一個書生既Player故事: 三一四

我望一望電話，弊，原來已經九點九！我仲約咗Stephanie十點喺AC2既天台花園等！

我遲到了。

「弊，我約咗人十點鐘見面。我去沖涼先。」

我喺九秒九之間衝去浴室，用咗唔夠五分鐘既時間沖涼。

「你喺度休息陣啦。我落去先。」



用五分鐘去吹乾個頭，隨便換咗件Hall Tee，我就由Hall呢條大斜路急步行落去AC2。

我：【sor 遲左。。我而家係hall落黎呀。。】我send message俾SP。


可惜既係，去到空中花園已經係十點三，本來我想準時出現，俾個好印象Stephanie；好彩既係，只係遲咗三個字，係一個可以接受既時間。

我去到空中花園，坐咗係一個暗角既位置。

我用APP打電話俾Stephanie：「hi，我到左啦，你到左未呀？」



「我？到左好耐啦！有人遲到喎」Stephanie話：「成個空中花園，得我同你兩個人，你過黎搵我啦。」

我喺係花園圍繞一周，終於見到Stephanie。

啱啱趕落黎既情況實在太趕急，我直頭無Plan過見面後要同Stephanie講D乜，所有野都係臨場爆肚。

死就死啦，我無時間左顧右盼。

我一行埋去Stephanie既附近，就聞到一陣酒氣，仲見到佢既側邊放置住一打啤酒，仲有一大枝vodka。



搞咩鬼呀佢。

我不禁皺咗一下眉頭。

Step坐底既位置極陰暗，唔係燈光直射到既地方，非常鬼祟。

「Step？你係度既？」我走去Stephanie面前，扮作驚訝。

「係呀，約左人呀。」Stephanie舉起電話，開左Happn同我既Chatbox俾我睇。

「。。。」我望左Step部電話扮load左幾秒，扁咀，再對住Stephanie反咗個白眼，交足戲：「妖，原來SP係代表Stephanie。唔怪得把聲咁熟口面，我竟然咁都無諗到。」

「咁我用假相假名你又好難估到既。」佢突然拎左罐啤酒遞我：「飲啦。」



唔通Stephanie係因為太緊張先買酒飲？

見到佢條民族風長裙，我睇得出佢今日仲有精心打扮過。


我坐左係佢格離，好似電影入面D男主角咁，懶係型咁開左罐啤酒，大大啖咁飲。

「點解要改名做SP？你真係諗住搵SP？」我問佢。

「你問咗我好多次啦，都話唔係囉。」

「咁你係諗住釣我狗公？」

「都唔係。」Stephanie答我：「我只係。。貪得意姐。」



「噢，咁即係我諗多咗。」我又飲一啖啤酒。