我只不過喺自修室溫書，點知比我遇番佢。: <四十三>欄路虎
「拜拜啦，學校見啦！」
出番市區之後，我地就再轉地鐵，而阿月同阿靜就有司機車佢地番去。唉，有錢真好。
「今次玩完都唔知幾時再有得出黎玩。」子妮講。
「溫..溫下書啦，仲咁貪玩！」阿星話佢。
「咁真係有排都冇得一大班人一齊嘛。」
都係嘅，應該有排都唔可以成班人去玩到癲曬咁。
「考完試再約啦！實有機會嘅。」阿晴講。
到站之後，我同小涼、小霖一齊行。
「你地唔洗送我啦，拍下拖啦你地。」去到街口小霖講。
「得唔得啊？」我問佢。
「得啦，唔係好夜姐。」
「咁你自己小心啲啦！」小涼講。
「點啊，今日好唔好玩啊？」我送小涼番屋企果陣問佢。
「好好玩啊！估唔到你最後一次畢業旅行我可以參與。」
「唔止架，我想..」
「想咩啊？」佢眼仔碌碌，好精靈咁望住我問。
「我想以後每個階段都有你陪住我囉。」
「咁口花架你！唔睬你！」雖然佢咁講，但係佢嘅笑容已經出賣咗佢。
「我係真心架！」咁浪漫嘅時候..唔知點解覺得自己扮緊柳飄飄。
不過我都知呢個時候要俾佢一啲信心去信任我。所以我講果陣捉實咗佢兩隻手仲眼定曬咁望住佢，希望佢感受到我嘅誠懇。
「好啦好啦..我信你啦！」之後我地情不自禁咁攬埋一齊。
「林小涼！」一把雄厚而有威嚴嘅聲音響起，動搖咗成條街，更動搖我地嘅關係..
「爹..哋..」我地循聲而望，真係小涼老豆。
佢見到佢老豆果陣，即刻fing開咗我。
佢老豆一步一步行過黎，每行一步，我個心就好強烈咁顫動一下，呢啲就係傳說中嘅望而生畏？
「佢係邊個？」佢語氣好低沉，但係恐怖到可以食咗我咁制。
「爹哋…」
「嗯？！」
「係….我朋友」吓？
「朋友就會喺條街攬住咩？」
「嗯…」小涼冇任何回應。
但係點解佢要話我係佢朋友啊？
「同我番屋企啦。」
「係….」
「小涼！做咩事？」我伸手去捉實佢。
「細佬，我認得你，上次醫院果個呃麻，俾我同個女番屋企好冇？」佢講到咁，我仲有咩嘢做得到。
「我遲啲先同你解釋啦..」小涼臨走前講。
佢地走咗之後，條街靜英英咁，得我一個企咗喺到，我諗我仲未消化倒頭先嘅事。
番到屋企之後，件事仲喺我腦海繞迴不散。
我打開Instagram，映入眼簾嘅就係小涼同我嘅合照。
個caption係咁：「終於黎到夢寐以求嘅白泥啦！呢到好靚啊，希望隔離條傻佬會同我睇第一個日落啦！」
個post有好多個likes，下面仲有好多留言，全部都係恭喜我地嘅留言。
睇黎我地都受到好多人嘅接受同祝福，但係偏偏喺所有人都接受我地果陣又會出現咗隻欄路虎。
明明下午仲好甜蜜，點解會係咁樣完結？
我睇過好多劇同電影，一旦父母界入，對戀人就會有好多波折，分分鐘仲會被拆散。
我同小涼會唔會咁樣架？IG張相會唔會係我地第一張、亦係最後一張合照？
「究竟發生咩事？」我好想即刻問清楚佢所有嘢，所以我whatsapp佢。但係佢成晚都冇上個whatsapp，最後上線都留咗喺我地仲喺地鐵嘅時間。
等等下我都瞓咗，直至第二朝起身….
