講故．講夢: 九

「我估都估唔到原來你係冇account，咁你學咩人出故事……」凱瑞不禁搖頭嘆氣。
       
「得啦而家搞，係喎我仲未諗自己嘅網名。」
       
「學我同真名啦！」
       
「唔啦，我份人冇你咁浮誇自大囉！等我諗下先……」我進入了沉思模式，腦中閃過一個又一個的名字，但沒有一個令我覺得滿意。
       
「我覺得你個筆名可以隱藏你自己本名，雖則你冇勇氣學我用真名出故，但有自己個名會更好。」
       




「我諗到！我叫Elvin Ko，不如簡稱做EKO啦？唔得唔得，唔可以做英文做筆名。」
       
「咁咪叫『伊高』囉！不過個名可唔可以霸氣少少？」
       
「伊高好喎！咁…不如叫伊高先輩？」
      
「你係咪睇得太多日本電影？叫先輩(せんぱい)……」凱瑞接著便不斷扮女生的聲音，先輩先輩的叫我……
       
「咁……取其同音叫仙貝啦！雖然日文讀音係唔同……」我靈機一觸。
       




「『伊高仙貝』，Okay啊！

「你條友諗個名都諗咁耐，我連下一篇文嘅主題都諗好喇！」凱瑞滿有自信的大笑：「《澳門首家線上賭場上線啦》！」
       
凱瑞突如其來的一句令我失控狂笑：「你改故事名真係有一手，呢個名一定吸引到好多巴打衝入嚟睇！咁個故諗住講啲咩……」
       
歡樂過後，我為我的處女作作最後的校對和修飾，而凱瑞就為他的新作而埋頭苦幹。

自第六章後家澧就沒有出現在這個故事，大家有沒有掛念她？凱瑞曾經問過我有沒有展開追求攻勢，我坦言說沒有。在追求女生的過程，感情流露的拿捏得恰到好處。如果你沒有千億身家，或者沒有討好的外表，過早流露愛意
只會墮入Friend Zone。要知道女人都是貪錢，都是膚淺的。嗱！家澧不是女人，是女生，或者可以叫做女神。





當我決定向作家的夢想進發的那一剎，我本想跟家澧分享。可能因為我看了太多遍《爆漫》，我幻想自己是真城最高，凱瑞是高木秋人，而家澧就是阿豆美保。我在發夢的時候向家澧說過：「當我成為人氣作家嘅時候，嫁畀我！」幸好每個人的夢不是互通，不然我一定羞愧得無地自容。

我小心翼翼地把第一章的內容複製到發帖文的框框，然後慢慢鍵入《我係一個戴耳機扮聽歌嘅怪人》十三字。再三確認後，按下「送出」二字。

二零一六年十一月十一日。我正式向夢想拔腿狂奔。
我選擇不去觀察文章的回覆，既然大家都掛念家澧，我就替大家約她出來。

「喂，袁家澧？高烙然啊，你上次咪話想睇牛嘅……你而家得唔得閒？係啊，我約左阿祖㗎喇，你問下吳若希嚟唔嚟啦。」我看似平淡地作出邀請，但心跳卻沒有停止加速的意圖。

我回家後立即換上一件純白襯衫，再穿上針織冷外套，戴上隱型眼鏡。在鏡子前前後打量後，準備去迎接家澧。

「烙然你……好少可見你咁打扮喎。」在西鐵站等了十分鐘，家澧向我跑過來後打招呼道。她穿著一襲深藍色的短裙，加上一對少許透視的黑絲襪。身上格仔的上衣亦搭得宜。所謂髮型襯面形，面形襯身形，身形又襯髮型，她一定不是在彌敦道九號剪的。

「你做咩望到眼甘甘咁？阿祖同阿芝呢？」其實我都不明白為何肥婆總是叫阿芝﹙因為叫阿脂？﹚。至於他們兩個為何未到，其實一切都在我掌握之中……