《一位明星，在自己的「生前喪禮」上死了》: Chapter 25
Chapter 25
4月3日，Vincy 死後第二日。
記者 Erica 一早回到電視台辦公室，發現自己的辦公桌堆滿了來自 Vincy fans 的心意卡，幸運星，小手作，毛公仔等物品。但看清楚，收件人都不是Erica，亦不是 Vincy，而是陳校長和 Rosemary。
「嘩！駛唔駛咁多呀？」Erica 發覺連自己的座位上都堆滿了，想坐下也不能。
「全部都係尋日Vincy 啲 fans 送黎架，想托我地帶俾陳校長同 Rosemary 喎。Vincy 班 fans 都真係有心，連自己偶像嘅媽媽同愛人都咁關心，愛屋及烏， 如果 Vincy 喺天堂知道一定會好安慰。」Nicole 說，原來她的辦公桌同樣都是堆滿了 Vincy fans 送給陳校長和 Rosemary的禮物。
「咁多...... 我用唔到張枱做唔到嘢喎...... 不如揾個紙箱裝起晒，聽日送去俾陳校長同 Rosemary 呀！佢地好似仲喺醫院。」
「好呀，我頭先已經揾到陳校長同 Rosemary 入咗邊間醫院，連邊間病房都問埋喇！一於聽日去探下佢兩位。」
「醒目喎！」Erica 稱讚。
「哈哈，你聽埋我之後講嘅嘢，再讚都未遲！
Erica，老總尋日叫我地查下鄺牧師係咪識驅魔嘅？你估下我揾到啲咩？」Nicole 奸笑，故作神秘。
「咩呀？鄺牧師真係驅魔人呀？『我奉主耶穌之名，命令你走！！！魔鬼，走！！！』嗰種驅魔人？」Erica 繪形繪聲的扮驅魔人，嚇到全辦公室的同事都同時間望著了她。
「我都想係呀，可惜唔係咩靈異故事，不過..... 都算係幾 juicy 幾爆嘅。」
「係？講黎聽下！」
Nicole 遞了一張舊報章影印本給 Erica 。Erica 看一看報章名稱，是一間她從未聽過的報館。她再看一看日期，是二十多年前的一宗法庭新聞。
『教友非富則貴、向來有「富豪教會」之稱的基督教鹽光社，近日出現一宗性醜聞。鹽光社鄺彼得牧師捲入一宗非禮女教友案，有年輕女教友報警指鄺牧師自四年前起，至少五次以「驅魔」為名，在教會摸她的胸部，在她合眼祈禱時熊抱推倒在梳化上，甚至曾強行脫褲不果。鄺牧師昨在觀塘裁判法院否認六項非禮罪。案件編號：KTCC 00666/2012』
「嘩！呢單料堅喎！咁最後點呀？鄺牧師有無坐監？」
「無任何一份報紙有提過呢單案結果點樣，就算係呢個咁簡單嘅報導，全香港都只有呢一份早已經執咗笠嘅報紙有報。好彩佢有寫案件編號，咁我咪上法庭資料度揾，點知真係揾到。」
「做娛樂記者都識揾法庭資料，真係醒目喎！咁鄺牧師有無罪呀？」
「最後法庭裁決係話由於無證據，又無證人，證據不足，當庭釋放。仲唔只呀，嗰個吿鄺牧師非禮嘅女教友，經心理學家診斷為患有被害妄想症，所有證供不可信，最後被送入精神病院。」
「咁即係法庭判咗鄺牧師無罪，佢無非禮女教友喇。不過…… 你頭先話，你揾過全香港都無任何一份報紙有提過呢單案嘅結果？」
「係呀！真係一份都無，一篇報導都無。」
「咁就有啲奇怪，照計『牧師非禮女教友』呢類教會性醜聞，傳媒應該好鐘意放大黎炒作架喎，仲要係關乎鹽光社呢個咁有影響力嘅富豪教會，應該有咁大報咁大先啱架喎！點會一篇報導都無咁奇怪呢？」
「會唔會…… 就係因為鹽光社影響力太大，入面班教友個個都有財有勢，所以無傳媒夠膽寫，怕得罪佢地？」
「唔…… 傳媒唔敢報啫，我地可以親自揾事主查證下囉。同埋我見 Vincy 死訊傳出之後，好多人喺網上爆鹽光社嘅黑材料，包括性醜聞，我覺得唔會太難查。」Erica 頓時充滿鬥志，感覺到自己身為記者的使命感。
Erica 心想：電視台高層不容許我查 Vincy 的死因以及跟鄺牧師自殺的關係，我就去查鄺牧師的背景。這件事跟Vincy 的死因無關了吧。
「咦！睇睇時間，都就黎食晏喇喎。我地下晝約咗林一多做訪問，快啲食小小嘢就行啦！」
＊＊＊＊＊
林一多是香港著名填詞人，和 Vincy 是一對非常好的朋友，曾經公開話過 Vincy「是他身上的一塊肉」，所以他把最好的詞都給了 Vincy。
。
Erica 在生前喪禮當日，於『永生號』上遇見林一多，得到他的答應，在生前喪禮之後約出來做個訪問，表達一下他對 Vincy 的懷念。
沒想到，再見面之時， Vincy 真的已經離開了。
