我係迪士尼俾一班邪惡既卡通人物襲擊: ＃14

快速跑過迂迴曲折既鐵欄，平時呢個位係用黎俾人排隊用。此刻我開盡全速咁跑，佢地見唔到我車尾燈。
 
我毫無難度咁就過關入左去。
 
入到見到個巴斯光年大公仔，周圍都係有燈既，唔知點解依家仲會有著燈，我仲以為已經熄曬燈添，點知仲咁燈火通明。
 
「鏘～鏘～鏘」、「登～登～登」
 
太空船危險警告既聲音係我耳邊不停咁環繞住。巴斯光年講住一連串既英文，依家既我無心情停落黎，然後細心聽佢係度講緊咩。
 




巴斯光年舞動佢手中既激光槍，係咁搖黎搖去。
 
平時排緊隊我，都會聽下佢up乜；但當下，只係想入去搵返yuki。
 
我衝入去既時候，巴斯光年捉住我隻手臂！
 
無錯，係捉住左我手臂。
 
佢係踩住個欄杆，伸隻手出黎。我第一個反應就係反抗，死命咁爭扎；出盡力扯，諗住扯返出黎。
 




可惜一切都徒勞無功，跟住我用左手去撥開佢機械既手臂，但佢手臂好似石頭咁，點整都不為所動。
 
我依家最驚既係後面既人追入黎，我就碌柒架啦，走都走唔到。
 
我望住佢光滑既面孔同額頭，唔知點解我覺得佢好好笑，但同時間又覺得好恐怖。本來假既野變成真，無生命既野變成有生命，點呀？翻生侏羅館呀？
 
我想大嗌，因為好急，好想快啲走。但唔嗌得，因為我驚佢地知道我係度。
 
我重施故技，用力咁踢佢。一黎佢郁都無郁，二黎我向後扯，扯到自己手臂好痛。
 




我向門口果邊望過去，我見到一個黑影出現係牆邊度，慢慢向我呢個方向移動……
 
我望住果個緩緩既黑影，一步一步向我逼近。

我已經急到一個點，我就黎想喊，屎尿都出曬黎咁制。

我由死命咁爭扎，到慢慢放手，放棄爭扎。

從佢捉住我到見到黑影，只係短短數秒發生既事。

巴斯光年比一個「噓」既手勢，叫我靜啲。

「快啲入去搵個女仔，然後盡快離開呢度。」佢講完，就返去原位，繼續扮演巴斯光年。

佢唔係講普通話，姐係唔係果班人啦，直覺同我講佢係好人。





但我搞唔清成件事，個腦仲停緊機。

巴斯光年大喝一聲，「喂！」將我由思考既思緒拉返過黎。

黑影漸漸變大，意味住越黎越近。

我即刻拔腿就跑，向入面衝。入面漆黑一片，果架射擊機已經停止左，無郁到。

但仍然散發住熒光，啲公仔無停到，不斷咁重複轉黎轉去。

我一路行，一路細聲呼叫著「yuki」。

但沿路都聽唔到有咩反應，可能呢條路好長，佢唔係度姐。





「鏘」一聲從我後面傳出，睇黎佢地已經係後方不遠，應該係撞到啲鐵。

從後面除左「鏘」聲，然後仲傳出類似打交既聲音。「呯，啪，鏗。」呢種混亂既節奏不停loop黎loop去。我估巴斯光年應該係同佢地打起出黎...

人多蝦人少，巴斯光年只有一把著燈既槍，而人地有幾碌棍，點夠人抽先架..

我應該點好呢...？見死不救定見義勇為呢？
 
正當我遲疑不決既時候，出面傳黎幾聲既叫喊聲。
 
搞到我個心彈跳左幾下，個下力度都幾重下。如此火燒眼眉既危機，無理由唔出手相救。
 
我決定衝返去，佢地兩個互相用手頂住大家，然後不停咁踢對方既肚，下下用盡力，兩個都好肉緊咁叫。
 
真係想拎部手機出黎直播，「巴斯光年大戰黑武士」。