「...嘩...戒...戒子!!!」思敏見到隻戒子之後雙眼發光...成個人呆左咁...!
 
「......!」我繼續唔出聲。 
 
「...聰哥...,你送隻鑽石戒子比我,嘻嘻...係咩意思呢!」思敏突然變面,
由頭先呆左咁一變變到勁興奮,面紅紅、笑笑口咁問。
 
死啦...原來佢以為隻戒子係送比佢架?其實佢咁諗都合理嘅,
佢都唔知我一腳踏兩船,喺我車上面見到咁大隻鑽石戒子喎,
正常都會覺係我諗住送比佢架啦。


 
「...吓...er...哈哈!哈哈!你估吓?」我笑住回應,其實唔知點答好!
 
「...嘻嘻...點知你喎!」思敏怕羞回應,唔知佢心入面諗緊咩啦。
 
「...哈哈!哈哈!係呢,日本果度搞成點呀?」我繼續以笑遮醜同推開話題,
好彩講講吓日本,思敏真係比我轉移到視線,開始講返我地日本之旅嘅一啲細節。
聽思敏講我地今次係去五日四夜嘅,咁好似話第一日就會去(環球影城)喎,
住就住喺日本橋附近,其實我都唔知邊度打邊度架啦,有得我住就得啦。
不過講吓講吓,原來除左我地兩個之外,連黑仔同阿妹兩個都會一齊去喎,


思敏講果陣仲勁唔好意思咁,好似好驚我會嬲,但係其實多兩個人喺度反而覺得冇咁尷尬,
所以我開心都離唔切啦。
 
傾吓傾吓我地就返到將軍澳啦,思敏臨落車果陣仲錫左我一啖,
多謝我送隻戒子比佢喎...唉...希望佢唔好亂諗野啦! 返到屋企沖完涼後,
我照舊坐左喺電腦枱前,回想返今日所發生嘅事,思敏果單都係小野,
當務之急...係要快啲解開浠琳嘅身世之謎。不過今日見過詠恩嘅態度,
要向佢埋身試探,睇離就難上加難啦,唯有再一次向小苑埋手啦。
 
「...嘟~嘟~」於是我打左電話比小苑從長計議。


 
「...喂!」小苑終於都接聽啦。
 
「...收工拿?」我問。
 
「...係喎!」小苑語氣好似唔多老皮喎。
 
「...做咩咁夜嘅?」我繼續問。
 
「...公司盤點囉...麻x煩!」小苑依舊爛口。
 
「...哦!」我答。
 
「...做咩咁好死今晚主動搵我呀?」小苑有啲疑惑咁問。
 


「...嘻嘻...冇~傾吓閒計姐!哈哈!哈哈!」張敬聰呀!張敬聰!
你知唔知你笑到烚熟狗頭咁,笑到幾硬幾假呀,盲嘅都知你做緊戲啦,
你有冇職業道德架。
 
「...假到你吖,琴日仲叫我唔好煩你架,緊係有野想我幫手啦。」
小苑一句就收左我皮,咁我唯有從實招來啦。
 
「...件事就係咁啦。」我將今日去搵詠恩嘅事,
一五一十咁講哂比小苑聽。
 
「...你係咪痴x線架...咁樣逼我家姐,你應該知佢受軟唔受硬架啦,
佢唔想講嘅野,連我同阿爸阿媽佢都唔肯講呀,
你就咁走埋去就要佢講比你知?過火啲掛!」小苑回應。
 
「...咁...浠琳可能係我親生女離架嘛,我都有權知個真相架!」我理直氣壯講。


 
「...係...你啱,之但係你都應該慢慢離架嘛!」小苑繼續回應。
 
「...時間係唔等人架,如果浠琳真係我個女,咁每過多一日,
我地父女團聚嘅時間就會小一日,我...我...唔想浠琳成個童年都冇爸爸呀!」
我越講就越感慨,講到最後果句果陣,直頭係眼淚都流埋出離咁濟。
 
「...你...你冷靜啲先,咁...浠琳都未必係你個女離架姐,
有好多可能性嘅!」小苑理性分析。
 
「...咁除左我,你覺得仲有邊個可疑人物吖?」我好緊張咁問。
 
「...er......!」小苑講。
 
「...咁點解浠琳又咁啱姓張吖?」我繼續追問。


 
「...er.....,我答你唔到!」小苑回應。
 
「...咁即係話浠琳係我個女嘅機會率已經超過左50%啦,
我假設佢真係我個女,咁佢嘅下半身我就要照顧。」我講。
 
「...你嘅假設會唔會大膽左啲呢?」小苑回應。
 
「...假設都唔大膽,幾時先離大膽呀?拿...
大膽假設完之後呢,下一步就係要小心求證。」我繼續狗嗡。
 
「...超...廢話,點求證先得架?」小苑回應。
 
「...咪要你幫手諗囉,你同浠琳生活左咁耐,
有冇啲咩蛛絲馬跡呀?」我問。


 
「...吓...冇喎!」小苑口窒回應。
 
「...頂...你係咪人地阿姨離架,一啲野都唔知!」我有啲無奈咁講。
 
「...咁...咁我有幾可喺屋企姐,浠琳出世頭果幾年我都仲未蒲夠,
基本上晚晚都唔返屋企架啦,係依幾年出左離做野,先開始收心養性咋嘛!」
小苑緊張回應,好似驚我話佢咁。
 
「...咁...樣樣!」我諗緊點做。
 
「...一係我試吓約浠琳出離比你見吓,睇吓你睇唔睇到啲咩蛛絲馬跡囉!」小苑忽然諗到。
 
「...詠恩會咁順攤咩?」我問。
 
「...緊係唔比得佢知啦,咁啦...搵個星期六,我(咋家姨)話約左啲friend去迪士尼玩,
順勢帶埋浠琳去咪得囉!」小苑又諗到計喎!
 
