港大七不思議食女事件: 8. 偶遇

8. 偶遇
 
上回講到，我同Elaine散咗。之後就戇鳩鳩放暑假。
 
暑假無事可記，我係異數嘅港大窮撚，當中產同學仔喺暑假去歐洲，用兩隻手指夾住巴黎鐵塔影相，我就花咗成個暑假幫人補習，完全冇機會識女仔。
 
大學二年級上學期。
 
放學不欲立刻回家，我會於Main Library 溫書。去圖書館三樓溫書，就好似落咗一間靜音嘅酒吧，喺男少女多嘅港大，以我一米八嘅 A&F Model 身型，同芸芸眾港大男生相比，我就好似長板橋嘅張飛一樣，要識女，簡直無異於探囊取物，結識囡囡於彈指之間。唯一問題，好似莎翁話齋，只係 To be or not to be。
 




呢一日，我如常獨自喺圖書館三樓溫書。圖書館牆上寫有莊子《逍遙遊》：「吾生也有涯，而知也無涯」，但卻故意省略「以有涯隨無涯，殆矣」一句，喺如山般高嘅Readings面前，更加顯得萬分諷刺。
 
泡菜國同學常於圖書館三樓自成一國，細聲講大聲笑。港大近年韓妹越嚟越多，我諗負責收生嘅仁兄，一定好鍾意聽 K-pop。
 
我幾乎每日都撞到同一個泡菜妹。同嬌小玲瓏嘅Carol與Elaine不同，泡菜妹身材高佻，常以熱褲示人，一對萬綺雯般嘅長腿，男視之，則血脈賁張，女視之，則百般妒忌；再加上佢眼尾長長，心地善良，有時低頭玩電話，笑起來清麗脫俗，我於一旁偷望，望到入迷處，真不知人間何世。
 
女分三種，一種係用嚟溝，一種係用嚟砌，一種係不可食用，直接拎去化肥、填海或堆填。呢個泡菜妹應屬第一種。
 
我或許寂寞過剩，兼對 Carol同Elaine無甚感情，令我對偶爾碰見嘅泡菜妹竟然好似動咗真情。 每一次見到佢，我都會由浪子變成小毒撚，心仔好似 K-pop 2NE1 隻「bam ratatata」咁怦怦跳。
 




已經連續四個星期見到泡菜妹。每一次，我地都會四目交投，直行直過。奇怪嘅係，每次佢都獨來獨往，專心溫書。我甚至會記低佢嚟溫書嘅時間，同佢扮偶遇。可能係自尊心太強之故，堂堂浪子，食女無數，豈能放下身段，問一個朝鮮人拎電話？但係，我又默默想為泡菜妹付出，因此，我每去一次圖書館溫書，都會買一包陽光檸檬茶，放喺檯面，希望自己會好似陽光檸檬茶廣告一樣，有緣同異鄉人句：「乜咁啱嘅？」
 
此期間，雖不乏囡囡向我示好，但我根本無心應酬。
 
正當我不太專心，邊聽Kpop邊溫習，穿牛仔短褲，戴鴨舌帽嘅長腿泡菜妹竟然行過嚟，用濃濃韓式口音嘅英文同我講嘢：「Would you mind taking care of my stuff? I wanna grab a coffee at Starbucks.」
 
我一呆，原本不太流利嘅英文，更加一舊舊，好似有嘢係喉嚨唔上唔落，彷似拍四仔咁講咗句：「Oh yea Oh yea Oh yea……」
  
(按：為求語言統一，對話已翻譯為中文)
 




泡菜妹噗嚇一笑，彷彿取笑我嘅失態，撥一撥啡色長曲髮，離開圖書館不久就拎咗杯咖啡上嚟。
 
平伏心情後，我嘗試用有限嘅英文同佢講嘢：「Hi，我叫Marvin，文學院二年級，」我見佢手上拎住本Principles of Accounting，就問：「你讀BBA架？」
 
「係呀，我叫Yoona，讀BBA，今個學期嚟香港Exchange，十二月廿五號就會返韓國。」
 
「Yoona？咁中文係咪『少女時代』個明星一樣，叫允兒呀？」
 
Yoona拎張韓國身份證出嚟，上面寫住全允雅，：「Yoona，允雅。」我拎住包檸檬茶，講：「我會永遠咁記得呢個名。」
 
「你真係口花花，其實我都留意咗你好耐，你知唔知你成日偷望我，好奇怪架。」允雅微微一笑，見我手執陽光檸檬茶，就問：「點解你日日都飲呢包檸檬茶？」
 
我大喜過望，心諗你高麗女子仲唔中計，就將陽光檸檬茶廣告嘅偶遇故事話畀佢知。聽罷，允雅合不攏咀，道：「乜咁啱嘅？」
 
忽然，允雅伸伸懶腰，顯然有點疲倦。我提議：「不如我地出去行吓？」允雅欣然答應。




 
我同允雅行落去文學院，經過殘廁，突然憶起有時夜晚，急起上嚟，同組媽Carol喺殘廁大戰，不禁咀角含春。允雅見我無故失笑，問道：「有咩咁好笑？」
 
我冇可能將淫亂事告訴允雅，就信口開河，說道：「諗起有套港產片，叫玻璃之城，講利瑪竇仔同何東妹嘅愛情故事，男女主角就係喺呢到錫。」
 
 講起電影，允雅雙眼瞪得更大：「我有睇過呀！其實呢個都係我嚟香港讀書嘅原因，我好鍾意九十年代嘅戲。講樣嘢你知，你唔好笑我，我最鍾意睇伊波拉病毒，黃秋生成日講嗰句粗口，係咩呢……」
 
「恰鳩我！」
 
「係呀！恰鳩我！恰鳩我！我廣東話係咪講得好好呀？」允雅接連講咗二十句「恰鳩我」，被人用粗口鬧，我卻感如沐春風，遇到意中人，浪子都變欠屌嘅賤骨頭。
 
番邦女子，果然係性情中人。
 
講呀講，快活不知時日過。離別之時，竟然老貓燒鬚，犯咗溝女大忌……