中左六合彩頭獎四千八百萬，依家唔知點算?: 29
「...嘟嘟....！」
「...嘟嘟...！」
「...你所打嘅電話暫時未能接通，請你......」但係打左幾次，電話依然係唔通。
都冇辦法啦，可能做緊野唔開得電話啦，
更何況我根本都冇話過會去接阿瑜收工嘅，
唯有等一陣啦。
於是...我繼續喺路邊等，等吓等吓...再望望個鐘，咦....喂....原來成七點幾架啦，
等左差唔多半個鐘架啦喎，無理由架...琴日明明聽到阿瑜話收六點半架，
無理由成七點幾都未收嘅？
於是...我不斷打電話，一次、兩次、三次、四次，
我屢敗屢戰...但係越打就越驚，我開始擔心阿瑜唔知係咪出左啲咩意外，終於....
「...嘟嘟...！」喺我打左十幾次之後，阿瑜個電話終於都通返。
「...喂！」係阿瑜呀！
「...喂...阿瑜，你喺邊呀...擔心死我啦。」我緊張回應。
「...做咩擔心我呀，我同啲同事去左食飯咋嘛。」阿瑜莫名奇妙咁樣。
「...er....！」我忽然唔知講咩好，唔通我真係神經過敏？
「...你喺邊呀？」阿瑜反問。
「...吓...er...！」點答好呢，話喺馬會門口等緊佢嘅話好籮架喎！
「...你喺邊呀，我過離搵你啦。」我反問。
「...吓...er...銅鑼灣囉，你過離？」阿瑜有啲緊張，好似唔係太想咁。
「...你唔想？」我問。
「...唔係...你過囉！」阿瑜答完之後，我就一枝箭咁飛過去啦。
我承認我對思敏嘅態度同對阿瑜係完全唔同，無計啦...
鬼叫你鍾意佢咩，鍾意嘅就會無時無刻都想見到佢架啦。
我將部車泊左喺皇室堡停車場，之後就步行過去百德新街果邊啦。
阿瑜話佢同啲同事去左一間懷舊冰室度食野喎，於是我到左街口之後就
打電話叫阿瑜出離啦。
「......！」一見到阿瑜我就忍唔住乜都唔洗講就攬左落去，
果種掛住嘅程度猶如吸毒毒癮發作咁。
「...做...做...咩咁痴纏喎！」阿瑜有小小尷尬咁回應，
可能佢覺覺此終都係大街大巷掛。
「...好掛住你吖嘛！」我興奮回應。
「...我同同事食緊飯呀，不如我返屋企先打比你啦。」阿瑜有啲唔好意思咁講。
「...唔捨得呀！」我繼續攬住阿瑜，好似個細路仔咁，扭扭擰擰。
「...乖啦，...聽日先陪返你啦！」阿瑜雙手捉住我塊臉好似氹細路咁。
「...唉...咁好啦。」我無奈回應。
「...比我攬多陣先走啦。」我繼續要求。
「...好啦...好啦。」阿瑜微笑回應，攬住阿瑜真係好舒服...
真係令人愛不釋手....我攬呀攬...攬呀攬...攬左三分鐘左右...
阿瑜忽然推開左我喎....！
「...做...做咩呀？」我好疑惑咁細細聲問，
因為阿瑜忽然好緊張咁望住我嘅背面，
於是我亦即時轉身....見到嘅竟然係....
