[粵][RPG][粗口慎入]Gladys－迪詩娜之泉: Ch4. 流氓
Ch4.
太陽漸漸走到西邊，天邊開始泛了點黃。
聽亦寒講，天藍城依種小城，會分做9區。
連接森林果邊係北門，官道就係西門，區域就由東至西、北至南咁分，所以旅館係第2區，城主府係中央既第5區，岩岩行街既就係比較旺既3、6區。
亦寒帶住我地走入第1區既橫街入面，依度比較靜啲，整體建築唔多，大部分都係啲雜貨舖、餐廳仔。
卡思雜貨店
所 在：天藍城
所 屬：諾黑
等級限制：1
進入限制：無限制
我地一行四人行左入一間雜貨店，依次掌櫃既唔係呀叔，係個十零歲既少女，如果唔知依度係童黨據點既話，你可能仲以為佢咁乖出黎幫屋企人睇舖。
「黑大哥係唔係到？」亦寒問少女。
「係到呀，小寒，你有事搵佢咩？咦，」少女發現到亦寒扶住果個同伴，就指住佢問：「佢做咩呀，你地又同人打架呀？」
「事後再講，佢地要搵黑大哥，我先帶佢地入去。」亦寒微微向後瞥左一眼，示意黎搞事既人就係我。
「嗯…」少女冇再問其他野，乖乖咁食花生。
亦寒帶我地行入去店面後面，果度有個放貨物既小倉庫，行到盡頭，就有兩條樓梯，一上一落。
沿住樓梯向下行，係一個仲大過地面雜貨舖既地下室，除左有少量封裝既貨物之外，仲有啲木棍、鐵通依啲古惑仔常用武器。
話時話，唔知依度有冇摺凳？
再行入啲就見到有張圓枱，有四個少年坐左係枱四邊，玩緊啤牌。佢地自製左啲紙幣當籌碼用，而枱上贏得最多籌碼既，就係坐最入果個黑髮黑瞳少年。
「喂，快啲啦站長，我下手就贏，咪再拖時間。」果個黑髮少年對坐佢下家既少年講。
「點解成日都黑大哥贏架…」個少年好似唔係好甘心。
「我唔信，依鋪一定仲有機。」另一少年說道。
「嘿嘿，就算你地宜家三個夾埋，都已經阻止唔到我。」
「黑大哥。」亦寒呼喚黑髮少年。
「喂喂小寒，依個時間黎依度做咩？」黑髮少年抬起頭，「喂，小寒，你帶兩個咩人黎呀，咦～咦，等陣，靚女黎架喎。」見到人形既雷米，佢即刻吹口哨。
我忽然之間覺得，雷米就算用原本look定人形look都好，都係咁危險。
好心你稀有得黎個樣就唔好咁清純喇好冇，出事架嘛。
「幸會幸會，我叫寧風，依位係我妹妹，你點稱呼？」我循例問候下佢。
「哦～咁依位一定係寧小姐喇，幸會幸會，有咩可以幫到你呢？定係想同我地一齊玩呀？」
「咳哼。」丫，你老尾丫，我就最憎人已讀不回我，你唔講呀嘛，我自己睇。
我眉頭皺一皺，就出現佢資訊。
諾黑
人類
血 量：3594／3594
魔 力：？？？／？？？
等 級：？？？
物 攻：？？？
魔 攻：？？？
物 防：？？？
魔 防：？？？
天 賦：？？？
假設佢同我同lv黎計，佢血量同我唔帶神鍊果陣差唔多，加上佢應該多數唔係魔法使，咁既話我魔法同魔力上既果啲分佈佢可能谷哂落物攻度，隨時高過400物攻。
（寧風能力值，同Ch1果陣一樣：血量：4173；魔力：3577；物攻：309；魔攻：251；
如果冇帶守護者項鍊，數值如下：血量：3558；魔力：3194；物攻：282；魔攻：230）
佢見我眼珠紅左，知道我昅緊佢，佢都望返我同雷米既資訊。
「黑大哥，佢地係魔法使…」與此同時，亦寒係隔黎提醒佢。
諾黑聽到即刻瞪大雙眼，係人驚訝時既表現。
乜魔法使三個字咁大威力架咩，咁如果係女聽到會唔會即刻濕晒？
諾黑企左起身，收起左果副嬉皮笑臉。
佢睇落同我差唔多高，著住啲粗糙既布衫，雙腿啲肌肉望落充滿爆發力，雙手粗糙，一定唔係啲咩富家子弟。
