由於我地對於呢頭唔係咁熟,所以我地都係交俾晨哥佢呢個地膽決定。
 
最後,晨哥帶左我地去Yui好鐘意既地方,大牌檔。
 
亦因為咁,Yui一坐低就話想食返當晚食過既餸,聽到Sarah佢地滿頭問號。
 
知道實情既我同晨哥聽到都笑左,因為而家呢個鐘數邊有呢d野食。
 
晨哥:「等我一盡地主之誼,向你地幾位推介我地呢d最出名既野食啦。」
 




之後只見晨哥向d伙記做左幾下手勢,之後過左無耐伙記就捧住一碟碟飯過黎。
 
午餐肉…煎蛋…仲有豉油…呢碟擺明就係…
 
晨哥:「無錯!呢個就係頹飯!」
 
果然真係頹飯…開頭仲以為會係咩野咁巴閉…
 
雖然係頹飯,但係Sarah佢地個個對呢碟野都充滿好奇,對眼好似識發光咁。
 




咁又係,未試過既野會好奇都好正常啫。
 
大家姐:「好啦唔好眼甘甘咁啦,快d食啦凍左就唔好食架啦。」
 
多得大家姐,佢地終於捨得食,而我都開始品嚐眼前呢碟頹飯。
 
唔?出奇地好食喎…以為會好麻麻,居然有D驚喜…定係只係因為我肚餓?
 
睇落佢地五個都覺得呢碟飯好食,見佢地一啖接一啖,無停過手咁。
 




佢地覺得好食就好啦,幾怕佢地唔滿意。
 
晨哥:「點呀阿明,感覺如何。」
 
我:「幾好食吖呢個,有少少出符意料添。」
 
晨哥:「我唔係問你個飯感覺點,我係問你第一日係呢度返學感覺點。」
 
哦屌佢係問呢樣,點解我會get唔到架…
 
我:「哦哦…幾好吖班上既人都幾好人,我仲識左一個叫阿希,一個叫黑仔既人,佢地睇落都好玩得咁。」
 
晨:「阿希同黑仔啊..?啊~的確,呢兩個係好仔黎,估唔到你咁快就同佢地熟。」
 
「有佢地兩個你應該好快可以融入架啦,你之前既擔心都可以拋諸腦後。」




 
我:「我諗都係啦哈哈,不過我聽佢地話今年學校會搞soc,其實係咩黎架?」
 
晨:「啊呢個,其實呢個係我既理想黎,由Form1開始既理想。」
 
「我Form1開始就覺得呢間學校太悶,大部分同學每日都只係返學放學,少左D活力。」
 
「所以我希望學校可以有興趣學會既制度,等其他同學可以係讀書之餘都搵到D樂趣。」
 
「不過無諗過要去到我Form6先成功爭取,搞到我自己都無機會享受添哈哈。」
 
嘩…聽落去佢咁偉大既,居然有個咁偉大既理想。
 
晨:「所以你就代我去享受啦,阿明。」
 




我:「嗯,當然。」
 
我無諗太多,只係隨心咁答佢。
 
呢個soc制度,會為學校帶黎D乜,而家仲未有人知。