「...咁...都係好辦法,咁...就靠哂你架啦。」我講。
 
「...得啦!得啦!我唔幫你邊個幫你吖,鬼叫你係我哎吖姊夫咩,
嘻嘻...其實我都好好奇想知浠琳阿爸會唔會係你,咁所以呢...等我好消息啦。」
就係咁...小苑就應承左幫我約浠琳出離啦。
 
收左線之後...我好快咁攤左上床訓覺,第二日返工...繼續係冇咩野做,
收工之後...因為係星期三,所以我返屋企食完飯坐左陣之後,
就照舊同阿妹行左落樓下籃球場。阿妹對我嘅態度其實都好左好多架啦,
雖然冇同我有講有笑咁,但係起馬都叫有問有答有交流囉。
 
今晚嘅籃球聚會,人腳依然係平時果啲,不過阿瑜就冇離到,
可能其實阿瑜都唔係咁鍾意打籃球,加上佢知阿妹知道佢啲野覺得尷尬,
所以都開始唔多想離咁啦。都啱嘅...佢離埋我都真係唔知點好,
依家佢唔喺度...思敏對我熱情我都真係冇咁難做。

打完波之後,思敏捉左我去同黑仔食飯,當然...阿妹亦都有離啦,
我地四個人去左黑仔平時去開果間泰國餐廳,食緊果陣大家都有講有笑,
唔知係咪黑仔喺度嘅原因啦,阿妹對我都正常返好多,間中仲會講吓爛gag窒吓我咁,
四個坐埋...當然又會講吓日本之旅啦,成個行程...基本上都係由兩個女仔負責,機票、
住宿依啲當然係由做開地勤嘅思敏搞掂啦,至於飲飲食食同景點,就由阿妹同思敏一齊度掂,
聽佢地講嘅初步行情呢,第一日好似係去奈良公園睇風景,第二日就喺心齋橋同道頓崛主打shopping喎,
到第三日呢...就會去環球影城喪玩,而第四日...佢地話去大坂城參觀吓嘅名勝古蹟咁。
我同黑仔掛住隊啤基本上都冇咩點理,只要有得食有得住,我地男人其實真係冇咩所謂。
 
飲飽食醉之後,我就同阿妹一齊返上樓啦。途中阿妹都有同我傾計,
但係可能佢都仲未接受到啦,所以佢提都冇提過阿瑜,
基本上連我同思敏嘅感情狀況阿妹都隻字不提。都好嘅...起馬阿妹已經冇嬲我先,
至於遲吓會點...er...之後嘅事之後先算啦。
 
之後返到去,沖完涼、分別同兩個女朋友講左陣電話之後,我打左比小苑。
 
「...嘟嘟~嘟嘟!」電話接通左。
 
「...喂!」小苑接聽。
 
「...喂,點呀...咩環境呀?」依句係我嘅口頭禪,
其實都係想問吓小苑浠琳單野搞成點。
 
「...咩野咩環境呀?」小苑回應。
 
「...浠琳單野呀!」我問。
 
「...哦...er...嘻嘻...唔記得左!」小苑諗一諗,之後有啲唔好意思咁答。
 
「...跟緊啲好喎,浠琳嘅終生幸福就喺你手上咋!」我有啲埋怨。
 
「...哼...又比壓力我,得啦得啦...聽日同你搞掂佢囉。」小苑無奈回應。
 
「...係呢...你同我家姐係點識架?」小苑忽然好奇問。
 
「...吓...er...讀毅進果陣識嘅!」我回應。
 
「...諗吓先...家姐讀毅進果陣我都已經冇讀書成日去蒲唔返屋企,
唔怪得我未見過你啦。」小苑諗一諗之後講。
 
「...果陣多數都係你家姐上我度,我都冇乜上你屋企,就算上都係等你屋企冇人果陣,
或者淨係送你家姐返到去門口就走,唔好話係你啦...連你阿爸、阿媽都未必見過我啦。」我回應。
 
「...哦...!」小苑回應。
 
就係咁...我同小苑傾左好耐電話。唔知點解...同佢傾電話果陣,我覺得好舒服,
好冇壓力...同思敏果種唔同,思敏果種係無壓力咁聽佢講野,而小苑果種係互相交流,
就好似識左好耐嘅老朋友咁。唔知傾左幾耐之後,我就收線訓著左啦。

第二日訓醒,我一樣係照常返工,不過我今日返到公司,終於都做左決定啦。
一返到去...我就走左入阿頭生哥房度,遞左我人生中第一封辭職信。生哥當堂嚇左一跳,
不過然後就冇得啖笑啦,而係問我到底發生咩事,好想留我...不過我將做歌手依件事講左佢知之後,
生哥雖然覺得好可惜,但係好支持我...希望我可以實現無盡嘅夢想。

交代完之後,我當然係出返去做野啦,占士同阿榮見到我走返出離之後,
即時走左埋離收風,見佢地兩個個樣都好鬼死緊張咁款,可能都驚會比人炒啦,
我當然係將我要做歌手依單野一五一十咁講左比佢兩個知啦,
但係佢地兩個嘅反應都各走極端喎!
已有 0 人追稿