諾黑轉向亦寒，問：「你話佢地係魔法使？」
亦寒點頭。
「邊一門貴族？」諾黑冷冷道出，講到貴族兩個字既時候，隱隱透露出殺氣。
「對唔住，我平民黎。」我答。
諾黑一聽到，雙腳一郁，身體突然間好似消失左咁。
依個速度，如果用我現實世界對眼，一定連影都睇唔到。
半秒都唔洗，諾黑已經係我身前，手上既鐵通一野揮落黎。
我連思考既時間都近乎冇，情急之下就嗌左：「瞬！」
「光盾！」企我後面既雷米都大喝左一聲，右手展開左一個防禦盾。
我閃左去諾黑後面，鐵通同光盾相撞，發出左巨大既聲響。
「最好平民戴得起依啲鍊！」諾黑大嗌，右手出盡全力。
佢提一提我先諗起，我條神鍊一路都冇隱藏，識貨啲既都知係貴野黎。
威力不足既光盾抵受唔住諾黑既強力攻擊，漸漸失去光芒，接觸處開始出現裂痕。
我即刻用一個短距離瞬移，左手用匕首吉向諾黑。「好對唔住，」
「乒！」一聲，諾黑既左手唔知幾時揸住左把短劍，用後手頂住我把匕首。
雖然佢力量值應該高過我，但後手始終唔夠正手咁大力，佢逐漸比我壓制，鋒刃慢慢貼近佢背脊。
我慢慢咁增加力道，佢右手向前一壓，擊碎左光盾，同時左手輕輕一推，一個借力轉身，鐵通一野揮過黎我手腕。
我一早準備左魔法既右手向前一伸，次元炸彈先過左手擋住鐵通，鐵通即刻扭曲成一堆廢鐵。
「但我唔係貴族。」
佢退後防守，拎過一枝新既鐵通。
「既然係咁，你黎做乜鳩？」諾黑眼神非常之兇恨，好似我殺左佢老豆老母咁。
佢同貴族應該有一段血海深仇。
「我係黎交朋友既。」我答。
「威脅我朋友帶你黎，跟住同我講黎交朋友？」諾黑反問，同時垂低鐵通，準備再次行動。
「個笑話都幾好笑。」諾黑講，但係臉上半點笑意都冇。
「信不信由你。」我攤開雙手，嘛，反正我信了。
「哼，既然有貴族自己送上門，我係唔會比你行出依個門口。」諾黑睇黎始終以為我係貴族？
「冇辦法，睇黎有啲野，唔打過你係唔會明白。」黎左Gladys咁耐，係時候要拎返個首勝。
一個提示彈出：
「
提示：
諾黑向你提出對決請求，你是否接受？
模式：一對一
規則：瀕死對決，藥水禁止
獎勵：無
備註：陷入無時效的昏厥狀態者，自動判定為敗方。
」
「我接受。」
當對決既提示彈出，而對方又接受，就代表依場係一場正規對決。
正規對決既好處係一開始就可以set好哂規則同獎勵，好似今次既對決，係瀕死對決，姐係要打到對方0血為止。
而獎勵係對決開始前就已經由系統keep住，所以如果係要賭一啲野，正規對決就可以令你冇得反口。
而且，所有對決結果都會有記錄，有時兩敗俱傷果啲，你分唔到邊個贏，但用依個黎決鬥，人地快你0.1秒都好，你輸左先就係輸左。
而最重要一點，就係正常我地睇人個名果陣，通常人類都係顯示綠色，但係如果你係城市地區扣過人血，係會變黃色，殺左人會變橙色，雖然長時間冇比人發現既話會變返正常綠色，但黃字橙字始終有個被拉既風險係到，所以用依個黎打鬥都係好重要。
我接受左之後，一個透明既罩圍出一個半球體，將所有其他人推開，罩內只係得返我同諾黑。然後，本身既提示框消失左，變左另外一個：「提示：離開始還剩10秒」
係依10秒之內，我唔可以準備任何技能，亦都行唔到。
9，8，
「就比你睇下，我既仇恨。」諾黑。
7，6，5，
我合埋雙眼，諗起打機時既果種感覺，果種手感、果陣手速、果種狀態。
4，3，2，
雷米同一班流氓屏息以待，空氣都隨之而凝結。
