「無啦啦多左幾個家姐同細妹 Season 2」: 午餐

阿希好快咁講左一次有關晨哥既「傳說」比我聽，內容大概都係講佢係學校係幾出眾之類。
 
不過呢d都唔意外啦，我都親身見證過，只係無諗過呢度佢個名會響到去「傳說」級別啫。
 
之後我地終於比訓導主任叫上禮堂聽開學禮。
 
呢度既禮堂並無聖所羅王既咁大，中一至中六都逼哂係度，抖啖氣都會聞到旁邊人既氣味。
 
開學禮黎黎去去都係個d野，聽下校長校董廢up，同以前一樣，只係唔同左地方，唔同左人講。
 




我聽聽下都開始覺得悶，之後直頭訓著左都唔知，要阿希拍醒我我先知開學禮已經完左。
 
唔知係咪因為可以放學，我見阿希黑仔佢地都好雀躍，好開心咁款。
 
阿希：「喂阿明你有無興趣？」
 
我：「咩興趣…？我興趣咪打機之類囉。」
 
阿希：「屌我唔係問你有咩興趣呀，你條友肯定無聽頭先學生會會長講咩啦？」
 




學生會會長？乜佢有上台講野咩？
 
「呢個比你。」
 
就係阿希想繼續講落去既時候，坐我旁邊既女班長Cody突然遞左張紙比我。
 
哇唔通係情書？我第一日返學就收到情書？
 
啊屌，原來係書單。
 




Cody：「係Miss Leung叫我比你架，佢仲叫我提你儘快交選修科志願比佢。」
 
我：「哦哦唔該…」
 
係喎仲有呢D野要處理添…唔知夠唔夠錢買書呢，可能要問Sarah佢地借…
 
啊，去搵佢地先一陣，同阿希佢地傾完之後。
 
咦？人呢？去左邊？
 
無論係阿希定係黑仔，都已經唔見左人。
 
Cody：「走左喇佢地，話要去搵人組soc。」
 
我：「組soc？唔係大學先有soc架咩？」




 
Cody：「原本係無既，不過學生會向學校成功爭取到，今年開始會有。」
 
我：「原來如此…唔該哂…」
 
Cody：「無乜野我走先啦，聽日再見啦…eh…」
 
我：「同佢地一樣叫我阿明得喇，咁妳…」
 
Cody：「你可以叫我Cody或者嘉盈。」
 
我：「哦好，Bye Bye Cody。」
 
Cody微微一笑，之後就走左。
 




好喇…去接佢地喇。
 
去邊班先好呢？唉D班先喇，就係正旁邊。
 
咦無既？去E班睇下先。
 
喂E班都唔見佢地！？
 
喂！！！ABDE班都唔見佢地任何一個既！？唔係唔等我就走左呀？
 
就係我好似一個係商場唔見左老母既𡃁仔咁無助既時候，我電話響了。
 
我一睇，係Sarah打黎，即刻聽左。
 
我：「你地五個去哂邊呀？」




 
Sarah：「我地全部都係學校門口等緊你呀，仲有…」
 
我無等佢講哂就cut左佢綫，全速跑去學校門口。
 
我諗自己既速度已經快過TRANS-AM。
 
不過，同TRANS-AM一樣，都有副作用，當我跑到去門口既時候，我幾乎抖唔到氣。
 
但係，我總算見到佢地五…咦八個人！？
 
大家姐同二家姐都黎左？喂點解晨哥你又係度？
 
大家姐：「總算出黎嗱阿明？好啦我地去食lunch啦，大家姐我好肚餓啦~」