《新月派仙術奇譚》之《毒撚•女神•百鬼夜行》: 15. 臨床心理輔導
「木仔，你玩唔玩Lego㗎？」
「Lego？細個無玩過，依家都唔會玩啦⋯⋯」
「送俾你吖！」鯊魚遞上一隻Lego公仔。
「咦，復仇者聯盟嗰個黑寡婦？」
「係啊，Scarlett Johansson啊，Peter話我有D似佢後生個樣喎。」
「唔好喇，人哋送俾你嘅⋯⋯」
「收左佢啦，佢話外面炒到三舊水一隻㗎！不過，我真係唔明D男人點解咁大個人仲玩呢D嘢囉。」
「係囉⋯⋯都唔知點解⋯⋯多謝喇！」
木仔無奈地把黑寡婦塞入褲袋，他心裡想：「唉，男人有錢就玩𡃁模，無錢咪玩Lego囉！」
雖然是借花敬佛，始終這個Lego黑寡婦都是女神御賜的禮物，木仔還是把她珍而重之地隨身帶著。
#####
木仔離開醫院後，去了北角的警察心理服務課。在油麻地大排檔血戰當晚，九叔用木仔的配槍開了三槍，所以他就需要被轉介約見警察高級臨床心理學家，接受「開槍後強制會見服務」。 在地下大堂，突然有人喊他的名字：「木仔？」
木仔回頭看看，是個高大英俊，散發著陽光氣息，有點像美國隊長的男人。
「你係？」
「你唔認得我喇？」
木仔仔細大量對方，終於記起來了，他興奮地說：「哦！認得！銀雞繩！張力！出左學堂就無見喇，你返邊個環頭啊？」
「PTU，嗰晚喺油麻地大排檔我都喺度嘎，所以咪要嚟呢度囉，唉⋯⋯成隊藍帽子被人打到訓低⋯⋯」
「哦⋯⋯你做完輔導喇？」
「係啊，咁耐無見，搵日飲杯嘢吖。」
「好啊！」當年在學堂裡，他們兩個各走極端。木仔在孤兒院長大，總是帶點自卑，而且也沒有閒錢去應酬交際，「木仔」就是同學給他起的花名。而張力則是成績優異，出盡風頭，還豪言要拿銀雞繩，所以大家都叫他「銀雞繩」。畢業時，他也真的以第一名的成績拿到了銀雞繩。一個自卑，一個自負，所以他們兩個在學堂裡都沒有朋友。交換電話號碼後，他們就分道揚鑣。
#####
木仔敲門後進去會見室時，他看見那個心理學家後，馬上下意識地退後了一步⋯⋯
「唔駛驚，入嚟坐低慢慢傾啦。」
是Lily！
「放心啦，呢度無殭屍嘎。」
「嗯⋯⋯」自從油麻地大排檔見識過Lily的強大之後，木仔對她的感覺由對魔鬼的恐懼轉化成為了對神明的敬畏⋯⋯木仔環顧房裡的環境，的確是一般心理輔導室的格局，裡面放著一張長椅，穿著米色套裝的Lily，坐在旁邊的沙發上，散發著AV人妻的感覺⋯⋯
「我除左係法醫，又係臨床心理學家，所有Classified Case嘅心理輔導都係由我處理嘅，過嚟訓低啦。」
於是，木仔把門關上，戰戰兢兢地躺在長椅上。
「放輕鬆，聽我講就得喇。」
木仔索性閉上眼睛，因為他知道當他放輕鬆後，此情此景又可能會讓他血脈沸騰。
「通常D老鬼嚟到都會話咩都唔記得嘅，怕有手尾跟吖嘛，不過我唔理咁多，都會將佢地催眠，佢哋遇到嘅妖魔鬼怪，喺佢哋嘅記憶裡面都會變晒做人。」
「點解要咁做？」
Lily慼起一邊嘴角輕蔑的笑著說：「細路仔問大人點樣生BB，D大人唔識點解釋，咪叫個細路唔好問囉！」
木仔似懂非懂，Lily不管他繼續自說自話：「我唔會催眠你嘅，因為以後靠晒你喇，你雖然木木獨獨，但係你D仙術又好似學得好快喎，可能心無雜念呱，我決定收你做徒弟。」
木仔馬上睜開雙眼，受寵若驚的說：「咩話？！真嘎？！」
自從那天在火場用天外飛仙救出鯊魚，木仔就開始想要變得更強，可是九叔就是不肯收他為徒。
「有條件嘎，你唔可以話俾九叔知，我驚激死佢啊。」
Lily突然露出弔詭的神情，接著說：「同埋，你以後要同我一齊幫『超強力部門』做嘢。」
「強力部門？我⋯⋯我哋紀律部隊政治中立嘎喔⋯⋯」
「傻豬，邊度有真係政治中立嘎，係咪上頭叫你打死個大肚婆你都會照打？我知你唔會囉！」
「嗯⋯⋯但係⋯⋯」
「你放心，呢個係『超—強力部門』，係對付D妖魔鬼怪嘅。其實你嘅能力喺油麻地大排擋已經曝光喇，佢哋遲早會上門搵你，因為你已經構成不穩定嘅因素喇。」
「尷操嚟？」
「係啊，當年佢哋搵過九叔加入，你估會點？梗係不歡而散啦，最後我頂左嚟做，咁先至擺平咋。今晚有個行動，你一齊嚟啦。」
「咁快？」
「情報話凌晨3點會有4隻吸血鬼喺西環碼頭上岸，任務係要將佢哋當場消滅。」
「又有吸血鬼？」
「係啊，唔知點解近年大陸越來越多吸血鬼，我研究過佢哋D屍體，好彩佢哋無生殖能力嘅，唔係就弊囉！」
「其實吸血鬼同你D殭屍有無關係嘎？」
「完全無，我D殭屍就好似同無人機一樣，完全由我控制。」
「其實控制人哋個身體會唔會唔係咁好呢⋯⋯」
「人死左，個軀殼就應該『塵歸塵，土歸土』吖嘛，我攞D塵土嚟用有咩問題呢？」
「咁又係，咁點解殭屍塊面無貼住道符嘅？」
「依家用晶片吖嘛，插入個頭度就唔怕道符甩落嚟囉。你都好多問題喎，遲D慢慢教你啦，唔講咁多喇，仲有下個booking，今晚記得準時到，OK？」
「嗯⋯⋯」
#####
凌晨2點30分，木仔提前到達西環碼頭，那裡十分寧靜，鴉雀無聲，只有海浪重複拍打岸邊的聲音。他躲在碼頭對面一棟大廈的樓梯底，默默等待。
「喵⋯⋯」