1，0！
係倒數到0果一刻，諾黑立刻郁左。
「瞬！」我都即刻唔理三七廿一用左依招先。
我一閃開，就見諾黑把短劍已經吉左落我岩岩企個位。
我屌你，有冇咁快呀，開外掛呀你？
我同佢交換左位置，佢一個花式轉身，身體再次奔向我。
諾黑係近攻類，而我有空間魔法可以拉打，佢好似係為左避免咁既情況所以想一波解決我。
「一擊必殺（註１）！」佢就好似啲動漫輕入面既on9仔咁，大大聲講左招技出黎。
佢本身速度已經好快，但佢用依招既時候仲快，連寧風對眼都已經唔係好睇到。
「瞬！」睇都睇唔到，更何況避，我又用一次瞬。
但係我瞬走果一刻，係果0.01秒間，我覺得有啲野吉左我一吉。
瞬移完，我見到我扣左幾十血，好明顯岩岩諾黑係已經掂到我。
諾黑，一個快過瞬移既男人。
佢都應該feel到自己high到我，以佢速戰速決既策略，佢好有可能會再用一次同一招技，但係依種咁超越lv界限既技能，一定有唔少副作用。
我一邊諗，一邊準備魔法，一邊睇佢狀態。
決鬥緊果陣睇唔到血量既實際數字，但係可以睇到剩餘血量同魔力既比例，姐係好似打機果兩行紅色藍色bar咁，而且我發現佢身上多左一個狀態，同理，睇到個icon，但唔知buff／debuff左啲咩。
我見到佢魔力已經所剩無幾，咁既話，下一次可能就係直接用生命值黎出技。
唔知係我錯覺定佢果個狀態影響，我覺得諾黑附近好似比一陣風圍住咁，仲隱約見到一啲成形既空氣。
諾黑一個急速轉身，再向我刺過黎。
佢依次真係好快，我完全睇唔到，只可以預測，我右手用次元炸彈擋係前面，左手唔用住睇情況。
係佢埋黎果一刻，我隱約感覺到佢避開左正面，轉而攻擊我右手，我左手想伸出果陣已經趕唔切，佢沿住我前臂一下鎅到上我膊頭，我血量值就好似倒水咁倒，一下就冇左9成幾，我視覺突然間蒙上左一大片紅色，就好似戴左副紅超咁，背脊就標哂冷汗，心臟不停咁跳動。
人對魔獸用技能果陣，技能傷害會因身體唔同部位有不同程度既倍大；而人對人用技能果陣，技能傷害會因身體唔同部位而有不同程度既倍細，其中四肢係倍率最細既，所以如果依下唔係吉落手臂，我一定即刻輸。
佢鎅完我手臂之後，冇反應咁停左係到，我一個轉身，左手使出次元炸彈，右手準備好瞬移，點知佢避都冇避，就咁硬食左我招魔法。
佢好快就失去左意識，進入［瀕死］（註２）狀態，勝利既提示彈出，防護罩亦同時解除。
「
提示：
恭喜，你在對決中勝利，並獲得以下獎勵：
無
」
「雷米，快！」我眼中已經冇果個提示，我即刻叫雷米過黎治療諾黑。
「你兩個唔準掂黑大哥！」一直旁觀的三個流氓，對住我同雷米大嗌。
「你地同我收皮！」雷米已經跑左去我身後，開始治療諾黑，我擋係雷米同諾黑面前，右手提起，手掌既魔印快速轉動。
右手既血不停咁流出，我只能夠好勉強咁撐直，「想諾黑冇事既就唔好行過黎。」我望住眼前紅色既幾個身影蠢蠢欲動，我警告佢地。
佢地一來知道我地係魔法使，唔夠我地打，二黎我地可能隨時對諾黑不利，所以唔夠膽郁。
岩岩戰鬥完加上失血既我大口大口咁呼吸，同時，我左手係背包一手拎左幾支＜初級生命藥水＞出黎，雖然明知飲幾支都係得一支效果，但我都係忍唔住一野隊晒幾支。
初級生命藥水
消耗品－藥水
以特殊藥材煉製而成的生命藥水，喝下後能回復少量生命。
等級需求：10
回復效果：每秒回復15（+0.35*回復）點生命值，持續10秒。
使用次數：10／10
重 量：1