訪問在林一多自己的工作室進行。兩位娛樂記者問了一些很正常的問題，例如「你跟 Vincy 的關係如何」，「跟 Vincy 最難忘的一次經歷」，「聽到 Vincy 死訊後心情如何」之類。
正常問題問完過後，Erica 把攝錄器材關上收好，之後便是她訪問的真正目的：私下繼續調查 Vincy 死因。
「有啲關於 Vincy 過去嘅事想了解下。放心，我地絕對唔會錄低。」
「第一個問題：Aaron 同 Vincy 有無咩關係？ Aaron 之前講過，話自己同 Vincy 係番同一間教會，由細玩到大，而Aaron 又義務贊助成隻『永生號』俾 Vincy 搞生前喪禮，所以想問下你知唔知佢兩個之間有咩關係，例如拍過拖之類呀？」
「以我所知，佢地係好朋友。我都聽聞過 Aaron 係鐘意 Vincy，不過 Vincy 一路都只係當 Aaron 係好朋友。不過，自從 Vincy 離開咗教會，佢地就再好少見面。」
「我想問嘅第二條問題就係呢樣：點解 Vincy 會離開教會？」
「因為...... 佢有啲不愉快嘅經歷。」林一多婉轉的回答。
「係咪因為佢係同性戀，所以被教友排斥同歧視？」Erica 直接的問。
「的確係有因為同性戀而被排斥同歧視，但呢啲都只係小事，唔係佢離開教會嘅最主要原因。」
「咁……最主要原因係咩呢？」
林一多靜了一會，然後深深嘆了一口氣：
「唉，你俾幾分鐘我諗下應唔應該講你地聽。」
Erica 和 Nicole 兩人靜靜地等待，怕騷擾到詞人林一多的思緒，失去接近真相的機會。
「以下我講嘅說話，你兩位要保守秘密，絕對唔可以話係我林一多講嘅。」
「放心，我地承諾會保密。保護消息來源向來係記者嘅專業操守，我地絕對唔會同人講。」
林一多聽到了，再次低頭沉思，右手不停地捻掐著手上的一串佛珠。
「最主要嘅原因，係 Vincy 喺教會入面，曾經被人性侵犯，甚至係...... 強姦過。」
「吓！！！！！」Erica 和 Nicole 二人同時間驚呼。
她們立刻聯想到今早才發現的鄺牧師非禮女教友案件。
林一多又深深地嘆了一口氣：
「係呀，係當年 Vincy 親口同我講嘅。我記得，Vincy 初入行時，喺佢教會俾人性侵犯過。佢無人可以傾訴，唯有同咗我呢個同佢最熟嘅填詞人講。佢捉住我喊咗足足一日。」
「咁 Vincy 有無報警呀?」Nicole 問。
「無呀，佢無報警。一來，當年 Vincy 佢初入行，佢有同經理人 Amanda 講，但 Da 姐下令叫佢唔准同任何人講，怕會影響形象......」
「都似係 Amanda 嘅一貫做法。佢喺生前喪禮之後，都叫大家唔好報警，話唔想令 Vincy fans 傷心。」Erica 忍不住插話。
「二來，係陳校長叫佢唔好報警。」
「陳校長叫 Vincy 唔好報警？點解呀？」Erica 感到難以置信，「自己個女被人非禮強姦，佢叫個女唔好報警？」
「陳校長剩係知道 Vincy 被人非禮啫，強姦嘅事 Vincy 無同佢講。」
「咁點解被人非禮都唔報警？」
「因為陳校長同 Vincy 講，要維護教會嘅形象。佢話基督徒係應該為世人作好榜樣，要好似『鹽光社』個名稱一樣在世上『作鹽作光』。因此，『家醜不出外傳』，有損基督徒同教會形象嘅事，一定要保密，教會內部處理咗就算啦。」
「教會內部處理...... 咁 Vincy 有無話俾鄺牧師知？」
林一多再次深深地嘆了一口氣，然後苦笑道：
「如果我話你聽，性侵犯同強姦 Vincy 嘅人，正正就係鄺牧師呢？」
兩位記者聽到，都睜大眼睛無言以對，腦內閃出數百個問題。
「呢件事有幾多個人知道？」Erica 問。
「我諗……知道呢件事嘅人，應該十個以內。以我所知，知道嘅人包括：Vincy，鄺牧師，陳校長，Rosemary，Amanda，我。」
「Aaron 呢？佢知唔知呢件事。」
「咁我又唔清楚佢知唔知啦。」
三人都靜了下來，兩位記者一時間不知怎樣再問下去。
林一多最後補充說：
「羅馬書12章19節：親愛的弟兄，不要自己伸冤，寧可讓步，聽憑主怒；因為經上記著：『主說：伸冤在我，我必報應。』我好記得，當年陳校長，就係引用呢句聖經經文，要 Vincy 唔好報警。」
林一多繼續捻掐手上的佛珠。
「正正係因為呢件事，Vincy 好嬲陳校長；
亦正正係因為呢件事，Vincy 選擇離開鹽光社，離開教會。」