港大七不思議食女事件: 1. 迎新

1.迎新  
 
蕩氣迴腸嘅故事，往往由平凡嘅開頭講起。高考失利後，我並無雖千萬人吾往矣嘅勇氣去重讀，反而升上太空，於港大Space潛修兩年，竟有幸降落地球，入讀港大文學院。
 
事隔多年，我尚記得，於Reg Day[1]當日，當我無比猶豫，到底應否畀幾百蚊 --- 即一星期洗費 --- 去參加BA O Camp，一把嬌柔無比嘅聲線於背後傳來：「你係咪讀BA[2]架？報咗O Camp未？」回頭，陡覺眼前一亮，只見細細粒嘅妙齡女子笑嘻嘻，一雙桃花鳳眼，梳A&F女神頭，將上衣零零舍舍紮起，露出白膩幼腰，直覺話畀我知，食呢條女，其實唔難。
 
「我……未呀，唔知嗰日駛唔駛幫人補習。」我被佢嬌小身型吸引，一時九唔搭八。
                            
「報咗名先啦，如果唔係你開學識唔到人架！係咪連我都唔畀面先？我叫Carol呀！BA Year 2。」細細粒嘅Carol慫恿不停，我只好乖乖將錢財奉上。
 




報完名，我好想同佢交個朋友，但礙於強烈嘅自尊心，只懂向呢位第一位進入我大學生活嘅女子微笑，瀟灑離開。我冇問佢拎聯絡方法，因為，我清楚明白，我地將會再相見，不急於一時。轉身嘅時候，Carol流露半絲失望，又頃刻復歸平靜。
                                                                   
幾日之後，O Camp為不可思議嘅故事揭開序幕。不知係前世孽，定今世命，撩我報名嘅Carol，竟然成為我組媽。我一米八、佢一米五；我太空落地，佢會考拔尖，三十厘米嘅距離與成績嘅差距，成為我地之間本質上嘅鴻溝，命中注定無可能喺埋一齊。
 
O Camp內，「組爸組媽」之稱謂連連，我無法宣之於口，只懂僭越地直呼師兄師姊名字。組員樂於自我矮化，毫不羞恥地向「組爸組媽」爭認便宜仔女，將港大術語瑯瑯上口  --「R」[3]、「搏盡」、「做倒」、「撻皮」[4]之聲不絕於耳。相較之下，我更覺自己係局外人。
 
再者，我實在唔明白，何以好地地玩O Camp，要全港奔走，穿一式一樣嘅衣服，將稜角磨平殆盡。當我拒絕喺銅鑼灣Sogo門口用洗頭水洗頭之時，組媽Carol拉我埋一邊，抬高腳尖，於我耳邊講：「Why do you look so upset? We’re supposed to have some fun today. 等媽媽氹番你。」
                                                                                                                
大家都係唐人，佢竟然同我講英文，仲要爭住做便宜老母。我強顏歡笑咁講：「你唔好認我做仔啦，叫我Marvin得喇。一陣人地屌我老母，連累埋你就唔好啦。」小小嘅幽默感，氹得Carol相當高興，令佢主動摟住我強壯嘅臂彎，請我食一個C級嘅波餅。
                                                                 




夜晚房Game，與我對話不足五句嘅組爸，忽然提議玩Truth or Dare，抽水之心昭然若揭。啤酒樽轉呀轉，停下，指向組媽Carol。佢不虞有詐，揀咗Truth。問題好簡單，就係：「你仲係咪處？」
 
Carol鳳眼流盼，怔怔望住我，若有所思，細細聲講句：「係……」眾皆嘩然。
 
「Well, honestly speaking, 我仲係A0[5]。」我心諗，繼續吹，繼續吹吖。
 
啤酒樽又轉呀轉，樽口指向我，問題係：「你拍過幾多次拖？」我見Carol鳩嗡唔駛本，亦都無謂同佢客氣，將自己拍拖次數減七，自稱 A0。
 
「冇可能架，你個款咁花俏，Girls should be lining up for you.」Carol一貫中英夾雜。
 




「好多囡囡唔計架嘛。我玩玩吓，唔認真。」
 
「Those who don't count……huh？」Carol眼神驚訝，但不久就繼續同其他組仔女有講有笑。
 
快樂嘅時間過得特別快，三日兩夜 O Camp 迅即告終。我唔放過 Carol，成日藉故私底下同佢傾計……
 
 
 
 
 
 
 
 
 
 




 
 
 
 
 
 
 
 
 
 
 
 
  [1] Reg Day：新生註冊日(Regisration Day)。[2] BA：文學士(Bachelor of Arts)。[3] R：請求。例句：「屌，速龍大仙又R我幫佢做功課。」[4]撻皮：懶惰，頹廢。[5] A0: 大學術語，A即Available，意指單身；數字則為拍拖次數。