紅色既生命藥水飲落有啲西瓜味同提子味，唔算太難飲。
「祝福（註３）！」雷米對諾黑用左復活技能，然後係技能冷卻果陣不停咁餵諾黑飲＜復活藥水＞。
復活藥水
消耗品－藥水
以特殊藥材煉製而成的復活藥水，低機率使飲用者復活。
等級需求：10
回復效果：飲用者以5（+0.01*回復）%機率解除［瀕死］狀態。若成功解除，10秒內回復飲用者5%（+1*回復）的生命和魔力。
使用次數：10／10
重 量：1
由於祝福同＜復活藥水＞機率都唔算太高，所以在場幾個都好緊張，見佢地開始focus返係諾黑身上，我啲血量又回復返咁上下，我都慢慢解除左戒備狀態。
結果係不斷既嘗試下，終於係第三次用祝福既時候成功左，諾黑恢復返少少血量，但都仍然係［昏厥］狀態。
諾黑冇事之後，我去左其中一張凳坐低，雷米去返我隔黎，幫我治療。
亦寒同果三個流氓一支箭咁標左去諾黑度，睇佢情況。
「對唔住，岩岩差少少就出事。」
雷米擰頭：「我先至係要講對唔住果個，我係場外乜都做唔到。」
我都擰頭：「不嬲係實力唔夠既時候，補師先係最重要。」
雷米抬頭望住我，我又望返佢，對望左幾秒，跟住佢耷低返頭，繼續focus係幫我治療上，之後細細聲講左句：「多謝。」
我冇答啲乜野，剩係摸一摸佢個頭。
到我身體狀態回復返七八成之後，我叫亦寒過黎：「亦寒。」
一個平民痛恨貴族既組織，稍微投資下或者會有意想唔到既效果。
亦寒帶住疑惑行過黎，我將幾十個金幣拎出黎，倒晒係枱上面。
「依啲錢，幫我比諾黑。」我對亦寒講。
「下…依啲…」亦寒應該第一次見咁多錢，個樣呆晒唔知點反應。
「一個組織，除左人，最重要就係錢，依啲錢應該幫到你地。」
亦寒仍然唔識反應，企左係度。
「不過我有條件架，過幾年我可能會搵你地組織玩下。」
見佢仍然冇反應，我同雷米打算離開。
點知行過亦寒身體之後，佢開口問：「點解，點解要幫我地？」
我背住亦寒，答：「冇乜話點解，可能係有趣？又或者可能係…」我降低左聲量，自言自語咁講：「諾黑有啲似寧風。」
我同雷米頭也不回，離開左地下室。
行到上店面既時候，我突然間醒起啲野。
我發現睇舖少女同一班流氓已經準備收舖，我問一問少女：「係喎，我想問，你知唔知永言係邊？」
……
睡房
所 在：卡思雜貨店
所 屬：諾黑
等級限制：1
進入限制：3級限制
雜貨舖既樓上，有一間睡房，入面放左一張木床。黃昏時分既第1區，人流甚少，橙色既光線透過旁邊既窗一絲絲咁透射，輕撫床上既諾黑。
果日睇舖既少女坐左係床邊，呆呆咁望住窗外。
同漸漸沒落既太陽一樣，唯一能夠做既只有等待。
等待一個又一個黑夜成為過去。
少女望一望床上既諾黑，雖然只係訓左係度幾個鐘，但少女唔知點解有種錯覺，覺得諾黑可能永遠都唔會再甦醒。
就好似打贏魔風狼王果個寧風一樣。
房外面係一班追隨諾黑既流氓，佢地收到通知之後全部都返哂雜貨舖依個根據地。
班流氓一邊商討，一邊派兄弟出去收集情報。
有人打聽到寧風同雷米係今日岩岩先入城，而且係旅館仲同老闆發生過啲爭執。
對於依兩個岩岩黎天藍城既外來者，成班流氓都唔知道佢地既真正身分。
亦都有人諗住即刻教訓佢地一餐，但係係諾黑醒返之前，佢地基本上唔敢輕舉妄動。
而且最令人在意既係，寧風同雷米留低左幾十個金幣比佢地，依點佢地都摸唔透寧風既用意。
乜現實真係有人會無條件咁幫一堆陌生人架咩？
佢地嘗試提出過幾個可能性，但都係冇結果。