「晏就自修室見啦..」
佢仲落得自修室..情況應該冇咁差掛。
至少唔會似啲狗血故咁又玩禁錮又失聯又剩啦…至少未去之前我係咁諗。
一食完晏，我就即刻落去休息區，佢一早已經坐喺到等我。
「小涼..」我行埋去嗌佢。
佢一抬起頭，眼腫腫咁，應該喊完一場。我睇到之後好心痛，佢喊果陣應該冇人喺佢身邊，好孤獨咁喊。一諗到呢到我就好自責。
「阿楓！」佢一見到我攬實我，眼淚又再度湧出黎。
「我好掛住你..我唔想冇咗你..」佢一路喺到大喊，一路哽咽咁講。
「唔會唔會..我而加咪喺到囉。」雖然我安慰住佢，但係我嘅心情都唔好受。
「我尋日..同爹哋..罵咗好耐交啊..」
「之後我就喺房喊咗好耐...但係又唔想喺電話同你講..我好想見你啊」
之後佢就冇再講嘢，一路喺到喊，每一下喊聲都好似鼓鳴咁敲響我心靈，搞到我心絞痛咁制。
「好啦好啦，唔好再喊啦，一陣喊到失曬聲眼又腫就唔靚啦。」
可能佢都喊到有啲攰，所以都慢慢停咗。
「我地去飲水機斟杯水飲先再慢慢傾啦。」
我拖住佢落去，我驚我一鬆開手佢又好似尋日咁，我驚我一鬆開手佢又唔知去咗邊。
「好啦，冷靜完啦可？」
「嗯..」
「咁可以講咩事啦..？」
「我今日黎..係講分手架..」
呢個答案其實我落黎之前已經有諗過，但係當聽到呢一刻都有啲震撼。
「分手？分咩手啊？尋晚唔係仲好好地架咩？」
「記唔記得我問過你..我地之間會唔會發展得太快啊？」
「記得..咁又點啊？」
「其實係指我父母..我一直唔敢對佢地講我拍拖嘅事。」
「因為我中四果陣都試過拍過一次拖..」
「果陣我好鐘意佢，但係一齊咗冇幾耐就見咗家長。」
「點知後來比我發現佢有咗第二個，仲要係我一個朋友，我真係唔明點解表面可以同我咁friend，暗地就..」
唔怪得當初佢一見到小霖就咁有戒心..仲話有種久違嘅感覺啦..
「呢件事令到爹哋好嬲，仲唔俾我讀完書之前拍拖。」所以佢就一直都冇咩安全感，唔係對我唔信任，而係唔知佢老豆會點樣對我地...
但係佢喺我面前仲一直扮到好堅強、好樂觀咁，就係唔想我擔心，唔怪得佢手嘅溫度一直咁凍。
辛苦你啦..小涼，要你一個人顧慮咁多嘢...
「我知佢係為我好，但係直至遇到你我就..」講完之後佢又有啲想喊想喊嘅抽搐。
「我明我明。」我拍一拍佢後背，等佢可以冷靜番啲。
「直至尋晚被佢撞破咗，佢唔俾我地喺一齊，仲要我同你分手，我同佢嘈咗好耐佢都唔聽我講。」我明白佢老豆嘅苦心，但係我知道自己點對佢，所以我係唔會放棄佢架！
「我有諗過扮到好冷漠，去同你講分手，但係我一見到你，我就的唔起心肝，根本講唔出口！」
「講唔出口咪唔好講囉，我尋日話過我係唔會離開你加麻。」
「你放心啦，我一定唔會令你受傷害，唔會要你一個人承擔所有嘢。」
「但係我點同我老豆交待啊..？」
「等我黎面對佢！」我已經退縮過好多次，我唔可以再退縮，我唔可以再做廢紙！
佢聽完我講之後先安心啲。
「你介唔介意..我咁遲先同你講啊？」佢問我。
「唔會啊..每個人都會有自己過去啊嘛，我都明白你嘅難處。」
「阿楓..你真係好好啊..」
「你而家先知咩？等你仲成日巴巴渣渣咁！」
「呢啲係情趣啊，嘻嘻。」都總算哄番佢笑啦。
「不過啊，以後你有咩就要同我講，我地一齊去面對，正如你要我有咩都同你講。」
「係係係，知道。」
「咁你之後諗住點啊？」佢問我。
「而家就梗係…溫下書先啦。」
「如果你可以嘅，今晚我陪你番屋企同搵你阿爸？」
「好啦…」
.
.
.
呢一刻..我就坐咗喺小涼屋企….