。
9.唔準玩花式。(這個最令人莫名其妙)
10.我仍是處女。（哦？有趣有趣）
如有違規者，一律鞭屍處理。
阿欣：嘻，同意既就簽名啦。
我：咪住咪住，我聽完呢份野之後，
感覺到人生安全受威脅喎。
阿欣：冇得傾，簽名簽名。
你唔簽我幫你簽架啦．．
我：咁即係簽唔簽都死．．．
阿欣：嘻，你已經死係我手上啦一早，
放心啦阿樂，我．會．好．好．對．你．架！
我：聽到你呢句先最唔放心。
就係咁，我了解左你份所謂既條約之後。
我倆既短期租約，就係今日開始，
我唔期望太多，因為我從未有一刻係果時咁想有活下去既衝動。