「交替時間到喇，紅玥。」其中一個有份玩啤牌既流氓，入左諾黑間房。
「嗯，唔洗，我想留多一陣。」
「太勉強自己既話…」
「唔緊要，我冇事。」紅玥打斷左流氓。
「…」流氓一時無語，然後語鋒一轉，「咁好喇，我地宜家煮飯，煮好我拎比你。」
「嗯…」紅玥點頭，流氓刪門出左去。
而係依個時候，「…」
「！」
諾黑一隻手指慢慢郁動，眼睛緩緩睜開，不過身體仍然係好攰。
「醒喇醒喇！黑大哥醒左喇！」紅玥興奮到成個人彈左起身。
「喂喂，成團最嘈果個，你同我收斂啲。」諾黑不耐煩地道。
「咩喎，我係咁架喇！」紅玥嘟嘴。
「黑大哥醒左？！」幾個輩份比較大既流氓聽到聲音，即刻衝入房。
「身體冇事？」一個流氓行近木床，問道。
諾黑擰頭：「冇乜事，只係我用左兩次招技，啲肌肉仲痛緊，可能需要訓返一、兩日。對手除左最後一招之外，基本冇傷害過我，算係冇乜皮肉之苦。」
「咁就好。」房內外既流氓聽完都放心左。
「咁我地洗唔洗搵果兩個貴族出黎算帳？有一個流氓咁問。
諾黑擰頭：「佢地唔係貴族，貴族先冇咁on9單人匹馬走入黎，仲差啲死係我手上。」
「而且仲送錢比敵人洗。」紅玥插嘴。
「咩送錢？」諾黑睇唔透。
「你訓低左之後，果個細妹用復活技能救返你，個呀哥呢就叫小寒比一大堆金幣你。」紅玥說明當時既狀況。
「認真呢？唔係講緊笑？」諾黑認為紅玥係正經既話題上開玩笑，露出不滿既表情。
「喂喂，我先唔得閒呃你啊，唔信你問小寒。」紅玥雙手叉腰，同樣露出不滿既表情。
「有咁既事？」諾黑反射性問道，但實際上係係度思考緊，而唔係疑問緊。
「好，咁叫亦寒入黎，其他人都出去。」諾黑思考完畢，向其他人下命令。
流氓接二連三咁離開睡房，外面既混混亦都散開左，唯獨紅玥冇走。
「我岩岩好似話除左亦寒之外，全部人都要出去。」
「我就係唔走呀，你罵我囉～」紅玥一邊講仲一邊扮左個鬼臉。
諾黑輕按額頭，「唉，等我好返你就知死。」
───────────────────────────
備註：
１）
技能名稱：一擊必殺
技能類別：獨門技能
技能屬性：無
技能效果：消耗當前魔力值的95%，對敵方造成消耗魔力值135%（+3.05*物攻）的物理傷害，無視敵方30%物理防禦，並獲得［迅殺］狀態。當身上有［迅殺］狀態，消耗當前生命值的95%，對敵方造成消耗生命值215%（+4.95*物攻）的真實傷害，並移除所有負面狀態，包括［迅殺］，接著5秒內強制進入［氣虛］狀態。
冷卻時間：無
狀態：迅殺
說明：作用期間增加25%敏捷及移動速度，降低20%物理攻擊，持續15秒或再次使用一擊必殺。
狀態：氣虛
說明：當當前生命值或魔力值低於最大值的5%，有一定機率觸發。作用期間移動困難、無法使用技能。須於8秒內將生命值和魔力值回復至最大值的10%，否則強制進入［昏厥］狀態。
２）
狀態：瀕死
說明：生命值降至0%或以下時強制進入，必須依靠復活類技能或藥水解除此狀態，360秒後強制進入［死亡］狀態。
狀態：死亡
說明：作用期間無法執行任何動作、指令，可被取去身上任何物品，60秒後，所有物品散落四周，身體永久失去反應、不受任何復活類技能或藥水影響。
３）
技能名稱：祝福
技能類別：獨門技能
技能屬性：光
技能效果：以20（+0.02*回復）（+目標0.02*回復）%機率解除［瀕死］狀態。若成功解除，10秒內回復目標5%（+1.5*回復）（+目標1.5*回復）的生命和魔力。
冷卻時間：35秒