「...阿妹！」原來係阿妹，嚇得我吖...仲以為邊個添。
「...阿妹知架啦。」我見阿瑜仲係好驚咁唔出聲，
所以行返埋阿瑜身邊拖住佢講。
「...吓...ivy，乜你....？」阿瑜好緊張咁對住阿妹講。
「...er...知！」阿妹一樣係相當尷尬。
「...！」阿瑜唔敢出聲，我地三個人deadair 左幾秒之後，阿妹率先開聲。
「...er...我唔阻你地啦，我返入去先！」阿妹好快咁講完之後，
就急急腳咁走返入餐廳啦。
「...i...ivy！」阿瑜想叫住佢都叫唔住。
「...點算呀，ivy知...點解你唔一早話我知姐！」阿瑜有嘅埋怨我咁。
「...吓...er！」其實我都唔知點應阿瑜好，乜要講架咩？
「...都唔知ivy會點睇我，唉...好煩呀！」阿瑜繼續抱怨，
可能佢驚阿妹覺得佢係第三者，會睇唔起佢啦，
但係我又覺得阿妹唔會喎。
就係咁...阿瑜好快就行返入去同啲同事食飯，而我呢....唯有死死氣咁揸返我部車走，
但係諗諗吓...橫掂返到去都冇飯食架啦，不如食埋飯先返去啦。
於是我行返上皇室堡，望一望個水牌，
之後就上左四樓嘅一間日式咖哩飯店，
是是但但咁一枝公走左入去食飯啦。
一枝公嘅好處呢，就係永遠都唔洗等位，無論係幾繁忙嘅時間，
幾多人嘅地方，基本上都係直行直入，更何況呢...呢間咖哩飯店呢，
生意其實嘛嘛，得六七成滿左右，員工帶左我去近門口位嘅一個吧枱位度坐低，
放低左個餐牌之後，就輕飄飄咁行開左啦。
睇吓先...依度啲野食都幾獨孤一味架喎，豬扒咖哩飯、雞扒咖哩飯、
魚扒咖哩飯、也咩爹咖哩飯呀...全部都係咖哩，不過好嘅又一餐，
唔好嘅又一餐...所以我就求其叫左個雞扒咖哩飯啦。 因為唔係太多人，
個飯幾分鐘就到左，個樣呢...又真係幾精緻嘅，啲咖哩好似摩西過紅海咁，
左右分明...啲汁多到可以浸死塊雞扒架啦，不過食落呢...又真係幾好食嘅。
「...嘟嘟...！」食食吓...個電話又無啦啦響起喎。
「...喂...！」我接聽左。
「...er...喂...阿哥！」原來係阿妹，仲以為邊個添。
「...做咩呀妹頭！」我問。
「...喺邊呀你？」阿妹問。
「...喺皇室上面間咖哩屋食緊飯咋嘛，就食完啦...，
啱啦...上離等我一陣啦，我車埋你返去啦。」我講，
就係咁....阿妹好快就上左離，我亦都啱啱好食完同阿妹一齊離開皇室堡啦。
「...做咩唔出聲呀，有心事牙？同大佬講吓...睇吓幫唔幫到你？」
揸緊車返將軍澳途中我問阿妹，因為佢由頭先上到離，
到依家坐喺我側邊，都仲係粒聲唔出咁。
「...冇野！」阿妹細細聲回左句冇野，
但係佢嘅語氣好明顯就係有野。
「...有咩唔怕講喎！」我再問。
「...算把啦...我講野你會聽咩！」
阿妹睇離比人激嚫喎，咁有火嘅！
「...哈哈...你講野我點會唔聽呢！」我笑笑口講，希望緩和一下氣氛。
「...阿哥呀，我覺得阿瑜佢唔係好女仔離囉！」阿妹講。
「...點會呢，你地唔咪friend離咩？」我問。
「...我地只係同事姐，極其量都係普通朋友！」阿妹忽然好認真咁。
「...做咩無啦啦分你你我我呀又？」我問。
「...一個正常女仔明知人地有女朋友都仲要差隻腳埋去，
你話咁佢算唔算有問題吖？」阿妹繼續道德L上身。
「...妹頭呀，可能阿瑜之前唔知呢！」我講。
「...阿哥你比愛情蒙蔽哂啦，總之我始終都覺得佢人格係有啲問題囉。」阿妹堅持已見。
「...！」我冇出聲，阿妹亦都係一樣，我地兩個就係咁deadair 左半程車。
我唔知點解阿妹忽然會對阿瑜咁有意見，不過點都好啦，
我一定會証明比阿妹睇，阿瑜絕對唔係啲咁嘅人。
果晚阿瑜冇打比我，而思敏亦都因為返夜，所以都冇打比我，
我沖完涼之後，就一個人靜靜地咁坐左喺電腦枱度沉思。